Vystava «Adpačynak-2014»: vajenny turyzm i nijakaha Kryma
Biełaruskamu turystu prapanujuć pajechać i ŭ Hruziju, i ŭ Sardyniju. A Krym, jaki zaŭsiody byŭ turystyčnaj miekaj, na vystavie amal nie pradstaŭleny.
Stend Ministerstva sportu i turyzmu sustrakaje naviedvalnikaŭ dziŭnym naciurmartam.
Siońnia ŭ Minskim vystavačnym centry «BiełEkspa» ŭ 17-ty raz adkryłasia štohadovaja mižnarodnaja vystava-jarmarka «Adpačynak». Ciaham čatyroch dzion biełaruskija i zamiežnyja turapieratary, a taksama pradstaŭniki krain, hatelaŭ i asobnych rehijonaŭ buduć demanstravać biełarusam prapanovy dla adpačynku ŭ 2014 hodzie.
Turysta łoviać na ramantyku
Amataram čahości niezvyčajnaha budzie sumna na «Adpačynku-2014». Vidać, čas šyrokaha źjaŭleńnia na biełaruskim rynku cikavostak kštałtu viski-turaŭ pa Šatłandyi i inšaha śpiecyfičnaha turyzmu jašče nie nadyšoŭ. Adnak niezvyčajnyja prapanovy ŭsio ž traplajucca na vočy.
Suvieninrnyja śviečy da Čempijanatu śvietu pa chakiei.
Naprykład, turfirma «Muzienidzis treveł» prapanuje zładzić viasielle ŭ Hrecyi. A maskoŭskaja firma «32 rumby», što ŭdzielničaje ŭ minskaj vystavie ŭpieršyniu, arhanizuje padarožžy na vietrazievych jachtach, pryčym jak indyvidualnyja i siamiejnyja, hetak i cim-biłdynh dla kampanij.
Turfirmy, jakija ładziać adpačynak u Biełarusi, taksama šukajuć čahości śviežaha i niezvyčajnaha. Pierasyciŭšysia animavanymi ekskursijami, adrazu niekalki turfirmaŭ prapanavali padarožžy z elemientami kviestynhu: u ich turyst nie prosta pasiŭny naziralnik, ale i aktyŭny ŭdzielnik.
Firma «Koła padarožžaŭ» raspracavała ekskursiju «Vyratavańnie Paryža», dzie prapanujuć prymieryć na siabie rolu žaŭniera Rasijskaj Impieryi padčas Naračanskaj apieracyi 1916 hoda. Udzielniki musiać vykanać zadańni, paśla jakich, pavodle słovaŭ arhanizatara, adbudziecca «simvaličnaje prymireńnie Rasijskaj Impieryi i Hiermanii».
Stend, pryśviečany Čempijanatu śvietu pa chakiei.
«Kraina zamkaŭ» prapanuje ekskursiju-kviest «Franc i Zosia: kachańnie, macniejšaje za vajnu», dzie ŭdzielniki stanoviacca žurnalistami, nakiravanymi aśviatlać pośpiechi rasijskich vojskaŭ, i nazirajuć za historyjaj kachańnia niemca Franca i biełaruski Zosi ŭ časy Pieršaj suśvietnaj vajny. Padčas ekskursii ŭdzieliniki buduć brać šturmam dot i navat trapiać u turmu — u vyniku arhanizatary abiacajuć chepi-end.
Pryjarytety — Turcyja i Bałharyja
Z kožnym hodam kropak na ziamnym šary, kudy možna pajechać, nabyŭšy tur u Biełarusi, stanovicca ŭsio bolš. Adanak, kali mierkavać pa vystavie, na turystyčnym rynku Biełarusi nie adbyłosia karennych źmienaŭ.
Stend Bałharyi.
Bolšaść biełaruskich turapierataraŭ skancentravanaja na adpačynku na mory, choć hieahrafija i šyrokaja: Charvatyja, Francyja, Hruzija, Italija, Jehipiet, Hrecyja, Rumynija, Izrail. U hetym hodzie mnoha prapanoŭ pajechać u Sardyniju.
