U Turcyi zabłakavali Twitter
Ułady Turcyi ŭ noč na piatnicu, 21 sakavika, zabłakavali dostup da servisu mikrabłohaŭ Twitter, paviedamlaje Hürriyet Daily News.
Turecki telekamunikacyjny rehulatar BTK zabłakavaŭ dostup u Twitter niezadoŭha da apoŭnačy. Pry sprobie zajści na sajt tureckich karystalnikaŭ pieranakiroŭvajuć da tekstu rehulatara, dzie cytujucca sudovyja rašeńni, jakija dazvalajuć błakavańnie.
Kampanija paraiła karystalnikam u Turcyi abychodzić zabaronu, publikujučy tvity z dapamohaj sms-paviedamleńniaŭ.
Błakavańnie Twitter adbyłosia praź niekalki hadzin paśla taho, jak z adpaviednaj zajavaj vystupiŭ premjer-ministr Turcyi Redžep Taip Erdahan. Na pieradvybarnym mitynhu prychilnikaŭ Partyi spraviadlivaści i raźvićcia (PSR) premjer zajaviŭ, što ŭ Turcyi «vykaranić» sacyjalnyja sietki, u tym liku Twitter, i što kiraŭnictva krainy nie chvaluje reakcyja mižnarodnaj supolnaści.
Raniej Erdahan zajaŭlaŭ pra mahčymaść błakavańnia Facebook i Youtube. Na Youtube u sakaviku apublikavali zapisy telefonnych pieramovaŭ nibyta pamiž premjeram i jaho synam, jakija abmiarkoŭvali ŭtojvańnie dziasiatkaŭ miljonaŭ jeŭra. Erdahan nazvaŭ zapis mantažom.
Vybary ŭ miascovyja orhany ŭłady ŭ Turcyi projduć 30 sakavika.