Na Minščynie vyrasła kolkaść zabojstvaŭ
Najčaściej zabivajuć mužčyny svaich znajomych abo svajakoŭ
Na siońniašni dzień u Minskaj vobłaści adznačajecca značny rost zabojstvaŭ i faktaŭ naŭmysnaha pryčynieńnia ciažkich cialesnych paškodžańniaŭ. Najbolš časta takija złačynstvy ŭčyniajucca ŭ sielskaj miascovaści i bujnych haradach, paviedamiŭ staršy pamočnik prakurora vobłaści Uładzimir Niepakupny.
Pavodle jaho słoŭ, učynieńniu 75% takich złačynstvaŭ papiaredničaje ŭžyvańnie śpirtnych napojaŭ. Raniej sudzimymi asobami ŭčyniajecca kožnaje 3-je zabojstva i kožnaje 4-je ciažkaje cialesnaje paškodžańnie. Z ahulnaha liku asob, jakija ŭčynili zabojstvy i nanieśli ciažkija cialesnyja paškodžańni, 55% nidzie nie pracavali i nie vučylisia.
Najbolš typovy dla Minskaj vobłaści sacyjalny partret zabojcy — heta mužčyna va ŭzroście ad 25 da 50 hadoŭ, nidzie nie pracuje, złoŭžyvaje śpirtnymi napojami, źjaŭlajecca znajomym abo svajakom achviary.
Bolš jak u pałovie vypadkaŭ mieła miesca sumiesnaje spažyvańnie śpirtnych napojaŭ paciarpiełym sa złačyncam niezadoŭha da ŭčynieńnia złačynstva na hlebie niepryjaznych adnosin pa namiery, jaki ŭźnik raptam i nieadkładna byŭ realizavany.
Kožnaje čaćviortaje zabojstva i ciažkaje cialesnaje paškodžańnie ŭčyniajuć žančyny.
Asnoŭnyja pryčyny ŭčynieńnia zabojstvaŭ i pryčynieńnia ciažkich cialesnych paškodžańniaŭ, pavodle słoŭ pradstaŭnika prakuratury, — heta ŭstojlivyja asacyjalnyja pavodziny, złoŭžyvańnie ałkaholem, niežadańnie asobnych katehoryj hramadzian zajmacca hramadska-karysnaj pracaj, źmiena nie ŭ lepšy bok maralnych aryjenciraŭ.
«Takoje stanovišča <…> nie źjaŭlajecca časovym. Spadziavacca na toje, što praź niekatory čas złačynstvy hetaha vidu spyniacca sami pa sabie, pa mienšaj miery nierazumna i biezadkazna», — kanstatavaŭ staršy pamočnik prakurora vobłaści.
Nieabchodna na stałaj asnovie pravodzić pracu pa svoječasovym vyjaŭleńni biespracoŭnych asob, jakija złoŭžyvajuć śpirtnymi napojami, dla praviadzieńnia ŭ dačynieńni da ich indyvidualnych prafiłaktyčnych mierapryjemstvaŭ, praduhledžanych zakanadaŭstvam.
Daloka nie apošniuju rolu ŭ baraćbie sa złačynnaściu, adznačyŭ Napakupny, «adyhryvaje i nieciarpimaść hramadstva da pjanstva, narkamanii i ŭtrymanstva».