MZS Rasii pahražaje «ŭziać pad abaronu ludziej» u Daniecku
Učora ŭviečary rasijskija šturmaviki napali na ŭdzielnikaŭ mitynhu za adzinstva Ukrainy ŭ centry Daniecka. Z krykami «Rasija» jany bili ŭkraincaŭ. Adzin čałaviek zahinuŭ ad nažavoha ranieńnia, 50 čałaviek było paraniena. Razhromleny aŭtobus milicyi, dzie sprabavali schavacca ŭkraincy.
Danieckaja milicyja pavodziła siabie pasiŭna, bajałasia vystupić suprać šturmavikoŭ. Hetyja padziei zafiksavanyja na videa.
Ministerstva ž zamiežnych spraŭ Rasii pierakruciła padziei tak, niby heta nie z krykami «Rasija» napadali, a naadvarot. I z nahody padziej u Daniecku pahražaje ŭmiašacca, kab «abaraniać ludziej ad hvałtu». Voś zajava rasijskaha MZS dasłoŭna.
«13 sakavika 2014 hoda ŭ Daniecku adbylisia trahičnyja padziei, praliłasia kroŭ. Na mirnych demanstrantaŭ, jakija pryjšli na vulicy horada, kab vykazać svajo staŭleńnie da destruktyŭnaj pazicyi ludziej, jakija nazyvajuć siabie ukrainskaj uładaj, napali pravaradykalnyja hrupoŭki, uzbrojenyja traŭmatyčnym zbrojaj i bitami, jakija napiaredadni pačali źjazdžacca ŭ horad ź inšych rehijonaŭ krainy. U vyniku sutyknieńniaŭ majecca vialikaja kolkaść paranienych, adzin čałaviek zahinuŭ», — havorycca ŭ zajavie.
Rasijskaje Ministerstva zamiežnych spraŭ zaklikała tych, chto pryjšoŭ da ŭłady ŭ Kijevie, lidaraŭ majdanu, razzbroić bajevikoŭ i zabiaśpiečyć biaśpieku nasielnictva. U advarotnym vypadku Rasija budzie abaraniać ludziej ad hvałtu.
«My nieadnarazova zajaŭlali, što ŭłady ŭ Kijevie pavinny razzbroić bajevikoŭ, zabiaśpiečyć biaśpieku nasielnictva i zakonnaje prava ludziej na praviadzieńnie mitynhaŭ. Na žal, jak pakazvajuć padziei va Ukrainie, hetaha nie adbyvajecca, kijeŭskija ŭłady nie kantralujuć situacyju ŭ krainie. Rasija ŭśviedamlaje svaju adkaznaść za žyćci suajčyńnikaŭ i suhramadzian va Ukrainie i pakidaje za saboj prava ŭziać ludziej pad abaronu», — padkreślivajecca ŭ zajavie MZS RF.
Ukraincaŭ-udzielnikaŭ mitynhu ŭ Daniecku było prykładna stolki ž, jak rasijskich šturmavikoŭ. Ale ŭkraincy byli pieravažna studenty piensijaniery, tady jak šturmaviki byli prafiesijna padrychtavanyja. Jany dziejničali pad rasijskim ściaham.
Padziei va Ukrainie i rasijskaja dezinfarmacyja ŭsio bolš nahadvajuć stanovišča vakoł Sudetaŭ, Aŭstryi i Polščy ŭ 1938-1939 hadach.