Pieršakłaśniki za dzień dvojčy paviedamlali ab «miniravańni» i pažary ŭ mietro
Minskija školniki 11 sakavika dvojčy paviedamlali niepraŭdzivuju infarmacyju pra niebiaśpieku ŭ mietro.
Jak paviedamili ŭ HUUS Minharvykankama, u pieršaj pałovie dnia pa telefonie milicyi 102 pastupili dva zvanki ź infarmacyjaj, jakaja tyčycca mietrapalitena. U abodvuch vypadkach paviedamleńni byli niepraŭdzivymi, a telefanavali školniki z roznych rajonaŭ horada.
Pieršy zvanok pastupiŭ u 9.26. Dziciačy hołas paviedamiŭ ab padrychtoŭcy vybuchaŭ u mietrapalitenie. Z ulikam maniery padačy infarmacyi i hołasu abanienta adrazu ž źjaviłasia sumnieńnie ŭ praŭdzivaści paviedamleńnia.
Tym nie mienš u mietrapalitenie byli ŭzmocnieny miery biaśpieki, a taksama byli vydzieleny dadatkovyja siły dla pravierki stancyj. Supracoŭniki milicyi raspačali pošuki taho, chto telefanavaŭ.
«Techničnyja mahčymaści dazvolili nam chutka vyznačyć numar abanienta i miesca, adkul pastupiŭ zvanok,
— raskazaŭ namieśnik načalnika adździeła apieratyŭna-dziažurnaj słužby HUUS Minharvykankama Siarhiej Sinievič. — My pravieryli infarmacyju i ŭstanavili, što z telefona baćki patelefanavaŭ pieršakłaśnik adnoj sa škoł Maskoŭskaha rajona stalicy, jaki ź siabrami vyrašyŭ takim čynam pažartavać».
Druhi taki zvanok pastupiŭ u milicyyju ŭ 12.22. I znoŭ dziciačy hołas paviedamiŭ ab niebiaśpiecy ŭ mietro. Na hety raz — ab pažary.
Milicyjaniery nieŭzabavie ŭstanavili asobu i hetaha abanienta. Karystalnikam telefona znoŭ akazaŭsia pieršakłaśnik z Zavodskaha rajona stalicy.
«Siońnia my majem dastatkova techničnych mahčymaściej, jakija dazvalajuć ustanaŭlivać takich «žartaŭnikoŭ», — adznačyŭ Sinievič. — Toje, što dzieci paličyli žartam, na samoj spravie karanaje dziejańnie, i adkazvać ciapier pryjdziecca ich baćkam. Jak minimum — heta važki štraf».
Jak paviedamili va ŭpraŭleńni achovy pravaparadku i prafiłaktyki HUUS, iłžeminioraŭ čaściej za ŭsio pryciahvajuć da administracyjnaj adkaznaści. Artykuł 17.6. KoAP (zaviedama niepraŭdzivaje paviedamleńnie) praduhledžvaje nakładańnie štrafu da 50 bazavych vieličyń (na siońnia — 6.500.000 rubloŭ). Asobna vyznačajecca materyjalny ŭron za pracu śpiecyjalnych słužbaŭ, jaki padličvajecca ŭ zaležnaści ad raźvićcia kožnaj kankretnaj situacyi.
Pryčym za ŭčynki svajho dziciaci pryjdziecca adkazvać jaho baćkam.
I tut darečy nahadać pra art. 9.4. KoAP (nievykanańnie abaviazkaŭ pa vychavańni dziaciej), jaki praduhledžvaje štrafnyja sankcyi da 20 bazavych vieličyń. Dzicia, akramia ŭsiaho inšaha, u abaviazkovym paradku pastaviać na śpiecyjalny ŭlik nie tolki ŭ škole, ale i ŭ milicyi, z usimi niehatyŭnymi nastupstvami.