MZS: Biełaruś i ES pastajanna abmiarkoŭvajuć spraščeńnie vizavaha režymu
Spraščeńnie vizavaha režymu pastajanna fihuruje ŭ paradku dnia kansultacyj pa pytańniach źniešnieekanamičnaj dziejnaści pamiž Biełaruśsiu i ES, paviedamiŭ 10 krasavika na bryfinhu ŭ Minsku pres-sakratar biełaruskaha MZS Dźmitryj Mirončyk.
Kamientujučy chod pieramoŭ ab spraščeńni vizavaha režymu Biełarusi ź ES, jon padkreśliŭ: «Tematyka spraščeńnia vizavaha režymu pastajanna fihuruje ŭ paradku dnia kansultacyj pa konsulskich pytańniach, jakija davoli efiektyŭna pravodziacca pamiž MZS Respubliki Biełaruś i ministerstvami zamiežnych spraŭ krain — členaŭ Jeŭrapiejskaha sajuza. Tolki za apošni čas padobnyja kansultacyi prajšli pamiž konsulskimi ŭpraŭleńniami MZS Biełarusi i Litvy, Biełarusi i Słavienii».
«Tamu, — dadaŭ jon, — my praciahvajem pracavać u kirunku, ukazanym kiraŭnikom dziaržavy ŭ pasłańni Nacyjanalnamu schodu i biełaruskamu narodu ŭ krasaviku 2013 hoda».
Nahadajem, Saviet ministraŭ ES jašče ŭ červieni 2011 hoda zaprasiŭ Biełaruś da pačatku pieramoŭ ab spraščeńni vizavaha režymu. Saviet ES nieadnarazova zaklikaŭ biełaruskija ŭłady pačać pieramovy. U listapadzie 2013 hoda na samicie Uschodniaha partniorstva ŭ Vilniusie ministr zamiežnych spraŭ Uładzimir Makiej zajaviŭ, što Biełaruś hatova pačać pieramovy pa pahadnieńniach ab spraščeńni vizavaha režymu i ab readmisii.
Pieršy raŭnd pieramoŭ prajšoŭ u Brusieli ŭ kancy studzienia 2014 hoda.
Pahadnieńni ab spraščeńni vizavaha režymu ź ES užo padpisanyja ŭsimi krainami Uschodniaha partniorstva (UP) i Rasijaj. Biełaruś — adzinaja kraina UP, hramadzianie jakoj vymušany płacić za šenhienskuju vizu nie 35 jeŭra, a 60.