Tolki dla žančyn! Novy konkurs «Budźma biełarusKami!»
Rahnieda, Jeŭfrasińnia Połackaja, Nastaśsia Alelkavič (Słuckaja), Franciška Uršula Radzivił, Emilija Plater, Kamiła Marcinkievič, Eliza Ažeška, Apałonija Dareŭskaja, Sałamieja Rehina Rusieckaja, Sofja Kavaleŭskaja, Stefanija Staniuta… Žančyny-lehiendy. Žančyny-historyja.
Kampanija «Budźma biełarusami!» ŭpeŭnienaja, što i ŭ sučasnaj Biełarusi šmat žančynaŭ, jakija dasiahnuli pośpiechu ŭ roznych śfierach – hramadskaj, prafiesijnaj, tvorčaj. Im jość što skazać hramadstvu i što abmierkavać razam, ich musić viedać jak maha bolš ludziej!
Kampanija zaklikaje da ŭdziełu ŭ prajekcie «Budźma biełarusKami!», u miežach jakoha adbuducca cikavyja sustrečy i dyskusii, abmien dośviedam i pošuk novych rašeńniaŭ.
I pieršy etap – sieminar «Žančyny napierad!», na jaki ŭdzielnicy adbirajucca na konkursnaj asnovie.
«Šanoŭnyja biełaruski, kali
- vam bolš za 20 hadoŭ,
- vy žyviacie ŭ Biełarusi (lubym horadzie ci vioscy),
- vy aktyŭnyja ŭ hramadskaj, prafiesijnaj, tvorčaj dziejnaści, majecie pośpiech u svajoj prafiesii, hatovyja im padzialicca, zaprašajem vas paŭdzielničać u našym novym prajekcie «Budźma biełarusKami!» — pišacca va ŭmovach konkursa.
Najaktyŭniejšyja z aktyŭnych stanuć udzielnicami sieminara «Žančyny napierad!», jaki projdzie ŭ Varšavie (Polšča) ad 30 červienia da 7 lipienia 2014 hoda, dzie atrymajuć cikavyja viedy, a taksama paznajomiacca z dośviedam polskich žančyn.
Kolkaść udzielnic abmiežavanaja.
Tyja, chto zacikavilisia prapanovaj, mohuć zapoŭnić ankietu, papiarednie spampavaŭšy jaje z sajta budzma.by, i dasłać na paštovuju skryniu razam@budzma.org z paznakaj «Konkurs «Budźma biełaruskami!»
Zajaŭki prymajucca da 15 maja 2014 hoda.