Sanatoryj «Biełaruś» u Krymie skardzicca na adsutnaść turystaŭ
Biełarusy nie zmohuć dabracca samalotami ŭ Krym, u tym liku i ŭ ajčynny sanatoryj «Biełaruś» u Mischory.
«Kali adnoviacca rejsy da Simfieropala, nieviadoma. Hetaha nie zdarycca, pakul pavietranaja prastora nie budzie adkrytaja», — paviedamili ŭ daviedačnaj słužbie RUP «Nacyjanalny aeraport Minsk».
Ciapier biełarusy zmohuć adpravicca ŭ Krym tolki naziemnym transpartam. Ciahniki i aŭtobusy prybyvajuć na paŭvostraŭ pa raskładzie, biez zatrymak. Na sajcie Biełaruskaj čyhunki raskład ciahnikoŭ u bok Kryma taksama nie źmianiŭsia.
Praŭda, sanatoryju «Biełaruś» heta pakul nie dapamahaje. Jon zaraz zapoŭnieny tolki na 4%, a ŭ minułym hodzie było 100%. Jak akazałasia, biudžetnyja pucioŭki sanatoryja na druhi kvartał u Biełarusi nie raspaŭsiudžvalisia. Bo 90 % naviedvalnikaŭ sanatoryja — heta biełarusy, tym bolš, viasnoj robicca staŭka mienavita na biudžetnikaŭ. Pakul nie prajaśniłasia situacyja i ź letnim siezonam, choć asnoŭnyja pucioŭki branirujuccpa mienavita na lipień-žnivień.
«Da hetaha času dziejničaje ŭkaz MZS Biełarusi, jaki nie rekamienduje svaim hramadzianam ŭjezd na terytoryju Kryma. My vielmi pakutujem z-za hetaha, choć hatovyja prymać ludziej i my ich prymajem», — paviedamiła partału mieniedžer pa zbycie sanatoryja «Biełaruś» Natalla Trušnikava.
«Na hety siezon pastupajuć adzinkavyja zajaŭki, ale jany nie ź Biełarusi, a z Rasii. Adnaznačna, zvankoŭ z Rasii stała značna bolš, a z Ukrainy zaraz telefanujuć adzinki. A tak u nas ničoha nie źmianiłasia: viasna, ciopła, aślaplalnaje sonca — usio, jak i raniej, nijakich biesparadkaŭ », — dadała Natalla.
Nie źmianilisia i ceny na pucioŭki: $ 50-80 z čałavieka za sutki. Praŭda, u sanatoryi nie vyklučajuć, što ceny mohuć vyraści, bo taryfy na elektraenierhiju ŭ Krymie padvysiacca da rasijskaha ŭzroŭniu.
«Košty mohuć źmianicca. U stratu pracavać my adnaznačna nie zmožam, ale ŭ nas jość pucioŭki, na jakija damovy ŭžo zaklučanyja. My atrymali apłatu, i košty na ich, viadoma, nie padnimucca», — raspaviała Natalla Trušnikava.
Varta adznačyć, što žadajučyja adpačyć u Krymie zmohuć raspłačvacca jak hryŭniami, hetak i rasijskimi rublami. Asnoŭnyja raźliki i pakupki ŭ kramach ździajśniajucca jašče ŭ hryŭniach, ale piensii i sacyjalnyja dapamohi vypłačvajucca ŭžo ŭ rublach. Krymčanie pastupova pierachodziać na rasiejskuju valutu.