Eks-mer Homiela Pilipiec adkinuŭ u sudzie abvinavačvańni
U Mahilovie 25 sakavika atrymaŭ praciah sudovy praces pa spravie byłoha staršyni Homielskaha harvykankama Viktara Pilipca i šerahu inšych čynoŭnikaŭ, jakija abvinavačvajucca ŭ karupcyi.
17 sakavika prakuror Dzianis Kičyhin paśla amal paŭtaramiesiačnaha pierapynku krychu źmianiŭ vystaŭlenyja abvinavačvańni.
Zaraz padsudnym stavicca ŭ vinu niezakonnaje adčužeńnie z kamunalnaj ułasnaści 24 kvater, jakija zatym byli pradadzieny pa canie značna nižejšaj za rynkavuju ich svajakam i znajomym. Častka žyłych pamiaškańniaŭ była aformlena na padstaŭnych asob. Čynoŭnikam inkryminujecca častka 3 artykuła 424 Kryminalnaha kodeksa (złoŭžyvańnie ŭładaj ci słužbovymi paŭnamoctvami).
Pilipiec, jakomu dali mahčymaść na praciahu tydnia aznajomicca z abvinavačańniami, vinavatym siabie nie pryznaŭ. «Abvinavačańni nadumanyja, nieabjektyŭnyja, praduziatyja i hetak dalej. U ich niama nivodnaha słova praŭdy», — zajaviŭ padsudny.
Pavodle jaho słoŭ, kvatery, jakija fihurujuć u abvinavačańni, nie źjaŭlalisia i nie źjaŭlajucca kamunalnaj ułasnaściu. «Jany nie byli zarehistravanyja ŭ BTI jak abjekty nieruchomaści. Heta byli abjekty dolevaha budaŭnictva», — adznačyŭ Pilipiec.
Taksama jon admaŭlaje, što davaŭ svaim padparadkavanym daručeńni, jakija supiarečać zakonu.
Što da nabyćcia kvater dla siabie i svajoj dački, to, pavodle słoŭ Pilipca, jany abodva mieli patrebu ŭ palapšeńni žyllovych umoŭ.
Źviartajučysia da dziaržaŭnaha abvinavaŭcy, Viktar Pilipiec zajaviŭ, što budzie «vielmi rasčaravany», kali sud stanie na bok abvinavačańnia.
Jak paviedamlałasia raniej, Mahiloŭski abłasny sud pačaŭ razhlad kryminalnaj spravy ŭ dačynieńni da słužbovych asob Homielskaha harvykankama 4 listapada 2013 hoda. Na łavie padsudnych akramia Pilipca — dyrektar upraŭleńnia kapitalnaha budaŭnictva Homiela Ihar Adarčanka, jaho namieśnik pa ekanomicy i finansach Valeryj Barysievič, načalnik žyllova-inviestycyjnaha adździeła Antanina Zielanok i načalnik płanava-dahavornaha adździeła Ała Nizkoŭskaja. Pilipiec i Nizkoŭskaja ŭtrymlivajucca pad vartaj u Mahiloŭskim SIZA.