U Maskvie pačalisia pieramovy nakont hazu
U Maskvie pačalisia biełaruska‑rasiejskija pieramovy pa pastaŭkach hazu ŭ 2008 h.
Jak paviedamlałasia raniej, ź biełaruskaha boku ŭ sustrečy ŭdzielničajuć ministr enierhietyki Alaksandr Aziarec i hienieralnyi dyrektar AAT «Biełtranshaz» Uładzimir Majoraŭ. Padčas pieramoŭ taksama płanujecca abmierkavać pytańni pastaŭki ŭ Biełaruś rasijskaha hazu da kanca 2007 hoda.
U AAT «Hazprom» pakul admaŭlajucca kamientavać chod pieramoŭ.
Nahadajem, cana na haz dla Biełarusi vyznačajecca ŭ adpaviednaści z kantraktam, jaki byŭ padpisany biełaruskim uradam i kampanijaj «Hazprom» 31 śniežnia 2006 hoda. U dakumiencie prapisana formuła raźliku cany za haz — jaje najaŭnaść była abaviazkovaj umovaj rasijskaha boku. Pavodle kantrakta, da 2011 hoda cana na haz dla Biełarusi dasiahnie jeŭrapiejskaha ŭzroŭniu. U 2007 hodzie jana vyznačana ŭ 100 dołaraŭ za 1 tys. kubamietraŭ. U 2008 hodzie składzie 67% ad cany na jeŭrapiejskim rynku za vylikam transpartnych raschodaŭ, u 2009 hodzie — 80%, u 2010 hodzie — 90%, u 2011 hodzie — 100%.
Treba adznačyć, što praz vosiem miesiacaŭ paśla padpisańnia kantrakta biełaruski bok vyjaviŭ u im «niekatoryja niedachopy».
«U formule raźliku cany za haz z «Hazpromam» jość niekatoryja niedachopy: jaje składniki nielha adčuć siońnia, i jany zaležać u tym liku ad kanjunktury cen na naftapradukty», — zajaviŭ 30 žniŭnia na pres‑kanfierencyi ŭ Minsku namieśnik kiraŭnika AAT «Biełtranshaz» Vinieryj Vałčuha. Jon paviedamiŭ, što ŭ bakoŭ jość roznahałośsi ŭ traktoŭcy hetaj formuły. «Rabota pačałasia, i ja dumaju, my jaje zavieršym da 1 kastryčnika. My ŭžo pryblizna viedajem, jak pravilna karystacca formułaj, jakaja prapisana ŭ kantrakcie. Razumieńnie naša i «Hazproma» pa jaje vykarystańni pavinny poŭnaściu supaści», — skazaŭ V.Vałčuha.
U svaju čarhu prezident Alaksandr Łukašenka papiaredziŭ, što«na pieramovach z «Hazpromam» Biełaruś budzie žorstka prytrymlivacca nacyjanalnych intaresaŭ».
«Na hetych pieramovach usio mahčyma, ale naša pazicyja viadomaja — jana žorstka matyvavana i budzie źviazana z apłataj pasłuh pa tranzicie rasijskaha hazu cieraź Biełaruś», — zajaviŭ prezident, adkazvajučy na pytańni žurnalistaŭ 22 vieraśnia ŭ Rečycy (Homielskaja vobłaść).
Pry hetym jon adznačyŭ, što «Hazprom» na prodažy hazu ŭ Biełaruś «maje takuju ž dachodnaść i prybytkovaść, jak u Hiermanii». «Heta značyć z nami handlujuć, jak z Hiermanijaj», — padkreśliŭ A.Łukašenka. Pavodle jaho słoŭ, u 2008 hodzie «Hazprom» źbirajecca ŭźniać canu dla Biełarusi jašče na 15—20%. «Čym my tak pravinilisia pierad kiraŭnictvam Rasii — ja nie viedaju», — skazaŭ prezident.