Kitajanka stała pieršaj pryhažuniaj BDU
U Minsku prajšoŭ konkurs «Miss International BSU — 2014»
Fota: Volha Šukajła, TUT.BY
U Minsku adbyŭsia konkurs pryhažości studentak BDU «Miss International BSU - 2014». Dziesiać pradstaŭnic z roznych krain zmahalisia za zvańnie samaj pryhožaj. Dziaŭčyny raskazvali pra siabie, defilavali, tancavali, śpiavali i navat malavali.
U siaredzinie lutaha prajšoŭ kastynh, dzie byli adabranyja dziesiać udzielnic konkursu. Paŭtara miesiaca dziaŭčaty z Azierbajdžana, Armienii, Kazachstana, Kitaja i Turkmienistana rychtavalisia da «Miss International BSU — 2014».
U baraćbie za zvańnie najlepšaj treba było prajści niekalki vyprabavańniaŭ: dva defile, viktarynu i tvorčy konkurs.
Konkurs pačaŭsia z pradstaŭleńnia ŭdzielnic. Potym byŭ nastupny etap konkursu — viktaryna. Dziaŭčaty z roznych fakultetaŭ raskazvali pra svaje chobi, płanach na budučyniu, adukacyju. Naprykład, Avadan Kurthieldyjeva z Turkmienistana skazała, što choča pavieźci čaścinku Biełarusi ŭ rodnuju krainu. Lu Čan z Kitaja raspaviała ab zachapleńni kunh-fu i kumira Džeki Čana, turkmienka Chatydža Čaryjeva padzialiłasia, što dla jaje značyć tvorčaść.
Kaciaryna Bandarenka z Kazachstana, studentka fakulteta radyjofiziki i kampjutarnych technałohij, raspaviała, čamu vybrała hety fakultet:
«Ja rodam z Kazachstana. Jak viadoma, kazachi zdaŭna kačavali. Jany nie spynialisia nadoŭha na adnym miescy. Jany ŭvieś čas byli ŭ pošuku, u ruchu. Napeŭna, hetaja rysa prodkaŭ praz stolki pakaleńniaŭ pieradałasia mnie. Ja zaŭsiody adkryta dla novych viedaŭ. Navošta zacyklivacca na niečym adnym, bo ŭ śviecie stolki ŭsiaho cikavaha. Sens žyćcia — u tym, kab atrymlivać ad usiaho zadavalnieńnie, być ščaślivaj, niahledziačy ni na što».
Kitajanka Čžan Łej, studentka adździaleńnia rasiejskaj movy fiłałahičnaha fakulteta BDU, vučycca ŭ Minsku druhi siemiestr. Dziaŭčyna padzialiłasia svaimi ŭražańniami ad krainy:
«Pierad tym, jak jechać u Biełaruś, ja krajem vucha čuła, što ŭ Biełarusi jość bolš za tysiaču sposabaŭ hatavać bulbu. Ja była ździŭlenaja. Mnie stała cikava, što heta za kraina».
«Sapraŭdy, tym, chto pryjazdžaje ŭ inšuju krainu, pieršy čas vielmi ciažka pryzvyčaicca, tamu što kultura i zvyčki krain mocna adroźnivajucca. Ale vykładčyki i siabry ŭ Biełarusi dapamahli chutčej adaptavacca. Mnie padabajecca, što ŭ Minsku zaŭsiody jość dzie pahulać, šmat parkaŭ. Ja mahu schadzić u teatr, na vystavu. Škada, što zusim chutka mnie pryjdziecca źjechać ź Biełarusi. Ale kali budzie mahčymaść, ja abaviazkova viarnusia ŭ Biełaruś, vučycca abo pracavać», — kaža studentka.
Dva hady tamu konkurs « Miss International BSU» prachodziŭ ŭpieršyniu. U im prymali ŭdzieł dziaŭčaty ź Nihieryi, Turkmienistana, Kitaja i Japonii. Pieramožcaj stała pradstaŭnica Turkmienistana.
Bolš za ŭsio emocyj i ździŭleńnia u hledačoŭ vyklikaŭ tvorčy konkurs. Dziaŭčaty tančyli, śpiavali na roznych movach, ihrali na tradycyjnych muzyčnych instrumientach, čytali manałohi, malavali Merylin Manro.