Kiraŭnik MZS Niamieččyny admoviŭ Ukrainie ŭ pierśpiektyvie siabroŭstva ŭ NATA
Ministr zamiežnych spraŭ Hiermanii Frank-Valter Štajnmajer nie bačyć pierśpiektyŭ dałučeńnia Ukrainy da NATA, ale zajaŭlaje, što niamiecki ŭrad jašče nie pryniaŭ svajoj aficyjnaj pazicyi pa hetym pytańni.
Pra heta paviedamlaje RAR sa spasyłkaj na zajavu ministra paśla siońniašniaj sustrečy z kalehami z Polščy i Francyi ŭ ramkach niefarmalnaha forum Viejmarskaha trykutnika.
«Mahu sabie ŭjavić formy bolš intensiŭnaha supracoŭnictva z Ukrainaj u ramkach Savieta NATA- Ukraina. Ale nie baču mahčymaści siabroŭstva ŭ NATA», — skazaŭ Štajnmajer, adznačyŭšy, što heta jaho asabistaje mierkavańnie.
Pavodle słovaŭ ministra, jaho paradavała zajava kiraŭnika ŭkrainskaha ŭrada Arsienija Jacaniuka, jaki sam «ź vialikaj aściarohaj» kazaŭ pra pierśpiektyvy ŭstupleńnia Ukrainy ŭ NATA.
Štajnmajer taksama nahadaŭ niadaŭnija słovy prezidenta ZŠA Baraka Abamy ab tym, što Ukraina «ciapier nie znachodzicca na šlachu, jaki viadzie ŭ NATA».
Aceńvajučy situacyju va Ukrainie, Štajnmajer skazaŭ, što ŭbačyŭ «małyja prykmiety deeskałacyi», źviarnuŭšy uvahu na pačatak pracy misii ABSIE i advod častki rasijskich vojskaŭ ad miežaŭ z Ukrainaj.