Href pravilna razrulić zapyty ŭ Jandeksie
Kiraŭnik Aščadnaha banka Hierman Href moža ŭvajści ŭ saviet dyrektaraŭ rasijskaj internet-kampanii «Jandeks».
Infarmacyja pra toje, što kandydatura Hrefa budzie vystaŭlena na hałasavańnie na hadavym ahulnym schodzie akcyjanieraŭ kampanii 21 maja 2014 hoda, źjaviłasia ŭ tvitary minułym viečaram (skan Paradku schodu na anhlijskaj movie).
Prychod Hrefa nie aznačaje, što chto-niebudź źbirajecca pakinuć saviet dyrektaraŭ, śćviardžajuć u kampanii, paviedamlaje Gazeta.ru.
«Z pryznačeńniem Hrefa členaŭ savieta dyrektaraŭ budzie dzieviać», — rastłumačyli ŭ «Jandeksie».
U Aščadbanka ŭžo jość «załataja akcyja» «Jandeksa», jakuju jon kupiŭ za 1 jeŭra.
«Našy ŭzajemaadnosiny z Aščadnym bankam pačalisia jašče ŭ 2009 hodzie — tady my prapanavali im pryjarytetnuju akcyju «Jandeksa», — raspaviali ŭ pres-słužbie.
Pierad hetym, u 2008 hodzie, na rynku chadzili čutki pra toje, što 10% akcyj «Jandeksa» sprabuje kupić Ališer Usmanaŭ, ale ŭhoda nie adbyłasia. Prodaž «załatoj akcyi» Aščadbanku tady tłumačyli padrychtoŭkaj da IPO.
Adnak da vyłučeńnia Hrefa «załataja akcyja» nie maje dačynieńnia.
«U saviet dyrektaraŭ Href naminavany mienavita jak čałaviek ź vialikim dośviedam i suviaziami ŭ dziaržaŭnych kołach, a nie jak pradstaŭnik Aščadbanka», — udakładniaje krynica.
U «Jandeksie» nahadvajuć, što «załataja akcyja» i nie daje prava na miesca ŭ saviecie dyrektaraŭ taksama, jak i na kiravańnie kampanijaj.
«Adzinym pravam trymalnika pryjarytetnaj akcyi źjaŭlajecca prava vieta na kancentracyju pakieta akcyj Yandex NV zvyš 25% adnoj asobaj abo źviazanaj pamiž saboj hrupaj asobaŭ. Heta dapamahaje praduchilić daminavańnie jakoj-niebudź hrupy inviestaraŭ i stvaraje zrazumieły miechanizm dla padpisańnia bujnych ździełak z akcyjami Jandeksa», — adznačyli ŭ pres-słužbie.
Razam z tym, u minułym hodzie Aščadbank kansalidavaŭ «Jandeks.Hrošy» (75 % minus 1 rubiel).
U krasaviku kampanija «Jandeks» padpała pad krytyku z boku prezidenta Uładzimira Pucina.
Pucin na miedyjaforumie Abjadnanaha narodnaha frontu zajaviŭ, što internet uźnik jak «śpiecprajekt CRU ZŠA» i raspavioŭ, što «Jandeks» u pačatku stanaŭleńnia kampanii «taksama paddavili: pavinna być voś stolki amierykancaŭ u ich, stolki — jeŭrapiejcaŭ, i jany vymušanyja byli z hetym zhadžacca».
Akramia taho, jon asobna adznačyŭ, što «Jandeks» častkova zarehistravany za miažoj, «nie tolki ŭ metach padatkaabkładańnia, ale i pa inšych mierkavańniach».
Słovy Pucina abrynuli akcyi «Jandeksa» na 5 %, choć u kampanii i paśpiašalisia adkazać, što zamiežny ŭdzieł byŭ u asnoŭnym u formie finansavych inviestycyj, a zamiežnyja sierviery vykarystoŭvajucca tolki dla indeksavańnia zamiežnaha internetu.
Praz paru dzion, 27 krasavika, adzin z servisaŭ, «Jandieks.Kartinky», na praciahu dnia na zapyt «prezident Rasiei» abo «prezident RF» pačaŭ vydavać zamiest partretaŭ Pucina partrety Dźmitryja Miadźviedzieva. Mnohija karystalniki ŭbačyli ŭ takoj źmienie prezidenta niefarmalny adkaz na krytyku.
Prychod Hrefa ŭ «Jandeks»,z adnaho boku, moža być rascenieny jak nastupny krok u adziaržaŭleńnia runetu, kažuć ekśpierty.