Čarhovamu niezaležnamu žurnalistu vyniesiena papiaredžańnie za supracoŭnictva z zamiežnym ŚMI biez akredytacyi
Prakuratura Bresckaj vobłaści vyniesła piśmovaje papiaredžańnie niezaležnamu žurnalistu Maksimu Chlabcu za supracoŭnictva z zamiežnym ŚMI — «Biełaruskim Radyjo Racyja» — biez akredytacyi, paviedamlaje pres-słužba Biełaruskaj asacyjacyi žurnalistaŭ (BAŽ).
Žurnalist naviedaŭ prakuraturu ranicaj 11 červienia — zhodna z pozvaj, jakuju atrymaŭ dniom raniej. Staršy prakuror adździeła pa nahladzie za vykanańniem zakanadaŭstva i zakonnaściu pravavych aktaŭ Nina Bacharava ŭručyła jamu piśmovaje papiaredžańnie, datavanaje 10 červienia i padpisanaje namieśnikam prakurora Bresckaj vobłaści Alaksandram Točkam.
Z papiery vynikaje, što dokazam supracoŭnictva žurnalista z zamiežnym ŚMI prakuratura ličyć dva artykuły, raźmieščanyja na sajcie racyja.com u sakaviku 2013 hoda. U papiaredžańni skazana, što Chlabiec moža być pryciahnuty da adkaznaści zhodna z zakanadaŭstvam, kali praciahnie zajmacca žurnalisckaj dziejnaściu ŭ supracy z zamiežnym ŚMI biez akredytacyi ŭ MZS.
Heta nie pieršaja prajava cikavaści da Maksima Chlabca z boku siłavych struktur. Jak paviedamlaje BAŽ, u sakaviku 2014 hoda jaho vyklikali ŭ milicyju «i sprabavali schilić da supracoŭnictva, kažučy, što «ŭsio viedajuć» pra jaho žurnalisckuju dziejnaść».
«Dumaju, ciapierašniaje papiaredžańnie — praciah toj historyi. Tady ja admoviŭsia supracoŭničać i raspavioŭ pra heta ŭ ŚMI. Moža, jany vyrašyli napužać mianie jašče čym-niebudź — z raźlikam na toje, što ja spałochajusia i pačnu ź imi supracoŭničać ci spyniu svaju dziejnaść», — vykazaŭ mierkavańnie Chlabiec.
Ueta ŭžo šostaje pa liku papiaredžańnie ŭ 2014 hodzie niezaležnym žurnalistam za supracu z zamiežnymi ŚMI. U lutym prakuratura Lidskaha rajona (Hrodzienskaja vobłaść) papiaredziła Juryja Dziešuka, u sakaviku Bresckaja haradskaja prakuratura papiaredziła žurnalista Jaŭhiena Skrabca, Homielskaja abłasnaja prakuratura — Juliju Siviec i Mikałaja Biańko, u krasaviku prakuratura Viciebskaj vobłaści papiaredziła miascovuju žurnalistku Śviatłanu Ściapanavu.
Za 2013 hod orhany prakuratury, pavodle źviestak BAŽ, vynieśli papiaredžańni dzieviaci žurnalistam.