U Biełarusi aŭtamabili Geely pradajucca biez utylizacyjnaha zboru
Aŭtamabili Geely nie padaraželi paśla 1 sakavika. Heta značyć, što barysaŭski zavod «Biełdžy» vyzvaleny ad vypłaty ŭtylizacyjnaha zboru ŭ vypadku realizacyi mašyn u Biełarusi.
Rejestr ajčynnych aŭtavytvorcaŭ, dla jakich vypłatu ŭtylizacyjnaha zboru ŭ biudžet Biełarusi zamianili harantyjaj pierapracavać transpart u dalokaj budučyni, vyznačany. Trapić u jaho — vielmi značnaja padzieja dla luboha zavoda: heta zachoŭvaje častku srodkaŭ i dazvalaje pakinuć ceńnik na pradukcyju na raniejšym uzroŭni.
Adkazvajučy na pytańni «Ježiednievnika», pres-sakratar Minprama Siarhiej Šałaj udakładniŭ: pieralik vytvorcaŭ pakul nie apublikavany. A značyć, nazvać vytvorcaŭ, vyzvalenych ad vypłaty ŭtylizacyjnaha zboru za mašyny, pradadzienyja dla ekspłuatacyi ŭ Biełarusi, pakul nie ŭjaŭlajecca mahčymym. Nie pažadaŭšy čakać apublikavańnia rejestra, «Ježiednievnik» pacikaviŭsia ŭ minskaha dylera «Biełdžy» AAT «Aŭtatorhservis», kolki kaštuje Geely dla biełaruskich pakupnikoŭ.
«Ceny nie źmianilisia, — rastłumačyŭ načalnik adździeła prodažaŭ i servisu Viktar Rusakovič. — Kali mašyna nabyvajecca dla ekspłuatacyi ŭ Biełarusi, utylizacyjny zbor nie vypłačvajecca. Ukaz ustupiŭ u siłu 1 sakavika, a ŭžo 4 sakavika my zmahli pačać prodažy, realizavaŭšy dva Geely SC7. Hetaja madel prapanujecca ŭ dźviuch kamplektacyjach — z kandycyjanieram i klimat-kantrolem, mašynami cikaviacca ŭsio bolš aktyŭna. Pavodle mierkavanych acenak, u 2014 hodzie my pradadzim 500 aŭtamabilaŭ».
Umovy vyzvaleńnia ad utylizacyjnaha zboru
Miechanizm dziejańnia ŭkaza №64 «Ab utylizacyjnym zbory ŭ dačynieńni da asobnych vidaŭ kołavych transpartnych srodkaŭ» prapisany ŭ pastanovie Saŭmina №172. Umovy vyzvaleńnia ad utylizacyjnaha zboru ahavoranyja ŭ dadatku «Ab paradku i ŭmovach pryniaćcia arhanizacyjaj, jakaja vyrablaje transpartnyja srodki, abaviazańniaŭ zabiaśpiečyć nastupnaje biaśpiečnaje abychodžańnie z adchodami, jakija ŭtvarylisia ŭ vyniku straty transpartnymi srodkami svaich spažyvieckich ułaścivaściaŭ».
U hetym dakumiencie pieraličanyja ŭmovy, na padstavie jakich arhanizacyja-vytvorca moža pryniać abaviazańni pierapracavać aŭtamabil, jaki straciŭ svaje spažyvieckija ŭłaścivaści. Inšymi słovami, utylizavać u dalokaj budučyni, abmiežavaŭšysia abiacańniami abo, jak skazana ŭ dakumiencie, abaviazańniami.
Dla hetaha vytvorca pavinien być jurydyčnaj asobaj, vykonvać apieracyi pa naniasieńni VIN-koda na nieraskładalnyja składniki kuzava (kabiny), šasi ci śpiecyjalna vyrablenyja numarnyja tablički transpartnych srodkaŭ.
Prapisanyja i režymy vytvorčaści aŭtamabilaŭ.
U vypadku z «Biełdžy» havorka idzie ab pramysłovaj zborcy. Jak viadoma, zavod padpisaŭ z uradam Biełarusi inviestycyjnaje pahadnieńnie ab pramysłovaj zborcy aŭtamabilaŭ z ukazańniem pieryjadaŭ raźvićcia vytvorčaści. U peŭnyja terminy mahutnaści zavoda buduć składać 10 tysiač, zatym 60 tysiač i, narešcie, 120 tysiač aŭtamabilaŭ u hod. Tam ža ŭkazany pamier i terminy łakalizacyi ŭ 30%, a zatym 50%.
Kali ŭsie ŭmovy buduć vykonvacca, «Biełdžy» budzie pastupova «abrastać» vytvorčymi mahutnaściami, zachoŭvajučy častku hrašovych srodkaŭ — na dalejšaje raźvićcio.