Pavyšeńnia zarobku vychavalnicy dziciačaha sadu chopić na prajazny
Na kolki padaražeła žyćcio vychavalnicy dziciačaha sadka z ŭlikam pavyšeńnia zarobku i koštaŭ?
1 krasavika dla 24-hadovaj vychavalnicy staličnaha sadka № 187 Jany byli dźvie naviny — pryjemnaja i niepryjemnaja: padnialisia zarobki, a razam z zarobkami — košty na prajezd, cyharety dy štrafy.
Ličym, nakolki padaražeła ci, moža, patańnieła žyćcio. Učora dziaŭčyna atrymała na ruki cetlik z zarobkam za sakavik — 4 miljony 56 tysiač rubloŭ:
«…Heta z ŭlikam taho, što ja pracavała pa niekalki dzion pa dźvie źmieny, zamianiała niańku. Siońnia źbirajusia raźbiracca z zahadčycaj, bo zvyš normy patrebna naličvać pa dvajnym taryfie, a atrymlivajecca, što my normu pracavali», — kaža dziaŭčyna.
Jana kuplaje prajazny na adzin vid transparta, choć patrebna dva — tralejbus dy mietro. Heta minus 166 tysiač rubloŭ zarobku. Raniej možna było nabyć taki prajazny na 31 tysiaču tańniej.
«Vyrašyła, što budzie prajazny na mietro, a ŭ tralejbusach — «zajcam». Nabyła niekalki kvitkoŭ i jezdžu «zajcam», — pryznajecca dziaŭčyna.
Kali schopiać kantralory, jaje kašalok apuścieje na 75 tysiač rubloŭ. Štraf za bieźbiletny prajezd pavysiŭsia na 15%, bo vyrasła bazavaja vieličynia. Vychavalnica pakul nie traplała na kantraloraŭ. Heta dobra.
Padaražeńnie kvitkoŭ na čyhuncy na 30% Janu nie mocna turbuje — da rodnaha Słucka chodzić maršrutka, jakaja pakul što kaštuje 55 tysiač rubloŭ u adzin bok. Dadomu dziaŭčyna jeździć zredku.
Jašče kala 170 dołaraŭ sychodzić u Jany na apłatu zdymnaha žylla, a taksama kamunalnyja płaciažy — dziaŭčyna zdymaje kvateru razam z bratam. Bolej za ŭsio Janu pałochajuć rost koštaŭ na prajezd dy kamunalnyja pasłuhi. A voś padaražeńnie cyharet — z 1 krasavika košty vyraśli na 11% — dziaŭčynu nie turbuje.
«U mianie pačka sychodzić za dni čatyry. Nabyvaju cyharety za 16500 rubloŭ, nadoŭha chapaje. Sprabavała kinuć kuryć, ale nie tamu, što raście košt, a prosta, bo treba», — kaža dziaŭčyna. Na miesiac na paliva dziaŭčyna vydatkoŭvaje mieniej za 130 tysiač rubloŭ. Jak na prajazny!
Štodzionnyja vydatki ŭ kramie — kala 80 tysiač rubloŭ. Zvyčajnyja pradukty: majanez, piekinskaja kapusta, pialmieni — z čym nie treba zamaročvacca. Jość ŭ hrafie vydatkaŭ na ježu bonusy:
«Inšym časam hatuje brat — jon u mianie vielmi kłasna hatuje — ja ŭvohule tady ničoha nie vydatkoŭvaju. Na pracy niedarahaja kulinaryja — tam draniki, pierakusy ŭsialakija», — dziaŭčyna zaŭvažaje, što heta, u pryncypie, i ŭsie jaje vydatki. Na vopratku tolki ŭsio roŭna nie chapaje. Dapamahajuć baćki. Pytajusia ŭ Jany, kali jana kuplała sabie niešta bujnoje, dziaŭčyna śmiajecca.
«Biez padtrymki baćkoŭ było b niemahčyma — vopratku, boty niejkija — heta ŭsio praz baćkoŭ. Telefon padaryli. Ale zaraz budu stavić ŭltymatum: ci ja pracuju niejak pa hrafiku ŭ sadku, ci nie. Bo chaču znajści padpracoŭku — inakš nijak, a na šyi siadzieć baćkoŭ nie vielmi».
Navina pra pavyšeńnie staŭki pieršaha razradu ad 1 krasavika na 2 tysiačy rubloŭ (na 0,77%), a taksama 10% pavyšeńnie akładu vychavalnicu navat aburaje.
Pry jaje padlikach, akład vychavalnika biez kvalifikacyi razam z tymi 10% i staŭkaj pieršaha razradu pavysicca na 150 tysiač rubloŭ! Ličy — na prajazny!
Navat nie paśpiavaju zakončyć pytańnie, ci abraduje Janu padvyšeńnie, dziaŭčyna niervujecca:
«Voś abmiarkoŭvajuć paŭsiul, što kali baćki buduć 100% apłačvać charčavańnie dziciaci, vychavalniki pabahaciejuć. Łuchta! Toje, jak na nas jeździać, i toje, jak my zarablajem, — nie suadnosna. My nie vałanciory!»