Ihar Białoŭ. Na niezaležnaść Ukrainy (rymejk)
…Majdan pieramoh u ciabie na vačach, a ty zastaŭsia takim samym, jakim i byŭ
Alena Hieorhijeŭskaja
Darahi rasijanin, bitvu kala hastranoma
Zahadzia ty prajhraŭ — navat nie vyjšaŭšy z komy.
Vočy choć zalivaj, choć raźbivaj vitryny —
Źnikła radzima ŭ ciabie, a pahatoŭ — Ukraina.
Byŭ bieź ciabie Majdan, ty nie stajaŭ tam zamierzły —
Ty karani puskaŭ doma va ŭtulnaje kresła,
Alimpijadaju ciešyŭ receptary niedalokija,
Štučnym chimičnym śnieham horła zatknuŭšy j lohkija.
Ciabie pachany tvaje pa samaje serca nadźmuli,
Jakoje ty ni razu nie padstaŭlaŭ pad kuli;
Snoŭ tvaich nie psavali kubamietry ahniu i dymu —
Što ž, kałupaj videlcam miazhu čarvivuju Kryma.
Miod nie sałodki tabie, što pa TV ad ranku —
Ty atrymaŭ pa zubach kijeŭskaj brukavankaj
Tam, dzie nad płoščaj uzimku, pa-nad kramaj i baram,
Sonca hareła ŭvieś čas prosta ŭ bienzinavaj páry.
Ty ž koliś bitnikam byŭ i vałacuham-aniołam,
Pracu lubuju rabiŭ — pjanym zaŭždy i viasiołym.
Pobač nie sieŭ by s…ć z haspadarami damiena —
Tymi, što vierać, što im mora Čornaje pa kalena.
Nu, a ciapier, kali ty ŭžo ŭ dva razy starejšy,
Rodnaj piachoty marš staŭ dla ciabie najmilejšy;
Viečny student-ananist, hetakim cichim paradkam,
Što ty pakinieš ciapier kachanym svaim i naščadkam?
…Ja heta kažu sabie j nanač hladžusia ŭ lusterka:
Cieni, jak trupnyja plamy, tam na vadzie nie mierknuć —
Moŭčki lažać jany na razvalinach čałavieka,
Śpisanaha ŭ tyraž na pačatku novaha vieku.
Maram, razmovam tym, pieśniami bardaŭ raskviečanym,
Ja zatykaju rot ciapier trykaloram skamiečanym.
Adno tolki šycht trymać staranna imknusia, tamu što
Ŭ žyłach maich strumienić spraŭna partviejn «Ałušta».
Špacyravać u šychcie, moža, i źniknie moda,
Pierš čym u łožku śmierć daść nam, «hierojam», nahodu
Ŭbačyć kaniec usiaho — času, ciarpieńnia, hrošaj,
Lekaŭ, daždžu j radkoŭ niečaj paemy charošaj.
Kab nam praćvierazieć, niejak ź ihołak źleźci
I manitory ślaźmi zdoleć pramyć narešcie,
Treba, kab naš karabiel — peŭna, što fiłasofski —
Puściła padłodka na dno z nazvaj «Iosif Brodski».
Pierakłaŭ z rasijskaj Lavon Barščeŭski.
***
Ihar Białoŭ (nar. u 1975 h. u Leninhradzie) — rasijski paet, siabra Ruskaha PEN-centra.