«Lapis Trubiacki» nazvany «Hurtam hoda 2013»
Pa viersii muzyčnaj premii «Dajom rady».
7 lutaha ŭ staličnym kłubie Re:Public adbyłasia cyrymonija ŭznaharodžańnia pieramožcaŭ muzyčnaj premii «Dajom rady», jakuju pravodzić Jeŭraradyjo.
Pa vynikach hałasavańnia najlepšym hurtam 2013 nazvany «Lapis Trubiacki». Akramia taho, ich klip «Miesiac» pieramoh u naminacyi «Muzyčnaje videa — 2013».
Lepšym albomam staŭ «Čornaja panna» fołk-mietał-hurtu Litvin Troll, «Sinhłam-2013» nazvana pieśnia «Huantanama» ad Nizkiz. Najlepšy solny vykanaŭca — Źmicier Vajciuškievič.
«Muzyčnym prajektam — 2013» Jeŭraradyjo ličyć «Džazavyja suboty la ratušy», «Fiestyvalem-2013» — mižnarodny fiestyval fołk-muzyki «Kamianica». Premiju «Debiutu-2013» atrymała kamanda Tonqi xod. U novaj naminacyi — «Zamiežny albom-2013» — pieramahła płaścinka Right Thoughts, Right Words, Right Action hrupy Franz Ferdinand.
Śpiecyjalny pryz kłuba Re:Public «Samy šalony kancert hoda» administracyja ŭstanovy ŭručyła brytanskaj kamandzie Enter Shikari.
Akramia taho, byli ŭručanyja ŭznaharody ŭ niesurjoznych naminacyjach. Tak, kiraŭnik studyi «Osmas» Pavieł Jurcevič pieramoh u katehoryi «Niaździejśnienaja nadzieja — 2013. Redkaja ptuška dalacić da siaredziny tancplaca».
Premijaj imia Alisy Žydovič ŭznaharodžanyja žurnalisty Źmicier Biezkaravajny i Taćciana Zamiroŭskaja.
Uznaharoda ŭ katehoryi «Niepataplalnaja lehienda» dastałasia hrupie N.R.M. U naminacyi «Kalaka-malaka» — 2013» pieramahła vokładka alboma «Čornaja panna» hurtu Litvin Troll, nievierahodna padobnaja da vokładki dyska brytancaŭ Paradise Lost «Tragic Idol».