BDU pavialičyć pryjom za košt studentaŭ, što vučacca płatna
U 2014 hodzie Biełaruski dziaržaŭny ŭniviersitet (BDU) pavialičyć pryjom za košt studentaŭ, jakija vučacca płatna, paviedamiŭ rektar univiersiteta Siarhiej Abłamiejka na pres-kanfierencyi ŭ Minsku 25 sakavika.
Pavodle jaho słoŭ, pryjom na biudžetnuju dzionnuju formu źmienicca niaznačna. Płanujecca pryniać 2.045 čałaviek suprać 2.048 letaś, na zavočnuju biudžetnuju –– 350 (337 u 2014 hodzie). Akramia taho, na skaročanuju formu navučańnia (biudžet) prymuć 86 čałaviek (70 –– u 2013 hodzie).
Na dzionnuju płatnuju formu navučańnia, skazaŭ Abłamiejka, prymuć 2.723 čałavieki (u 2013 hodzie — 2.514), a na zavočnuju — 1.925 (u 2013 hodzie — 1.931).
Takim čynam, na biudžetnuju formu navučańnia sioleta prymuć 2.481 čałavieka, a na płatnuju — 4.648 (u 2013 hodzie — 2.455 i 4.445 adpaviedna). Ciapier u BDU vučacca 31.019 studentaŭ i mahistrantaŭ, amal dźvie traciny — na płatnaj asnovie.
Va ŭniviersitecie pavialičvajecca lik zamiežnych studentaŭ –– 2.620 u 2013 hodzie suprać 2.305 u 2012-m. Bolšaść zamiežnych studentaŭ (53,3%) –– vychadcy z krain SND, 41,8% — z Azii, 3,6% — z krain Jeŭropy, 1% — z Afryki.
Pavodle słoŭ rektara, za apošnija piać hadoŭ u BDU adkryta padrychtoŭka pa 22 śpiecyjalnaściach i 33 kirunkach, a abnaŭleńnie śpiecyjalnaściaŭ skłała 30%. Sioleta novyja śpiecyjalnaści nie źjaviacca, ale adkryjucca dva novyja kirunki śpiecyjalnaści «Matematyka i infarmacyjnyja technałohii» na miechanika-matematyčnym fakultecie: «Veb-prahramavańnie i internet technałohii», «Matematyčnaje i prahramnaje zabieśpiačeńnie mabilnych pryład».