Budapiešt maje namier dabivacca dla vienhraŭ ukrainskaha Zakarpaćcia dvajnoha hramadzianstva
Vienhry, jakija pražyvajuć na terytoryi Ukrainy, pavinny atrymać aŭtanomiju i padvojnaje hramadzianstva. Pra heta zajaviŭ u parłamiencie Vienhryi premjer-ministr hetaj krainy Viktar Orban.
«My razhladajem vienhierskaje pytańnie jak jeŭrapiejskaje. Vienhry, jakija žyvuć ŭ Karpackim rehijonie, majuć prava na dvajnoje hramadzianstva, na pravy nacyjanalnaj supolnaści i na aŭtanomiju», — zajaviŭ jon.
Na dumku Orbana, pytańnie ab stanoviščy vienhraŭ va Ukrainie asabliva vostraje dla Budapiešta.
«Stanovišča 200 tys. vienhraŭ pa nacyjanalnaści, jakija žyvuć va Ukrainie, nadaje hetamu pytańniu asablivuju vastryniu. Vienhierskaja abščyna tam pavinna atrymać dvajnoje hramadzianstva, usie pravy nacyjanalnaj supolnaści, a taksama jana pavinna atrymać mahčymaść samakiravańnia», — zajaviŭ jon.
«Heta našy vyraznyja čakańni ad novaj Ukrainy, jakaja zaraz paŭstaje», — dadaŭ vienhierski premjer.
Adnačasova Orban padtrymaŭ ukrainskuju ŭładu ŭ raźvićci demakratyčnaj dziaržavy.
Va Ukrainie žyvie, pavodle roznych dadzienych, ad 160 da 200 tysiač vienhraŭ. U inšych krainach značna bolšyja vienhierskija mienšaści — u Sierbii vienhraŭ ad 250 da 290 tysiač, u Słavakii kala 500 tysiač, a ŭ Rumynii bolš za miljon čałaviek vienhierskaj nacyjanalnaści.