Pahaniajła: U Biełarusi taksama idzie praca nad zakonam ab lustracyi
Viarchoŭnaja Rada Ŭkrainy pryniała zakon ab lustracyi sudździaŭ. Zakon praduhledžvaje pravavyja i arhanizacyjnyja asnovy praviadzieńnia admysłovaj pravierki sudździaŭ sudoŭ ahulnaj jurysdykcyi.
U dakumencie prapisanyja vypadki, kali sudździa padlahaje lustracyi. Siarod ich — pryniaćcie palityčnych rašeńniaŭ: abmiežavańnie pravoŭ hramadzianaŭ na praviadzieńnie schodaŭ, mitynhaŭ, šeściaŭ, demanstracyjaŭ va Ŭkrainie z 21 listapada 2013 hodu. Pad lustracyju padpaduć i tyja sudździ, jakija vynosili rašeńni ab utrymańni pad vartaj, sudzili ŭdzielnikaŭ masavych akcyjaŭ, davali dazvoł na praviadzieńnie śledčych i vyšukovych dziejańniaŭ u dačynieńni da mitynhoŭcaŭ.
Taksama sudździa padlahaje praviercy, kali raniej jon vynies prysud čałavieku, jaki potym byŭ pryznany palityčnym źniavolenym abo kali prysud byŭ vyniesieny z pryčyny hramadzianskaj dziejnaści.
Va Ŭkrainie Zakon ab lustracyi pakul tyčycca tolki sudździaŭ. Ale taki ž zakon pavinien być pryniaty ŭ dačynieńni da supracoŭnikaŭ Słužby biaśpieki Ŭkrainy, milicyi, prakuratury, jakija ździajśniali aryšty, pryciahvali ludziej da administracyjnaj i kryminalnaj adkaznaści, raśśledavali adpaviednyja spravy, padtrymlivali dziaržaŭnaje abvinavačvańnie ŭ sudach, ličyć biełaruski pravaabaronca Hary Pahaniajła.
Ci buduć pryniatyja padobnyja zakony ŭ Biełarusi? Na dumku byłoha sudździ, a ciapier supracoŭnika Biełaruskaha Chelsynskaha kamitetu Hary Pahaniajły, «kali-niebudź ułada źmienicca, pryjduć śvietłyja demakratyčnyja časy, i takoha kštałtu zakanadaŭstva, nakiravanaje na čyściniu šerahaŭ, budzie vielmi zapatrabavanaje».
Što da Biełarusi, pavodle słovaŭ Hary Pahaniajły, to pradstaŭniki apazycyi ŭžo pracujuć nad prajektam zakonu ab lustracyi.
«U roznych krainach heta robicca pa-svojmu — praz adpaviednyja kamisii, praz sudy, trybunały. Ale pryncypova toje, što lustracyi padlahajuć tyja dziaržaŭnyja słužačyja, jakija dapuskali hrubyja parušeńni pravoŭ čałavieka, pryniatych AAN, inšymi ŭpłyvovymi mižnarodnymi strukturami», — patłumačyŭ Hary Pahaniajła.
Što da Ŭkrainy, to praviarać sudździaŭ tut budzie časovaja śledčaja kamisija. U jaje ŭvojduć 5 sudździaŭ u adstaŭcy, jakija ciaham apošnich piaci hadoŭ nie zajmali administracyjnych pasadaŭ u sudach. Abiare ich plenum Viarchoŭnaha Sudu. Jašče pa 5 siabroŭ kamisii pryznačać uradavy ŭpaŭnavažany pa pytańniach antykarupcyjnaj palityki i parlament.