Pjany kiroŭca-biaspraŭnik na «Fijacie» naśmierć źbiŭ inśpiektara DAI u Minsku
Fota guvd.gov.by.
U Minsku ŭ vyniku DTZ zahinuŭ supracoŭnik Dziaržaŭtainśpiekcyi, paviedamili ŭ Śledčym kamitecie Biełarusi.
Aficyjny pradstaŭnik Śledčaha kamiteta Julija Hančarova paviedamiła ŭ svaim fejsbuku padrabiaznaści zdareńnia:
«Rasśledavańnie ažyćciaŭlaje Hałoŭnaje śledčaje ŭpraŭleńnie. Sprava znachodzicca na asabistym kantroli ŭ Staršyni Śledčaha kamiteta Valancina Šajeva.
U rajonie 01:00 na praśpiekcie Niezaležnaści aŭtamabilem «Fijat» byŭ ździejśnieny najezd na inśpiektara darožna-patrulnaj słužby adździeła DAI Pieršamajskaha rajona h. Minska. Supracoŭnik milicyi ad atrymanych paškodžańniaŭ pamior na miescy. Kiroŭca aŭtamabila «Fijat» ź miesca zdareńnia ŭciok, ale byŭ zatrymany ŭ vyniku prafiesijnych i hramatnych dziejańniaŭ kalehaŭ zahinułaha, adrazu ž paśla ździajśnieńnia najezdu.
Padazravanym źjaŭlajecca niepracujučy žychar pasiołka Kałodziščy Minskaha r-na 1986 hoda naradžeńnia. U momant ździajśnieńnia złačynstva jon znachodziŭsia ŭ stanie mocnaha ałkaholnaha apjanieńnia (2,75 pramile ałkaholu).
Śledčymi praviedzieny ahlad miesca zdareńnia, pryznačanaja aŭtatechničnaj i sudova-miedycynskaja ekśpiertyzy. (…)
Padazravany nie mieŭ prava kiravańnia transpartnymi srodkami. Akramia taho, zatrymany raniej vosiem razoŭ asudžany za naŭmysnyja złačynstvy, u tym liku dvojčy za kiravańnie transpartnymi srodkami ŭ stanie ałkaholnaha apjanieńnia ( art. 317-1 Kryminalnaha kodeksa Respubliki Biełaruś). Śledstvam vyrašajecca pytańnie ab zaklučeńni pad vartu.
Dziejańni padazravanaha kvalifikavanyja pa č. 4 art. 317 (Parušeńnie praviłaŭ darožnaha ruchu asobaj, jakaja kiravała transpartnym srodkam u stanie ałkaholnaha apjanieńnia, jakoje paciahnuła pa nieaściarožnaści śmierć čałavieka) Kryminalnaha kodeksa Respubliki Biełaruś.
Śledstva nie vyklučaje mahčymaści źmieny kvalifikacyi dziejańniaŭ zatrymanaha na bolš ciažkaje złačynstva.
Zahinuŭ staršy lejtenant Pavieł Hruździeŭ. Jon adpracavaŭ u staličnaj milicyi tolki čatyry hady.