Imperiya.by publikuje instrukcyi dla prarasijskich sieparatystaŭ
Karotkaja instrukcyja składajecca ź dziesiaci punktaŭ. Jana skiravanaja da žycharoŭ uschoda i poŭdnia Ukrainy. Tłumačycca, što najpierš treba rabić, kab hetyja rehijony adyšli da Rasii. Voś hetyja instrukcyi.
«1. Utvaryć Rady ŭ rehijonach, jakija buduć «pryznanyja zakonnym orhanam paŭstancaŭ u rehijonach na mitynhach siońnia ž». Davieru zdradnikam i pamahatych z abłsavietaŭ i harsavietaŭ nijakaha nie akazvać. Usie paŭnamoctvy, nici paŭstańnia tolki ŭ Rady ŭ rehijonie.
2. Źbirać ludziej, nastrojenych suprać chunty, da zachoplenych budynkaŭ u Daniecku i inšych haradach. Adnaho aktyvu mała dla dalejšych dziejańniaŭ.
3. Pa miery nazapašvańnia sił zachoplivać inšyja budynki, źviazanyja z uładaj i ŚMI, a mienavita budynka SBU, sudoŭ, administrcyj, prakuratury, milicyi, telekanałaŭ, kaznačejstva. U vypadku niemahčymaści zachopu źniščać budynki abo adklučać ad usich haradskich kamunikacyj. Kožny zachop davodzić da viedama ŭsich, kab pakazać realnyja dziejańni, umacavać duch ludziej, jašče bolš sklikać pad svaje ściahi.
4. Pryvodzić pad prysiahu viernaści Radzie milicyju, vajskovyja častki.
5. Utvaryć svaje ŭłasnyja vajskovyja farmavańni. Zabrać zbroju z vajskovych častak, adździełaŭ milicyi, vajskovych składoŭ dla ŭzbrajeńnia svaich padraździaleńniaŭ.
6. Naładzić uzajemnuju kaardynacyju pamiž rehijonami.
7. Abviaścić padrychtoŭku refierendumu ŭ rehijonie ab jaho statusie.
8. Likvidavać pamiežnuju achovu rasiejska-ŭkrainskaj miažy jak instytut, miaža pavinna być adkrytaj dla pieramiaščeńnia hruzaŭ i ludziej biez najmienšaha kantrolu z boku pamahatych chunty.
9. Spynić adpraŭku padatkaŭ, lubych srodkaŭ u bok Kijeva, rehijonaŭ, nie achoplenych paŭstańniem. Arhanizavać sistemu praviadzieńnia płaciažoŭ pamiž paŭstałymi rehijonami.
10. Spynić viaščańnie prapahandy chunty na terytoryi rehijonaŭ. Arhanizavać svaju ŭłasnuju sistemu televiaščańnia ŭ rehijonach na bazie rehijanalnych telekanałaŭ».
Jak bačym, mienavita pa hetaj schiemie sieparatysty i dziejničajuć. Praŭda, z pryčyny nievialikaj padtrymki nie ŭsio z hetaha im udałosia realizavać.
Źviartaje ŭvahu, što Maskva razumieje, što padtrymki ad zakonna abranych miascovych radaŭ niama i nie spadziajecca na jaje.
Źviartaje ŭvahu i punkt pra likvidacyju pamiežnaj achovy — u vyniku hetaha ŭ Danbas mahli b svabodna pastupać zbroja i «dobraachvotniki samaabarony». U Krym ich, nahadajem, zavozili karablami Čarnamorskaha fłota. U Danbasie ž vajskovych bazaŭ Rasija nie maje.
Što ž za sajt publikuje takija instrukcyi?
Imperiya.by — sajt, stvorany publicystam Juryjem Barančykam. Jon raniej pracavaŭ u Administracyi prezidenta Biełarusi. Barančyk zajmaje pazicyju nieprymańnia dziejnaj ułady RB, ličačy jaje niedastatkova viernaj Rasii.
Sajt aśviatlaje biełaruskija, a taksama mižnarodnyja padziei z rasijskich, impierskich pazicyj. Na sajcie drukujucca adyjoznyja dziejačy, kštałtu Andreja Hieraščanki, jakija admaŭlajuć biełaruskuju dziaržaŭnaść.
Sajt «Impieryja» blizki da rasijskaha regnum.ru, stvoranaha dla absłuhoŭvańnia rasijskich zadač u SND. Niekalki apošnich hadoŭ redaktar «Impieryi» Juryj Barančyk žyvie ŭ Maskvie. Ciapier jon stvaryŭ tam «Instytut infarmacyjnych vojnaŭ».
U biełaruskim internecie pisałasia, što stvaralniki «Impieryi» šukali padtrymki ŭ rasijskim pasolstvie. Adnojčy pasoł Surykaŭ navat zhadaŭ Barančyka: «Jość taki chłopiec — Barančyk. Hałoŭnaja zadača jaho — na plečach suajčyńnikaŭ zaleźci ŭ palityku».
Na što Barančyk adreahavaŭ: «Surykavy prychodziać i sychodziać, a Impieryja zastajecca». Darečy, sioleta Surykaŭ udzielničaŭ u pracy Kaardynacyjnaj rady suajčyńnikaŭ u Biełarusi, jaki ŭznačaliŭ zhadany nami Andrej Hieraščanka.
Kali viartacca da «instrukcyi paŭstańnia», to tolki na pieršy pohlad jon adnosicca da Ukrainy.
Źmianiŭšy nazvy hieahrafičnych centraŭ na patrebnyja, prahramu možna vykarystoŭvać dla sieparatysckich metach i ŭ inšych susiedskich dla Rasii krainach.
Dziakujučy publikacyi padobnych instrukcyj aŭdytoryja Imperiya.by mocna vyrasła ŭ apošni miesiac. Tak, za ŭčora, 8 krasavika, u jaho było kala 11 tysiač unikalnych naviednikaŭ, 92 tysiačy prahladaŭ (źviestki Akavita.by).
Praŭda, ź ich tolki 1200 naviednikaŭ ź Biełarusi — usiaho dziasiataja častka.
Dla paraŭnańnia: 8 lutaha naviednikaŭ na Impieryi.baj było ŭsiaho 3300, ź ich biełaruskich — 526.
Takim čynam, instrukcyi dla sieparatystaŭ znachodziać svajho čytača va Ukrainie. Pry hetym robicca heta nibyta nie rasijskimi, a biełaruskimi rukami, choć faktyčna sajt stvarajecca ciapier u Maskvie.