Rejs MN370: samy składany pošuk u historyi
Pošuk źnikłaha samalota Malaysia Airlines, jaki ździajśniaŭ rejs MH370 — «samy składany ŭ historyi», zajaviŭ kaardynatar pošukavaj apieracyi hałoŭny maršał avijacyi Aŭstralii Anhus Chjustan.
Pavodle jaho słovaŭ, pošuk samalota abo jaho abłomkaŭ moža zaniać jašče niekalki tydniaŭ.
Samalot źnik 8 sakavika na šlachu z Kuała - Łumpura ŭ Piekin. Na jaho borcie znachodziłasia 239 čałaviek.
U apošni čas pošuki viaducca ŭ paŭdniovaj častcy Indyjskaha akijana. Raniej užo zajaŭlałasia, što heta samaja darahaja apieracyja pa pošuku źnikłaha samalota ŭ historyi.
U aŭtorak ułady Małajzii apublikavali poŭny tekst pieramovaŭ dyśpietčaraŭ aeraporta Kuała -Łumpur ź piłotami avijałajniera. Pavodle ich słovaŭ, ništo ŭ hetym tekście nie namiakaje na nieardynarnuju situacyju na borcie samalota.
Chjustan, jaki ŭznačalvaje niadaŭna stvorany Sumiesny kaardynacyjny centr pošukaŭ (JACC) zajaviŭ, što składanaść apieracyi tłumačycca adsutnaściu dakładnaj infarmacyi, jakaja b rastłumačyła, što ž adbyłosia.
U pryvatnaści, niama infarmacyi pra toje, na jakoj vyšyni lacieŭ samalot, kali jon źnik z ekranaŭ radaraŭ. Adnosna nievialikaja karekcyja vyšyni palotu surjozna adbivajecca na chutkaści i spažyvańni paliva. U vyniku praź siem hadzin palotu rajon mahčymaha padzieńnia samalota stanovicca vielmi vialikim.
Pošuki mohuć zaniać jašče šmat času. «Zusim nie harantavana, što hetaja apieracyja zavieršycca, skažam, praz dva tydni», - skazaŭ Anhus Chjustan.
Rejs MN370: što my viedajem
8 sakavika: rejs MH370 niečakana źnik z ekranaŭ radaraŭ, kali ništo nie pakazvała na katastrofu.
Sistema suviazi «Boinha» ź ziamloj była adklučanaja na vychadzie z pavietranaj prastory Małajzii. Dadzienyja spadarožnikaŭ śviedčać, što samalot praciahvaŭ lacieć praź siem hadzin paśla adklučeńnia suviazi.
24 sakavika: ułady Małajzii zajavili, što «biez sumnieńniaŭ» samalot upaŭ u paŭdniovaj častcy Indyjskaha akijana i tych, chto vyžyŭ niama.
Dziesiać vajennych samalotaŭ i dzieviać karabloŭ ŭdzielničali ŭ pošukavaj apieracyi ŭ aŭtorak. U zonu pošukaŭ nakiravany karabiel aŭstralijskaha VMF, abstalavany rechałotam, pryznačanym dla vyjaŭleńnia padvodnych abjektaŭ.
Prajšło ŭžo try tydni z tych časoŭ, jak rejs MH370 biasśledna źnik. Ułady Małajzii śćviardžajuć, što pavodle dadzienych, atrymanych sa spadarožnikaŭ, jaho varta šukać u paŭdniovaj častcy Indyjskaha akijana.
Niedavier svajakoŭ
Miž tym, svajaki pasažyraŭ źnikłaha «Boinha» patrabujuć dokazaŭ taho, što samalot sapraŭdy paciarpieŭ katastrofu i raźbiŭsia. Mnohija ź ich złavalisia niedachopam infarmacyi, jakaja pastupaje ad małajzijskich uładaŭ. Dziesiatki svajakoŭ 153 pasažyraŭ samalota z Kitaja pryjechali ŭ Kuała -Łumpur, patrabujučy adkazaŭ.
U paniadziełak uviečary ŭłady Małajzii apublikavali novuju viersiju źniknieńnia suviazi z samalotam. U zajavie uładaŭ havorycca, što apošnimi słovami piłotaŭ było: «Dabranač. Małajzijski try-siem-nul». Raniej jany zajaŭlali, što apošnimi słovami było: « Usio dobra, dabranač». Niezrazumieła, čamu hetaja infarmacyja źmianiłasia.
Mnohija členy siemjaŭ pasažyraŭ samalota vinavaciać ułady Małajzii ŭ niekampietentnym viadzieńni rasśledavańnia, i padobnyja ŭdakładnieńni bolš rańnich zajaŭ tolki ŭzmacniajuć niedavier.