Napiaredadni Dnia Voli ŭ Minsku zatrymany nacboł Palijenka
24 sakavika ŭ Minsku zatrymany aktyvist nacyjanał-balšavickaha ruchu Dźmitryj Palijenka. Jon znachodzicca ŭ adździaleńni milicyi Zavodskaha rajona, paviedamiŭ jaho tavaryš Dzianis Sachar.
U čym abvinavačvajuć Palijenku, nieviadoma. Adnak, pavodle słoŭ Sachara, pry zatrymańni Palijenki supracoŭniki milicyi dali zrazumieć, što heta previentyŭnaje zatrymańnie pierad Dniom Voli, jaki aktyvisty apazicyi rychtujucca adznačyć viečaram 25 sakavika šeściem i mitynham u centry Minska.
Heta ŭžo druhoje zatrymańnie Palijenki za apošnija try dni. Jak paviedamiŭ Dzianis Sachar, Dźmitryj byŭ zatrymany ŭ minułuju subotu nibyta za naniasieńnie hrafici, i da 24 sakavika jaho ŭtrymlivali pad vartaj. U paniadziełak adbyŭsia sud, jaki vyrašyŭ pakarać aktyvista štrafam. Padrabiaznaści nieviadomyja, bo pa darozie damoŭ Palijenka byŭ zatrymany paŭtorna.
Varta adznačyć, što ŭ pačatku sakavika Dźmitryj Palijenka byŭ zatrymany i źbity supracoŭnikami Kastryčnickaha RUUS za naniasieńnie hrafici z antyŭradavymi łozunhami ŭ rajonie vulicy Majakoŭskaha ŭ Minsku.
Fatahrafija Dźmitryja sa śladami žorstkaha źbivańnia była razasłana ŭ redakcyi ŚMI i apublikavana ŭ internecie.
Palijenka zafiksavaŭ paboi i padaŭ skarhu na dziejańni supracoŭnikaŭ milicyi ŭ Śledčy kamitet. Tavaryšy Dźmitryja nie vyklučajuć, što mienavita hetaja skarha źjaŭlajecca pryčynaj pastajannaha nacisku na jaho z boku milicyi.