Złodziei viedajuć, dzie vy schavali svaje hrošy
Złodziei viarnulisia z adpačynku, na jakim patracili svaje złačynnyja kapitały i zaraz imknucca papoŭnić hrašovyja zapasy. U Miensku kolkaść kradziažoŭ uźlacieła ŭdvaja.
Złodziei viarnulisia z adpačynku, na jakim patracili svaje złačynnyja kapitały i zaraz imknucca papoŭnić hrašovyja zapasy. U Miensku kolkaść kradziažoŭ uźlacieła ŭdvaja.
Vosień. Biełaruskija kvaternyja złodziei («damušniki») viarnulisia ź ciopłych krajoŭ i z padvojenaj aktyŭnaściu ŭzialisia rabavać čužoje žyllo. Naprykład, kali ŭ Minsku zvyčajna štodzień fiksavałasia ŭ siarednim 9 złačynstvaŭ takoha kštałtu, to zaraz hety pakazčyk pavialičyŭsia bolš čym u 2 razy.
Jak patłumačyŭ namiesnik načalnika milicyi hramadskaj biaśpieki i śpiecyjalnaj milicyi HUUS Minharvykankama Raman Mielnik, vosieński pik aktyŭnasci «damušnikaŭ» maje svaju zakanamiernaść: złodziei padčas adpačynku patracili svaje złačynnyja kapitały i zaraz imknucca papoŭnić hrašovyja zapasy. Najčaściej ad «nabiehaŭ» kvaternych złodziejaŭ pakutujuć žychary «spalnych» mikrarajonaŭ i novabudoŭlaŭ, dzie rehistrujecca kožnaje treciaje takoje złačynstva.
Svaje lichija spravy złamysniki zvyčajna robiać u pracoŭnyja dni, u pieryjad z 8 da 16 hadzin. Raskryvalnaść hetych złačynstvaŭ składaje ŭsiaho kala 40 adsotkaŭ. Tamu našy suhramadzianie sami sprabujuć zaścierahčysia ad niaprošanych haściej.
Adny pieraŭtvarajuć svoj dom u krepaść z dapamohaj stalovych dźviarej, krataŭ, chitrych zamkoŭ, inšyja zdajuć žyllo pad milicejskuju achovu, niekatoryja addajuć pieravahu čatyrochnohim vartaŭnikam — sabakam bajcovych parodaŭ, a chtości stavić samarobnyja pastki. Słovam, biełaruski abyvaciel abaraniaje svajo žyllo ŭ mieru svaich finansavych mahčymaściaŭ, vynachodnickich zdolnaściaŭ i …kryminalnych schilnaściaŭ. Tak, niekatoryja haspadary leciščaŭ, ratujučysia ad bamžoŭ, padmiešvajuć u harełku ci inšyja spirtnyja napoi atrutu, staviać samastreły i niebiaśpiečnyja pastki, kanstrukcyi jakich pazajzdrosciŭ by i sam Kałašnikaŭ.
A voś dla zachoŭvańnia hrošaj i kaštoŭnych rečaŭ fantazii ŭ našych suhramadzian zusim nie chapaje. Biełaruskija abyvacieli, jak praviła, vybirajuć dla «tajnikoŭ» adny i tyja ž miescy ŭ svaich chatach i kvaterach. I złodziei ich dobra viedajuć. Tamu hrošy i kaštoŭnasci niaredka stanoviacca lohkaj zdabyčaj lichadziejaŭ.
«Rejtynh» samych papularnych miescaŭ zachoŭvańnia hrošaj u haradskich kvaterach vyhladaje nastupnym čynam. Najčaściej biełarusy chavajuć svaje kapitały ŭ skrynačkach šafaŭ, piśmovych stałoŭ, u kuferačkach, a taksama ŭ adzienni ci pad stosam bializny.
Krychu mienš papularnyja «tajniki» — knihi. Mnohija biełarusy miarkujuć čamuści, što złodziei — spres nievuki i chatniaja biblijateka ich nie zacikavić. Naadvarot, mienavita, ź pieratrusu toŭstych tamoŭ i ahladu haspadarskaha harderobu zvyčajna pačynajuć pošuk hrošaj niaprošanyja hosci.
Potym u pole zroku lichadziejaŭ traplajuć dyvany, naścienyja lusterki, karciny. Nie hrebujuć złamysniki i pošukam źbieražeńniaŭ u śmietnicach (voś užo sapraŭdy hrošy nie patychajuć), u bačku unitaza, u bankach dla krup, u ladoŭniach (niekatoryja biełarusy ŭ pramym sensie zamarožvajuć svaje kapitały razam ź miasam ci inšymi charčami), elektryčnych i hazavych plitach.
I ŭžo zusim niezrazumieła, na što spadziajucca haspadary kvater, jakija chavajuć hrošy ci juvielirnyja vyraby ŭ bytavoj technicy, aŭdyjo‑videaparatury. Bo hetyja kaštoŭnyja rečy złačyncy ŭsio roŭna vyniesuć, kab potym pierapradać.
Krychu inšy mientalitet ŭ viaskovych žycharoŭ. Pakolki pieravažnuju bolšaść sielskaha nasielnictva składajuć ludzi stałaha vieku, to i fantazija ŭ ich adpaviednaja.
U pryvatnasci, viaskoŭcy ličać ci nie samym nadziejnym miescam zachoŭvańnia hrošaj paścielnyja matracy. Mienavita tudy i zašyvajuć piensiju dziaduli i babulki.
Mnohija viaskovyja piensijaniery bolš daviarajuć słoikam. Schavaŭšy hrošy ŭ hetyja šklanyja jomistasci, jany potym, jak praviła, zakopvajuć svoj skarb u bulbianym sklepie ci chavajuć u chlavach i haražach.
Praŭda, niedaremna kažuć, što ŭ vioscy ŭsio i ŭsie navidavoku. Naprykład, adzin dziadula ź vioski Siemianovičy Uździenskaha rajona schavaŭ u haražy 10 miljonaŭ rubloŭ. Złodziej nočču prałamaŭ dach, zalez u budynak i vykraŭ źbieraženni piensijaniera.
Padobnaje złačynstva adbyłosia i ŭ vioscy Astrošycy Łahojskaha rajona. Tam niejki złamysnik patajemna prabraŭsia ŭ chatu 83‑hadovaj babuli i vynies 3,8 miljona rubloŭ, jakija byli schavany pad matracam.
Darečy, sioleta samaj bujnoj zdabyčaj złodziejaŭ u stalicy, pa źviestkach HUUS, byli hrašovyja źbieražeńni ŭ pamiery 35 tysiač dołaraŭ.