Kolki zarablajuć minskija kandydaty ŭ deputaty? Redkaja mahčymaść zazirnuć roznym ludziam u kišeni
Siarhiej Kalakin sa «Spraviadlivaha śvietu»– adziny lidar partyi, jaki sprabuje prabicca ŭ Minharsaviet.
Čarhovyja vybary ŭ miascovyja saviety vyklikajuć małuju cikavaść u hramadzian.
Padčas papiaredniaj kampanii jaŭka musiła pieravyšać 50%, tamu ŭłady byli vymušanyja «padciahvać» ličby. I navat pry hetym u Minsku ŭdałosia «namalavać» tolki 58,7%. Ciapier patrabavańni da minimalnaj jaŭki admianili, tamu nieabchodnaść u sklikańni vybarščykaŭ źniknie.
U čym pieravaha miascovych vybaraŭ, dyk heta ŭ tym, što jany dazvalajuć ubačyć zrez zarobkaŭ pa krainie. «Naša Niva» aznajomiłasia z dekłaracyjami staličnych kandydataŭ. Na jakich pasadach zarablajuć bolš, a na jakich mienš?
U dekłaracyjach ukazvajecca ahulnaja suma hadavoha dachodu. U jaho mohuć uvachodzić zarobak, piensija i stypiendyja, dachod ad prodažu kvatery ci aŭtamabila, dyvidendy ad akcyj. Dolu kožnaj z krynic praličyć niemahčyma, my praličvajem siaredni dachod za miesiac. Varta pamiatać, što kandydat u deputaty moh na praciahu hoda źmianiać miesca pracy.
Bahaciei i žabraki
Samyja bahatyja ŭ rejtynhu — pradprymalniki. Absalutny lidar śpisa — Andrej Ratasiep. Pavodle dekłaracyi, 33-hadovy biespartyjny IP-šnik štomiesiac mieŭ dachod pamieram $40,4 tysiačy! Ahułam — bolš za $2 miljony. Što praŭda, i vydatki ŭ jaho mahli być adpaviednyja. Z majomaści ŭ Ratasiepa jość tolki aŭtamabil.
Budaŭniki zarablajuć mienš, ale taksama žyvuć zamožna. Načalnik filijała budaŭničaha tresta №3 Michaił Makaranka štomiesiac mieŭ pa $11,3 tysiačy.
Dyrektar spartyŭna-azdaraŭlenčaha kompleksu «Alimpijski» Siarhiej Kazłoŭ štomiesiac zarablaŭ pa 53 miljony rubloŭ. Jon adzin ź niamnohich siabroŭ Biełaruskaj sacyjalna-spartyŭnaj partyi. Maje dva lehkaviki, a voś žylla niama.
Dyrektar «Minskaha chołada-kambinata №2» Alaksandr Rubinaŭ atrymlivaŭ pa 46 miljonaŭ. Ale ŭ jaho peŭny dachod mahli prynosić akcyi sietki kramaŭ «Žyvinka».
Samaja bahataja pradstaŭnica ŁDPB Natalla Bašura ciapier časova nie pracuje, ale letaś u siarednim za miesiac zarablała pa 43 miljony. Dapamahaje majomaść: u Natalli jość kvatera, składy i budynak kramy. A taksama 50% statutnaha fondu kampanii «Bikam servis».
Ihar Babok — namieśnik pa ideałohii na «Miłavicy». Dva hady tamu jon prabivaŭsia ŭ parłamient. Adnak pa jahonaj akruzie išoŭ staršynia pastajannaj kamisii pałaty pradstaŭnikoŭ Mikałaj Samasiejka, tamu Babku pakinuli tolki 16,7% hałasoŭ. Ciapier jon sprabuje prajści ŭ miascovyja saviety. Letašni dachod Babka składaŭ 41 miljon. Ale i bieź ich jon zamožny čałaviek: maje dźvie kvatery i dva lehkaviki. Jość i adna akcyja «Miłavicy».
A voś dyrektar aeraporta Dźmitryj Mielikian majomaści nie maje. Zatoje dachod — 37 miljonaŭ.
Dyrektar «Hałantei» Alaksandr Nabzdoraŭ atrymlivaŭ pa 35 miljonaŭ. Ale jamu dadatkovyja hrošy mahli prynosić 2500 akcyj jahonaha pradpryjemstva.
