Ułady mahli rychtavać dla arhanizataraŭ Płoščy śmiarotnaje pakarańnie
Udzielnikam akcyi 19 śniežnia 2010 h. pahražali abvinavačvańni, jakija praduhledžvajuć 15-hadovyja terminy aryštu i vyšejšuju mieru pakarańnia.
Pra toje, što ŭłady rychtavali pravakacyi suprać biełarusaŭ, jakija vyjšli na Płošču, śviedčać słovy Mikałaja Aŭtuchoviča. Palitviazień vyjšaŭ na volu paśla bolš jak piacihadovaha terminu, praviedzienaha za kratami. Jak skazaŭ Aŭtuchovič, jaho chacieli abvinavacić va ŭvozie partyi zbroi ŭ Biełaruś. Jon upeŭnieny, što ŭłady chacieli źviazać heta z budučaj Płoščaj. Pravaabaronca Valancin Stefanovič raspavioŭ ab nastupstvach takoha abvinavačvańnia.
«Usio zaležyć ad taho, dla jakich metaŭ, na dumku śledstva, nibyta pryvozili hetuju «partyju zbroi». Tamu składana skazać, jakim čynam heta mahli b kvalifikavać. Jość artykuł «zmova i inšyja dziejańni z metaj zachopu dziaržaŭnaj ułady». Jość artykuł «terarystyčny akt», jaki moža być źviazany z vykarystańniem zbroi, «dyviersija». Usie jany adnosiacca da hłavy Kryminalnaha kodeksa «Złačynstvy suprać dziaržavy» i praduhledžvajuć roznyja vidy pakarańniaŭ. Naprykład, «zmova z metaj zachopu ŭłady» karajecca terminam ad 8 da 12 hadoŭ, sam «zachop i ŭtrymańnie ŭłady» — ad 10 da 15 hadoŭ. A kali ŭsie hetyja złačynstvy źviazanyja sa śmierciami ludziej, adkaznaść moža być až da śmiarotnaha pakarańnia», — zajaviŭ Valancin Stefanovič.
Pravaabaronca zhodny z palitviaźniem Mikałajem Aŭtuchovičam u tym, što padobnyja abvinavačvańni mahli być vykarystany dla taho, kab ŭžyć bolš žorstkija represii ŭ dačynieńni da ŭdzielnikaŭ Płoščy.
«Usie hetyja try artykuły całkam mahli vykarystoŭvać. I dziejańni pa zachopu ŭłady, i dyviersija … Ciažka skazać, jak heta zmahli b kvalifikavać, ale, miarkuju, što jak minimum, u jakaści terarystyčnaha akta dakładna. A kali b heta źviazali sa śmierciami ludziej, to ŭ vyniku całkam mahli b prymianić i vyšejšuju mieru pakarańnia. Ja nie mahu dakładna kazać, tamu što pra heta treba pytacca ŭ tych, chto prydumaŭ heta abvinavačvańnie. Kali ŭjavić sabie, što na Płoščy adbyŭsia, naprykład, vybuch i pačali b šukać vinavatych, to im mahło b pahražać śmiarotnaje pakarańnie», — skazaŭ pravaabaronca.
Nahadajem, Płošča 19 śniežnia 2010 h. stała adnoj z samych masavych akcyj biełaruskaha naroda. Kala 50 tysiač hramadzian krainy vyjšli pratestavać suprać sfalsifikavanych vynikaŭ prezidenckich vybaraŭ. Akcyja była žorstka padaŭlena vojskami i milicyjaj.