U Łuhansku SBU zatrymała «narodnaha hubiernatara» Charytonava
U Łuhansku supracoŭniki Słužby biaśpieki Ukrainy zatrymali lidara «Łuhanskaj hvardyi» Alaksandra Charytonava, jakaja byŭ vyłučany siabrami hetaj arhanizacyi na pasadu «narodnaha hubiernatara» Łuhanskaj vobłaści.
Hetuju infarmacyju UNIAN paćvierdziła načalnik pres-centra SBU Maryna Astapienka, nie ŭdakładniŭšy padrabiaznaściaŭ.
Jak paviedamili krynicy ŭ pravaachoŭnych orhanach Łuhanskaj vobłaści, na dadzieny momant Charytonava ŭžo pierapravili ŭ Kijeŭskaje ŭpraŭleńnie SBU.
Charytonaŭ byŭ zatrymany pravaachoŭnikami ŭviečary ŭ čaćvier, 13 sakavika.
Miascovyja žurnalisty śćviardžajuć, što ŭčora lidara «Łuhanskaj hvardyi» zaprasili ŭ abłasnoje Upraŭleńnie SBU dla hutarki. Praź niekalki hadzin jaho adpuścili, i Charytonaŭ adpraviŭsia na sustreču ŭ kafe ŭ starym centry horada.
«Kali Charytonaŭ vyjšaŭ z kafe i pierajšoŭ darohu, da jaho i jaho znajomych na vialikaj chutkaści padjechaŭ ciomny mikraaŭtobus. Jon rezka zatarmaziŭ, i adtul vyskačyli niekalki čałaviek u čornaj uniformie, broniekamizelkach i maskach (jak miarkujecca, — bajcy hrupy «Alfa»). Jany skrucili Charytonava na vačach u jaho spadarožnikaŭ, kinuli ŭ mašynu i pavieźli», — paviedamlajuć ŚMI sa spasyłkaj na śviedak zatrymańnia, adznačajučy, što siarod śviedkaŭ byŭ taksama adzin z deputataŭ Łuhanskaj haradskoj rady.