Z advarotnaha boku rejtynha tyja, chto nijakaha dachodu nie maje. Heta niekalki studentaŭ-płatnikaŭ, a taksama Siarhiej Vaźniak sa «Spraviadlivaha śvietu». Dziŭnaja situacyja: jon ličycca hałoŭnym redaktaram haziety «Tavaryš», ale pry hetym nijakich hrošaj nie zarablaje. Zusim. Choć, pavodle zakanadaŭstva, nie moža nie atrymlivać chacia b minimalny zarobak. Vybarčaj kamisii Vaźniak patłumačyŭ, što žyvie «za košt raniej naźbiranych srodkaŭ».
Biudžetniki
Ciapier da kankretnych prafiesij. Nastaŭniki, daktary i inšyja biudžetniki tradycyjna składajuć bolšaść miascovych savietaŭ. Kolki jany zarablajuć?
Pačniem ź piedahohaŭ. Šarahovych nastaŭnikaŭ siarod kandydataŭ niamnoha, pryčym abodva — kamunisty. Jany zarablali pa 5—6 miljonaŭ. Darečy, takim ža dachodam adznačyłasia pieršy sakratar rajkama BRSM Alesia Hromava.
Dyrektaraŭ škoł nabrałasia ź dziasiatak. Siaredni zarobak u ich składaje 8 miljonaŭ rubloŭ. U vyšejšaj adukacyi płaciać inšyja hrošy. Naprykład, rektar Mieduniviersiteta Anatol Sikorski moža pachvalicca 18 miljonami štomiesiac. A rektar Univiersiteta kultury Juryj Bondar — 23 miljonami.
U cełym dachody miedykaŭ vyšejšyja, čym u piedahohaŭ. U deputaty idzie dziasiatak hałoŭnych daktaroŭ haradskich paliklinik. Siaredni zarobak u ich — 12,5 miljona. U balnicach bolš. U Žanny Kazačonak (11-ja balnica) — 20 miljonaŭ.
Niekalki słovaŭ i pra inšych biudžetnikaŭ. Dyrektar Muzkamiedyi Alaksandr Piatrovič mieŭ pa 14 miljonaŭ. Hienieralny dyrektar chołdynha «Minsk-Naviny» Kaciaryna Dubinskaja mieła amal 19 miljonaŭ štomiesiac! Dla paraŭnańnia, namieśnik hienieralnaha dyrektara zvyšpaśpiachovaha «Amkadora» Alaksandr Nachajenka zarablaŭ 18 miljonaŭ.
A hienieralnaj dyrektarcy datacyjnaj «Biełpošty» Irynie Saksonavaj štomiesiac naličvałasia pa 25 miljonaŭ.
I pra znakamitaściaŭ. Internet-hieroju, hałoŭnamu redaktaru partyjnaj haziety «Kamunist Biełarusi» Žanu Sodelu płaciać 1,5 miljona.
Na vybary iduć i dva viadomyja apazicyjnyja kamunisty. Lidar «Spraviadlivaha śvietu» Siarhiej Kalakin zadekłaravaŭ štomiesiačny zarobak 12 miljonaŭ rubloŭ (jon atrymlivaje i piensiju), a jahony namieśnik Valeryj Uchnaloŭ — 7 miljonaŭ rubloŭ.
Komik Jaŭhien Kryžanoŭski z ŁDPB zarehistravany jak IP-šnik. Heta dazvalaje jamu štomiesiac mieć 30 miljonaŭ rubloŭ.
Kryminalnaje minułaje
Novaŭviadzieńnie hetaj vybarčaj kampanii — ukazvańnie raniejšych sudzimaściaŭ kandydataŭ. Heta nibyta musiła adšturchnuć vybarcaŭ ad apazicyjanieraŭ — spres «chulihanaŭ» i «arhanizataraŭ masavych biesparadkaŭ».
Chto z raniej asudžanych idzie ŭ deputaty? Siarod apazicyi — Artur Fińkievič i Dźmitryj Kaśpiarovič.
Siabra ŁDPB Valeryja Kiryjenkava, jaki ciapier pracuje ŭ ŽSK «Abaroniec», sudzili za machlarstva, niezakonnuju pradprymalnickuju dziejnaść i navat raskradańnie šlacham pieravyšeńnia słužbovych paŭnamoctvaŭ. Druhi ŁDPB-šnik, kiroŭca Alaksandr Šendryk, dvojčy byŭ asudžany za ŭchileńnie ad utrymańnia dziaciej. Treci siabar partyi, IP-šnik Mikałaj Šaciła, byŭ źviazany ź niezakonnym abarotam narkotykaŭ.
Prablemy z zakonam mieli i dvoje kamunistaŭ. Supracoŭnika BNTU Kazimira Jurojcia vinavacili ŭ chulihanstvie i supraciŭleńni rabotnikam milicyi, a zahadčyka składa «Jeŭraopta» Albierta Jerafiejenku — u chulihanstvie.