Viciebskija desantniki čakajuć adpraŭki ŭ Tadžykistan
Jany buduć dapamahać ADKB u achovie afhanskaj miažy.
Praz 25 hadoŭ paśla vychadu savieckich vojskaŭ z Afhanistana biełaruskija vajskoŭcy viartajucca ŭ Centralnuju Aziju. Jak stała viadoma «Našaj Nivie», «vykonvać internacyjanalny abaviazak» rychtujucca viciebskija sałdaty.
«Budziem achoŭvać tadžykska-afhanskuju miažu. Jak nam skazali, niekalki miesiacaŭ pabudziem u Tadžykistanie, paśla pryjedzie nastupnaja vachta», — paviedamiła «NN» krynica ŭ 103-j hvardziejskaj mabilnaj bryhadzie, jakaja bazirujecca ŭ Viciebsku.
Zakanadaŭstva Biełarusi zabaraniaje ŭdzieł uzbrojenych sił u bajavych apieracyjach, ale dapamoha Tadžykistanu ŭ ramkach Arhanizacyi Damovy ab kalektyŭnaj biaśpiecy (ADKB) pad takija nie padpadaje.
Kolkaść vajskoŭcaŭ, jakija buduć pierakinutyja ŭ Tadžykistan, nie paviedamlajecca, nieviadomy i zapłanavany čas adpraŭleńnia. «Čakajem», — tłumačyć adzin z tych, chto trapiŭ u śpis «na Tadžykistan».
17 lutaha kiraŭnik Biełarusi Alaksandr Łukašenka padčas sustrečy z hienieralnym sakratarom ADKB Mikałajem Bardziužam paabiacaŭ dapamahčy Tadžykistanu z achovaj miažy z Afhanistanam. Sioleta skančvajecca vajskovaja misija NATA ŭ hetaj krainie, i rasiejcy miarkujuć, što z sychodam amierykancaŭ praź miažu paciakuć narkotyki i zbroja.
Bardziuža zajaviŭ, što Biełaruś dapamoža ekipiroŭkaj i technikaj. Pra adpraŭku sałdat ni słova skazana nie było. «Ale nam skazali: jak ža my adpravim techniku bieź lu-dziej?» — kažuć viciebskija sałdaty.
«Uładzimir Pucin sprabuje ŭźvieści ŭ Centralnaj Azii bastyjon suprać radykalnych musulman», — miarkuje vajskovy analityk Alaksandr Alesin. Na jaho dumku, kiraŭnictva Rasii choča zaścierahčysia ad upłyvu radykałaŭ na rehijony, dzie žyvie vialikaja dola musulmanaŭ.
Siły ADKB dziejničajuć u intaresach Rasii, kaža Alesin, ale Biełaruś udzielničaje ŭ hetym prajekcie nie zadarma. Uzamien kraina atrymlivaje tannuju zbroju, a taksama ekanamičnyja prefierencyi.
«Paśla raspadu SSSR na terytoryi Biełarusi zastałasia staraja technika. Jana maralna sastareła, tamu na vajnie nieaktualnaja. A voś suprać partyzanaŭ i terarystaŭ moža spatrebicca», — razvažaje ekśpiert.
Biełaruś ustupiła ŭ ADKB u 2009 hodzie. Na dadzieny momant, aproč nas, u vajskovym sajuzie znachodziacca Rasija, Kazachstan, Armienija, Kyrhyzstan i Tadžykistan.
Pavodle statuta arhanizacyi, kalektyŭnyja siły apieratyŭnaha reahavańnia vykarystoŭvajucca dla adbićcia vajskovaj ahresii, praviadzieńnia śpiecyjalnych apieracyj pa baraćbie ź mižnarodnym teraryzmam i ekstremizmam, transnacyjanalnaj arhanizavanaj złačynnaściu, narkatrafikam, a taksama dla likvidacyi nastupstvaŭ nadzvyčajnych situacyj.
Pavodle infarmacyi «Rasijskaj haziety», ad Biełarusi ŭ siłach apieratyŭnaha reahavańnia maje ŭdzielničać mienavita 103-ja hvardziejskaja mabilnaja bryhada. Alesin dadaje, što, mahčyma, u vypadku ŭmiašalnictva z boku ADKB u niejkuju krainu ad Biełarusi spatrebicca jašče i ŭdzieł «milicejskaj» bryhady, dla padtrymańnia paradku i zabiaśpiečeńnia stabilnaści ŭ rehijonie.
Na jahonuju dumku, sałdaty terminovaj słužby prymać udzieł u achovie tadžykskaj miažy nie buduć: u hetym niama patreby, bo chapaje kantraktnikaŭ. Choć tearetyčna paśla prachodžańnia śpiecyjalnaj padrychtoŭki mohuć adpravić u Aziju i zvyčajnych sałdat.
Biełaruski vajskovy śpiecnaz pravodziŭ treniroŭki i ŭ Katary, i ŭ Kitai, tamu budzie hatovy i da dziejańniaŭ na miažy z Afhanistanam.
Pres-sakratar hałoŭnaha ŭpraŭleńnia ideałahičnaj raboty Ministerstva abarony Uładzimir Makaraŭ kamientavać situacyju admoviŭsia. Paskardziŭšysia na «niekarektnaje aśviatleńnie» «Našaj Nivaj» skandału z manumientam u Bresckaj krepaści, jon kinuŭ słuchaŭku.