U Miensku adkryłasia vystava žyvapisu i hrafiki Michaiła Sieŭruka
U ekspazycyi demanstrujecca kala 50 tvoraŭ M.Sieŭruka, u tym liku 20 žyvapisnych pałotnaŭ.
Michaił Sieŭruk |
10 kastryčnika ŭ Minsku, u haradskoj mastackaj halerei tvoraŭ narodnaha mastaka Biełarusi Leanida Ščamialova adkryłasia vystava žyvapisu i hrafiki viadomaha biełaruskaha mastaka Michaiła Sieŭruka (1905—1979).
Jak paviedamiła BiełaPAN dyrektar halerei Taćciana Biembiel, u ekspazicyi demanstrujecca kala 50 tvoraŭ M.Sieŭruka, u tym liku 20 žyvapisnych pałotnaŭ. «Usie hetyja raboty vydatnaha mastaka pradstavili znaŭcy biełaruskaha žyvapisu XX stahodździa, mastaki Uładzimir Krukoŭski i Ihar Barchatkoŭ, a taksama kalekcyjaniery Alaksandr i Ina Radajevy», — skazała mastactvaznaŭca. Pavodle jaje słoŭ, ekspazicyja adlustroŭvaje evalucyju tvorčaści M.Sieŭruka za pieryjad 1930—1970‑ch hadoŭ.
Jak adznačyła T.Biembiel, vystava pravodzicca ŭ ramkach prajekta «Pryvatnaja kalekcyja», adkrytaha ŭ studzieni 2007 hoda. Pavodle jaje słoŭ, paśla zakančeńnia ŭ 1932 hodzie fakulteta vyjaŭlenčaha mastactva i muzyki Vilenskaha univiersiteta mastak pakazaŭ svaje pieršyja raboty na vystavach 1937—1938 hadoŭ u Varšavie. «Paśla Druhoj suśvietnaj vajny jon žyŭ u Niaśvižy i pracavaŭ u asnoŭnym u halinie žanravaj karciny i piejzaža. Mabyć tamu jaho unikalnaja tvorčaść naležnym čynam nie aceniena amatarami mastactva. Uskładniaje vyvučeńnie spadčyny Sieŭruka raskidanaść jaho rabot pa zborach Biełarusi, Polščy i Litvy, a taksama adsutnaść navukovaj manahrafii pa tvorčaści majstra, chacia vialikaja kolkaść jaho rabot zachoŭvajecca ŭ muziei‑kvatery M.Sieŭruka ŭ Niaśvižy», — skazała T.Biembiel.
Vystava budzie pracavać da 10 listapada.