Chronika apazycyi: 1 - 5 kastryčnika
Nadrukavana ŭ № 37'2007
Zatrymańni, sutki, štrafy, pieratrusy.
1 kastryčnika
Na sutki za razdaču hazety
Šeść siabraŭ haradzienskaj abłasnoj filii AHP byli zatrymanyja ŭ časie razdačy hazety «Svaboda Biełarusi» na haradzkich rynkach. Kiraŭnika abłasnoj arhanizacyi Juryja Istomina i jaho namieśnika Andreja Januškieviča pakinuli na noč u pastarunku. Sud Leninskaha rajonu Horadni pakaraŭ A. Januškieviča štrafam u pamiery 3 bazavych vieličyń. Ju.Istomin u sudzie Kastryčnickaha rajonu atrymaŭ 5 sutak administaracyjnaha aryštu.
2 kastryčnika
Klimaŭ zastaniecca za kratami
Mienski haradzki sud pakinuŭ biaź źmienaŭ prysud palitźniavolenamu Andreju Klimavu. Nastupnyja dva hady jon praviadzie ŭ kalonii ŭzmocnienaha režymu. Apazycyjaner abvinavačvajecca ŭ zaklikach da źviaržeńnia dziejnaj ułady. Sudovy praces adbyvaŭsia za začynienymi dźviaryma, u zalu byli dapuščanyja žonka Klimava Taciana j advakat. Heta treci pa liku kryminalny prysud suprać A. Klimava.
3 kastryčnika
Da čytača praź milicyju
Ranicaj niepadalok ad rasiejska‑biełaruskaj miažy supracoŭniki dziaržaŭtainspekcyi zatrymali nakłady hazetaŭ «Tovariŝ» i «Narodnaja vola», što vieźli ŭ Biełaruś sa Smalensku. U Dubrovienskim RUUS u prysutnaści načalnika milicyi nakłady hazet źvieryli z dadzienymi tavarna‑transpartnych nakładnych. Paśla hetaha aŭto z hazetami adpuścili.
5 kastryčnika
Sieviaryncu admovili
Bieraściejski abłasny sud nie zadavoliŭ skarhu Paŭła Sieviarynca na rašeńnie sudu Maskoŭskaha rajonu Bieraścia, jaki prysudziŭ palityka da 15 sutak aryštu «za parušeńnie ŭstanoŭlenaha paradku praviadzieńnia masavych mierapryjemstvaŭ paŭtorna na praciahu hodu». Taksama abłasny sud pakinuŭ bieź źmianieńniaŭ rašeńnie sudu nižejšaj instancyi ŭ adnosinach da dvuch udzielnikaŭ sustrečy z P.Sieviaryncam, što prajšła ŭ Bieraści 19 žniŭnia, — Jurasia Bakura, jaki byŭ aštrafavany na 3 bazavyja vieličyni, a taksama Lubovi Pranievič (joj było vyniesiena papiaredžańnie).
Pieratreśli homielskuju AHP
U Homieli supracoŭniki UKDB naładzili pieratrus na ofisie abłasnoj arhanizacyi AHP. Pieratrus ładzili supracoŭniki KDB kapitan Andrej Jurevič i major Jury Nazarenka, jakija pradjavili sankcyju prakurora Homielskaj vobłaści Aleha Pałavinki. Supracoŭniki KDB patłumačyli, što śledčyja mierapryjemstvy na ofisie AHP adbyvajucca ŭ ramkach kryminalnaj spravy, zaviedzienaj u dačynieńni asobaŭ, što dziejničajuć ad imia niezarehistravanaj arhanizacyi «Małady front».
Saŭmin niedatykalny
Vyšejšy haspadarčy sud adchiliŭ skarhu Biełaruskaha Chelsynskaha kamitetu na Saviet ministraŭ i Ministerstva finansaŭ. Pradstaŭnik Saŭminu na razhlad spravy navat nie źjaviŭsia. Nahadajem, try hady tamu BCHK abkłali padatkam na zamiežnuju dapamohu pavodle prahramy TASIS. Miž tym, raniej z hetaj dapamohi padatak nia brali. Ułada patłumačyła novaŭvia¬dzieńnie źmienami ŭ zakon ab padatkaabkładańni, jakija ŭnios parlament.
Aryštavanuju majomaść BCHK acanili ŭ 250 tys. rub. Adnačasova sud pastanaviŭ spahnać z arhanizacyi 155 miljonaŭ rubloŭ padatkaŭ i štrafaŭ za ich niaŭpłatu. Rachunak BCHK aryštavali, a suprać jaje kiraŭnikoŭ zaviali kryminalnuju spravu. Potym jaje zakryli, ale staršynia BCHK Taciana Proćka nie vyklučaje, što spravu ŭ luby momant mohuć adnavić.
Svabodu presie
U Smalavičach u centralnym skvery prajšła akcyja ŭ padtrymku niezaležnaj presy pad nazvaj «Čytajem svabodnuju presu». Tuzin aktyvistaŭ hramadzianskaj kampanii «Za Svabodu» demanstratyŭna čytali hazetu «Svaboda». Pa zakančeńni akcyi milicyjanty zatrymali vosiem čałaviek. Praz hadzinu maładych ludziej vyzvalili, hazety skanfiskavali.
Šukali ŭhnajeńni
U Śvietłahorsku milicyja praviała pieratrus u kvatery miascovaha aktyvista Telmana Maślukova. Učastkovy inspektar, staršy lejtenant Dzianis Katkaviec i śledčy, lejtenant Dźmitry Kazak šukali kajstry ź mineralnymi ŭhnajeńniami ŭ knižnych šafach. Raniej svajak Maślukova fihuravaŭ u spravie kradziažu mineralnych uhnajeńniaŭ. Tady spravu spynili za adsutnaściu składu złačynstva. Varta nahadać, što ŭ vieraśni T. Maślukova vyklikali na dopyt u KDB pavodle kryminalnaj spravy «Maładoha frontu».