Biełarusam pierastanuć davać kredyty biez daviedki ab dachodach
Pačynajučy z 7 krasavika 2014 h. banki Biełarusi mohuć admović klijentam u niekatorych vidach kredytaŭ, pry adsutnasci ŭ ich daviedki ab dachodach, paviedamlaje Myfin.by.
«Pakul dakumient nie prajšoŭ aficyjnuju praceduru rehistracyi ŭ Miniuście — heta prajekt dakumienta, tamu pra jaho kankretny źmiest i pra terminy ŭstupleńnia jaho ŭ dziejańnie, kazać zaŭčasna», — adznačyli va ŭpraŭleńni infarmacyi i hramadskich suviaziaŭ Nacyjanalnaha banka.
Pavodle infarmacyi adnaho z bankaŭ, jaki śpiecyjalizujecca na ekspres-kredytach, u samy bližejšy čas biełaruskija banki raźvitajucca z kredytami biez daviedak ab dachodach. Da kanca hetaha tydnia kredytnyja pradukty buduć vydavacca na raniejšych umovach. Z paniadziełka, 7 krasavika, klijenty niekatorych bankaŭ, jakija pretendujuć na atrymańnie kredytu, buduć abaviazany mieć pry sabie dakumient, jaki paćviardžaje ŭzrovień zarabku.
«Sapraŭdy byŭ list Nacyjanalnaha banka i Asacyjacyi biełaruskich bankaŭ ab tym, što rychtujecca takoha kštałtu miera, i zhadvałasia data pieradačy dakumienta ŭ Ministerstva justycyi — 6 sakavika», — paviedamlaje kiraŭnik adnaho z bankaŭ. Kali termin zaćviardžeńnia padobnych dakumientaŭ zvyčajna nie pieravyšaje adnaho miesiaca, to varta čakać, što z 7 krasavika mnohija banki Biełarusi pierastanuć vydavać kredyty nasielnictvu biez daviedki ab dachodach.
Adnak dakładnaj daty, kali ad słoŭ piarojduć da spravy, pakul niama. U pryncypie prajekt dakumienta mohuć viarnuć Nacyjanalnamu Banku dla dapracoŭki. U takim vypadku terminy ŭstupleńnia ŭ zakonnuju siłu mohuć być adkładzienyja na bolš doŭhi termin.
Chutčej za ŭsio, ad novaŭviadzieńniaŭ pacierpiać nievialikija finansavyja struktury, jakija vydajuć «chutkija » kredyty prama ŭ handlovych kropkach dla nabyćcia bytavoj techniki.
Čutki pra toje, što banki pierastanuć vydavać kredyty biez daviedki ab dachodach, źjavilisia jašče ŭ lutym. Tady bankiry kazali, što ŭ Nacbanku abmiarkoŭvajuć uviadzieńnie takoj miery jak abaviazkovaj. Miž tym, u Nacbanku tady padkreślivali, što rekamiendacyj ab uzmacnieńni žorstkaści patrabavańniaŭ da vydačy kamiercyjnymi bankami kredytaŭ fizičnym asobam nie davali. Ale nie vyklučyli, što ŭ dalejšym rehulatar moža prymać rašeńni ab umovach kredytavańnia fizičnych asob, aryjentujučysia na situacyju na valutna-finansavym rynku krainy.