U Babrujsku haładoŭniki skončyli trochdzionnuju akcyju pratestu
Babrujskija haładoŭniki: Nas chočuć zahnać u stojła
Na Babrujskim zavodzie traktarnych detalaŭ i ahrehataŭ siabry supołki Svabodnaha prafsajuzu Biełaruskaha zaviaršyli trochdzionnuju haładoŭku pratestu.
Ad administracyi pradpryjemstva jany patrabavali spynić pieraśled pracaŭnikoŭ za prynaležnaść da niezaležnaha prafsajuzu. Akcyju pratestu padtrymali kala stankoŭ 10 pracoŭnych. Kala prachadnoj haładaŭ staršynia supołki Michaił Kavalkoŭ, jakoha nie puskali na zavod. Try dni aktyvist žyŭ la prachadnoj u svajoj mašynie. Akcyju pratestu padtrymlivajuć i dvoje zvolnienych raniej z zavodu pracaŭnikoŭ, jakija zastalisia siabrami niezaležnaha prafsajuzu.
Pavodle haładoŭnikaŭ, administracyja zavodu pakinuła ŭsich siabroŭ niedziaržaŭnaha prafsajuzu biaz premijaŭ dy sacyjalnych vypłat, vysieliła z pamiaškańnia, jakoje zajmaŭ Svabodny prafsajuz u budynku zavodakiraŭnictva, i zablakavała staršyni supołki dostup na terytoryju zavodu.
Haładoŭniki ličać, što svajoj akcyjaj pratestu jany pryciahnuli ŭvahu hramadzkaści da prablemaŭ, jakim im čynić administracyja zavodu. Jany zajaŭlajuć, što heta była asnoŭnaja meta ichnaj haładoŭki.