Va Ukrainie praviaduć lustracyju sudździaŭ
Pryniaćcio zakonu «Ab adnaŭleńni davieru da sudovaj ułady Ŭkrainy» siońnia pavitaŭ premjer-ministar krainy Arsień Jacaniuk. Na jaho dumku, heta važny krok da adnaŭleńnia niezaležnaści sudovaj systemy.
Pavodle zakonu pryniataha Viarchoŭnaj radaj 8 krasavika, stvarajecca časovaja kamisija, jakaja budzie pravodzić pravierku sudździaŭ, jaki padazrajucca ŭ tym, što ŭ svaich rašeńniach nie kiravalisia vyklučna zakonam. Tak, pravierku musiać prajści sudździ, što prymali rašeńni pra abmiežavańnie pravoŭ hramadzian na mitynhi i schody ŭ peryjad ad 21 listapada da momantu pryniaćcia zakonu abo prysudžali udzielnikaŭ akcyj da administracyjnych pakarańniaŭ; pasłali za kraty ludziej, jakija byli pryznanyja palitźniavolenymi i h. d.
Za zakon prahałasavała 234 deputataŭ pry 226 nieabchodnych hałasach. Jon nabyvaje moc na nastupny dzień paśla jaho apublikavańnia. Ustanaŭlivajecca taksama, što novyja sudovyja orhany buduć farmavacca ŭ adpaviednaści z hetym zakonam.
Raniej pradstaŭniki sudovych orhanaŭ zaklikali deputataŭ ustrymacca ad paskoranaha pryniaćcia zakonu. U pryvatnaści sudździa viarchoŭnaha sudu Ŭkrainy Vasil Anapienka zajaviŭ, što pravierka sudździaŭ moža prachodzić na patrabavańnie hramadzianskaj supolnaści, adnak jaje pavinny pravodzić orhany, praduhledžanyja Kanstytucyjaj i zakanadaŭstvam. Anapienka vykazaŭ pieraściarohu, što novaja kamisija abmiažujecca zvalnieńniem sudździaŭ, što razhladali spravy ŭdzielnikaŭ pratestaŭ i heta, na jaho dumku, «kinie sudovuju systemu Ŭkrainy ŭ chaos».