Smalensk: horš, čym złačynstva
Čatyry hady tamu pad Smalenskam zahinuła 96 palakaŭ, u tym liku prezident Kačyński z žonkaj.
Čatyry hady praz paśla Smalenskaj trahiedyi varta pryznać: mieli racyju tyja, chto kazaŭ, što Maskvie daviarać nie varta.
I havorka ledź nie pra teoryi, jakija viaduć da taho, što 10 krasavika 2010 hoda adbyŭsia zamach, za jakim staić Kreml. Niezaležna ad taho, što stanie nam viadoma ŭ budučyni pra pryčyny katastrofy, užo ciapier možna z upeŭnienaściu skazać, jakuju vielizarnuju leptu ŭniesła Rasija ŭ stvareńnie hłybokaj prorvy, jakaja raździaliła palakaŭ. I składana paspračacca z tym, što heta była śviadomaja palityka.
Składana pieraličyć usie «ŭkidvańni», ź jakim my mieli spravu za hetyja čatyry hady, ŭzhadajem, adnak, jak mocna rasijskaja rasšyfroŭka zapisaŭ «čornaj skryni» adroźnivałasia ad polskaj, i ŭ tym, što hienierał Andžej Błasik (Andrzej Błasik) nasupierak tezie Miždziaržaŭnaha avijacyjnaha kamiteta, nie znachodziŭsia ŭ stanie ałkaholnaha apjanieńnia. I pra abłomki samalota Tu-154M, jakija rasijanie nie chočuć addavać Polščy. Pucinskaja kamanda sprytna vykarystoŭvała padazronaść adnych i lehkaviernych inšych polskich palitykaŭ. Pucin viedaje, što kali na paradak dnia vychodzić čarhovaja smalenskaja prablema, u nas razharajucca emocyi i palaki pačynajuć zakidvać adzin adnaho abvinavačvańniami.
My ŭsie pamiatajem pieršyja hadziny, dni, tydni paśla katastrofy. Uładzimira Pucina, jaki z pakutaj na tvary abdymaje Donalda Tuska (Donald Tusk). Bukiety kvietak i śviečki, jakija prostyja rasijanie prynosili da polskaj ambasady ŭ Maskvie. Ja nie vieru ŭ toje, što hetyja žesty byli niaščyrymi. Miž tym, ludzi, jakija ŭ toj čas kiravali Polščaj, paviali siabie biezadkazna. Jany nie pastaralisia, kab našy ŭłady i słuhi zakona mieli bolšy dostup da tahačasnaha rasśledvańnia, jakoje adbyvałasia na terytoryi Rasii, i nie atrymali harantyj, što śledstva budzie vieścisia pa standartach, pryniatych u demakratyčnych krainach. Roŭna naadvarot: jany pierakonvali nas, što Rasii ŭ Smalenskaj spravie varta pavieryć. Nie budu śćviardžać, ci vioŭ, jak ličać niekatoryja palityki partyi «Prava i Spraviadlivaść» (PiS), Tusk palityčnuju hulniu suprać Kačyńskaha (Jarosław Kaczyński). Adnak polski premjer jak minimum prajaviŭ vialikuju naiŭnaść. Jon zabyŭsia, što takoje Maskva, i chto ŭ joj kiruje. Jon pryniaŭ čysta čałaviečyja, mahčyma ščyryja, reakcyi u jakaści palityčnych zajavaŭ. Rasija, jakaja spačuvaje Polščy, stała ŭ jaho vačach demakratyčnaj i pravavoj dziaržavaj, jakaja pavažaje suvierenitet susiedziaŭ i vyrašaje kanflikty mirnym čynam…
Praz čatyry hady paśla Smalenska i niapoŭny miesiac paśla Krymu takuju naiŭnaść varta acharaktaryzavać słovami Talejrana: «Heta horš čym złačynstva: heta pamyłka».