Samyja papularnyja krainy ŭ biełarusaŭ možna lohka vyznačyć pa pamiery stendaŭ ich pradstaŭnikoŭ. Sioleta biassprečnymi lidarami byli Bałharyja i Turcyja.
Stend Turcyi.
Dla tych, chto nie choča lažać na plažy, možna lohka vybrać aŭtobusny tur pa Jeŭropie ci prapanovy ad jeŭrapiejskich krain-susiedak. Asabliva vyłučajecca Łatvija, jakaja na hihanckim stendzie pradstaviła dziasiatki turystyčnych mahčymaściaŭ u kožnym z rehijonaŭ krainy.
Minus Krym
Nie mahła nie paŭpłyvać na turystyčnyja zvyčki biełarusaŭ aneksija Kryma. Paŭvostraŭ, jaki byŭ adnym z samych papularnych miescaŭ letniaha adpačynku, amal nie pradstaŭleny na vystavie. Turfirma «Adysieja tur» — adna ź niamnohich, na čyim stendzie možna pabačyć nazvu «novaha subjekta Rasii». Pradstaŭnica «Adysiei tur» paviedamiła, što zajavak na adpačynak u Krymie značna mienš za minułyja hady, adnak jany jość.
«Kamu treba, toj pajedzie adpačyvać u Krym. Adnak ciapier prablema ŭ inšym: jak davieźci ludziej. Raniej my kantaktavali z ukrainskim bokam, ale jašče nie zusim zrazumieli, z kim treba źviazvacca ciapier», — skazała jana.
Vajennyja turysty
Turyzm unutry Biełarusi nie ciešyć burlivym raźvićciom. Viadoma, što hałoŭnaja padzieja hetaha hoda ŭ halinie — Čempijanat śvietu pa chakiei. Tamu adrazu na ŭvachodzie naviedvalnikaŭ vystavy sustrakaje stend, pryśviečany padzieje. Nažal, asnoŭnaja infarmacyja na im — turystyčnyja buklety z ahulnaj infarmacyjaj pra Biełaruś pa-anhlijsku.
A voś tradycyjny stend Ministerstva sportu i turyzmu vialikimi litarami paviedamlaje, što «2014 — hod vajennaha turzmu». U śviatle ukrainskich padziej, dzie «vietlivyja ludzi» i dyviersanty-hastralory adyhrali nie apošniuju rolu, taki zahałovak vyklikaje pytańni.
Stend Ministerstva sportu i turyzmu abviaščaje 2014 hod Hodam vajennaha turyzmu.
U 2014 hodzie adznačajecca adrazu i 70-hodździe vyzvaleńnia Minska, i 100-hodździe pačatku Pieršaj suśvietnaj vajny. Vidavočna, hetym i kiravałasia ministerstva, pryśviačajučy vajennamu turyzmu hety hod. Kala ministerskaha stenda možna pabačyć kulamiot «Maksim» i dziažurnaha čyrvonaarmiejca. Pradstaŭniki biełaruskich abłaściej prapanujuć šmatlikija ekskursii, pryśviečanyja padziejam Pieršaj suśvietnaj. Pryvatnyja turystyčnyja ahienctvy taksama aktyŭna ŭzialisia ekspłuatavać hetuju histaryčnuju padzieju.
Asobny stend zaprašaje haściej na lačeńnie i adpačynak u biełaruskija sanatoryi. Supracoŭnica biełaruskaha dziaržaŭnaha turapieratara «Centr kurort» paviedamiła karespandentu «NN», što niemahčymaść trapić u biełaruski sanatoryj biełarusu praź vialiki patok rasijcaŭ — usiaho tolki «niehatyŭny mif, jaki skłaŭsia ŭ biełaruskich ŚMI», i zapeŭniła, što luby ajčynny sanatoryj zaŭsiody hatovy pryniać biełarusa. Miž tym, košty na adpačynak u sanatoryi «Junactva», što naležyć Upraŭleńniu spravami preziedenta, čamuści ŭkazanyja tolki ŭ rasijskich rublach.
Vystava «Adpačynak-2014» pracuje 10 i 11 krasavika z 10:00 da 19:00, 12 krasavika z 10:00 da 16:00 pa adrasie: vuł. Janki Kupały, 27.