Pravaabaroncy zaklikajuć krainy — udzielnicy ČS pa chakiei nie nakiroŭvać u Minsk aficyjnyja delehacyi
Biełaruskija i mižnarodnyja pravaabarončyja arhanizacyi zaklikali zacikaŭlenyja krainy ŭstrymacca ad adpraŭki ŭ Biełaruś aficyjnych uradavych delehacyj dla ŭdziełu ŭ mierapryjemstvach, źviazanych z čempijanatam śvietu pa chakiei, jaki projdzie ŭ Minsku 9—25 maja.
Adpaviednuju adozvu, tekst jakoj raźmieščany na pravaabarončym sajcie www.spring96.org, padpisali 11 arhanizacyj: Civil Rights Defenders (Šviecyja), FIDH (Mižnarodnaja fiederacyja za pravy čałavieka), Finskaja liha pravoŭ čałavieka, zakryty biełaruskimi ŭładami pravaabarončy centr «Viasna», mižnarodny fond Damoŭ pravoŭ čałavieka, Kazachstanskaje mižnarodnaje biuro pa pravach čałavieka i zachavańni zakonnaści, Francuzskaja liha pravoŭ čałavieka, Italjanskaja liha pravoŭ čałavieka, Liha pravoŭ i svabod (Kanada), Narviežski Chielsinkski kamitet, Ostgruppen (Šviecyja).
Pravaabaroncy vitajuć «unikalnuju dla biełaruskaha naroda mahčymaść atrymać asałodu ad spartyŭnych spabornictvaŭ, arhanizavanych svajoj krainaj, a taksama ŭniviersalnych kaštoŭnaściaŭ sportu». Adnak, zaznačajuć jany, kiraŭnictva Biełarusi, u tym liku Alaksandr Łukašenka, nieadnarazova padkreślivali, što čempijanat śvietu pa chakiei źjaŭlajecca i važnaj palityčnaj padziejaj.
«Adpraviŭšy zaprašeńni ab udziele ŭ čempijanacie ŭradam inšych krain, kiraŭnictva Biełarusi sprabuje vykarystać usie mahčymyja srodki, kab pieratvaryć mižnarodnaje spartyŭnaje mierapryjemstva ŭ ideałahičnaje i palityzavanaje šou biełaruskaha aŭtarytarnaha režymu», — havorycca ŭ zajavie.
«Bieručy pad uvahu sistematyčnyja i hrubyja parušeńni pravoŭ čałavieka ŭ Biełarusi», pravaabarončyja arhanizacyi zaklikajuć krainy, čyje nacyjanalnyja kamandy buduć brać udzieł u hetym spabornictvie, «pieraškodzić biełaruskamu ŭradu vykarystać spartyŭnuju padzieju ŭ jakaści palityčnaj płatformy».
«Sport dla sportu! Niachaj na hetaj važnaj padziei panujuć univiersalnyja spartyŭnyja kaštoŭnaści, nie padkreślivajučy pry hetym zasłuhi režymu Łukašenki, jaki asudžany ŭsioj mižnarodnaj supolnaściu», — havorycca ŭ adoźvie.
Pravaabaroncy zaznačajuć, što Łukašenka kiruje krainaj užo 20 hadoŭ. «Siońnia palityčna matyvavany pieraśled pradstaŭnikoŭ hramadzianskaj supolnaści i apazicyi źjaŭlajecca ahulnaj tendencyjaj, a abmiežavańni palityčnych i hramadzianskich pravoŭ hramadzian Biełarusi — usioabdymnymi jak u nacyjanalnym zakanadaŭstvie, hetak i na praktycy», — skazana ŭ adoźvie.
Jaje aŭtary nahadvać pra dzieviaciarych palitviaźniaŭ, jakija praciahvajuć znachodzicca za kratami, niahledziačy na zakliki hramadskaści vyzvalić ich, a taksama pra toje, što Biełaruś zastajecca adzinaj krainaj u Jeŭropie, jakaja praciahvaje pryvodzić u vykanańnie śmiarotnyja pryhavory. Aprača taho, u adoźvie ŭkazvajecca na «šyrokaje parušeńnie sacyjalna-ekanamičnych pravoŭ» u krainie.