Pieciarburhskaha śviatara zackavali za antyvajennyja vykazvańni
Sankt-Pieciarburhskaja jeparchija spyniła słužeńnie ijereja Mikałaja Saŭčanki ŭ chramie i pastanaviła jeździć u Troica-Sierhijevu pustyń «z metaj pieraasensavańnia svajoj antyrasiejskaj i prabanderaŭskaj pazicyi». Ajciec Mikałaj budzie jeździć tudy štovychodnyja, bo pa budniach pracuje na śvieckaj pracy. Pavodle aficyjnaha paviedamleńnia jeparchii, rašeńnie było pryniataje «na padstavie ŭsich pradstaŭlenych materyjałaŭ kolkaściu bolš za 200 staronak», pad jakimi, musić, majucca na ŭvazie taksama i razdrukoŭki pastoŭ sa šmatlikimi kamientarami z błoha Mikałaja Saŭčanki, raźmieščanaha pa adrasie pravoslavnij.livejournal.com.
Nižej prapanujem uvazie čytyčoŭ «NN» intervju sa śviatarom, praviedzienaje karespandentam ahienctva «Rosbałt», a taksama niekalki pastoŭ z jahonaha błoha ŭ «Žyvym časopisie».
Praz sprobu prymiryć narody Rasiei i Ukrainy ijerej Mikałaj Saŭčanka ledź nie pazbaviŭsia sanu i pad ciskam hramadskaści byŭ pieraviedzieny z chrama Pieramianieńnia Haspodniaha ŭ Lasnym ŭ Troica— Sierhijevu pustyń Strelna. Adnak jon kaža, što kiravaŭsia Božym zapavietam i hatovy praciahnuć słužeńnie.
— Ajciec Mikałaj, ja pravilna razumieju, što vy vykazali svaju pazicyju pra situacyju va Ukrainie, i heta vyklikała niezadavolenaść z boku RPC?
— Ja b nie kvalifikavaŭ heta vyklučna jak ŭnutrycarkoŭny kanflikt abo ŭnutrycarkoŭnuju prablemu. Prablema pachodzić zvonku: na jeparchiju akazała cisk hramadskaja dumka. Raniej kolki razoŭ u svaim błohu ja vykazaŭ mierkavańnie pra toje, što my ździajśniajem pamyłku, tamu što nienavidzim ciapierašniaje mierkavańnie va Ukrainie, žadajem terytaryjalnych źmienaŭ, prajaŭlajem ahresiju. Ja sprabavaŭ rastłumačyć narodu, što my robim niapravilna, siejučy duch varožaści, tady jak treba pabačyć va ŭkraincach bratoŭ, prysłuchacca da ich, znajści mirnaje rašeńnie kanfliktu. Akramia taho, adnojčy na Nieŭskim praśpiekcie, žadajučy vykazać svajo staŭleńnie da hetych padziejaŭ, ja sfatahrafavaŭsia ź niekalkimi prychažankami (havorka pra ŭdzieł ŭ antyvajennym maršy, jaki prajšoŭ u Sankt-Pieciarburhu 1-ha traŭnia). Ja byŭ tady ŭ rasie z kryžam i trymaŭ u rukach maleńki ściah Ukrainy. I heta było ŭspryniata mnohimi jak padtrymka fašyzmu, banderaŭščyny. Mianie abvinavacili ŭ tym, što ja apraŭdvaju «Pravy Siektar», žadaju revalucyi, Majdanu ŭ Rasiei. Ale ja nikoli pra heta nie kazaŭ. Ja nie zajmaju čyjści kankretny bok. Mianie abvinavacili ŭ tym, što ja padtrymlivaju Banderu i Hitlera, ale ja ich asudžaju. Maje miratvorčyja sproby ŭspryniali niapravilna. Vy ž razumiejecie, što hramadstva nastrojena vielmi ahresiŭna adnosna padziejaŭ va Ukrainie, tamu miratvorčyja zajavy taksama vyklikajuć ahresiju.
— Nijakich palityčnych zaklikaŭ nie było?
— Nie, maje zakliki — miratvorčyja. Heta nie palityka. Śviatar, jaki zajaŭlaje ab nieabchodnaści prymireńnia, vykonvaje zapaviedź Božuju «Dabraščasnyja miratvorcy».
— Jak prychadžanie pastavilisia da vašych vykazvańniaŭ?
— Bolšaść ź ich pieražyvajuć z nahody Ukrainy, ale nie krytykujuć mianie. Ale niekatoryja palityčna aktyŭnyja hramadzianie ŭspryniali maje słovy niehatyŭna. Jany mnie ŭsio heta vykazvali, časam navat u rezkaj formie.
— A ŭkraincy padtrymali vas?
— Na prychodzie jość niekalki ŭkraincaŭ, jakija vielmi pieražyvajuć praz toje, što zdaryłasia. Jany znachodzili ŭva mnie śviatara, jaki razumieje ich ciažkaje stanovišča.
— Vas nie pazbavili sanu za vašyja vykazvańni?
— Nie. Chacia hučali raźjušanyja hałasy. Na jeparchiju i na naš prychod byŭ akazany dosyć mocny cisk hramadskaj dumki, ludzi patrabavali, kab jeparchija pazbaviła mianie śviatarskaha sanu. I jeparchija niejkim čynam paddałasia hetamu cisku. Mianie pasłali dla vypraŭleńnia ŭ Troica-Sierhijevu pustyń Strelna. Ale takim čynam mianie vyvieli z-pad udaru, bo dadzienaje dziejańnie jeparchii mieła na mecie jašče i spynić niekatoryja dyskusii na prychodzie.
— Jak vy staviciesia da pieravodu ŭ Strelna?
— Ja liču heta całkam zakanamiernaj źjavaj. Cisk navakolnaj hramadskaj dumki zanadta mocny. Ja b paraŭnaŭ sproby spynić heta sa sprobami spynić nastup dnia abo nočy. Heta pavinna było zdarycca. Jak heta ni sumna, ale hramadskaja nianaviść u nas praźmiernaja. Ja spadziajusia, što adbudziecca supakajeńnie, i prablema sydzie. Što ž datyčyć słužeńnia, to ŭ mianie jość śvieckaja praca, viečary ja pravodžu sa svaimi dziećmi. Tamu pryjazdžać u Troica— Sierhijevu pustyń budu ŭ vychodnyja. Jeparchija pra heta viedaje i stavicca z razumieńniem.
— Vaš pieravod časovy?
— Nie było skazana, na jaki termin. Ja nastrojeny na toje, što budu tam znachodzicca vielmi doŭha.
— Vy kazali pra prymireńnie z Ukrainaj. A što dumajecie pra adnu z pryčynaŭ kanfliktu — pra dałučeńnie Kryma?
— Vykažu svajo asabistaje mierkavańnie — heta nie pazicyja RPC abo jeparchii. Ja staŭlusia da hetaha rezka admoŭna. My parušyli tym samym mižnarodny dahavor. Parušyli navat paślavajenny ład śvietu, za jaki pralivali kroŭ našyja dziady na palach Vialikaj ajčynnaj vajny, kab stvaryłasia AAN, kab śviet znachodziŭsia ŭ adnosnaj biaśpiecy. My ździejśnili pamyłku i adšturchnuli bolšaść nasielnictva Ukrainy hetym krokam. Ja liču, što na temu Kryma nieabchodny dyjałoh, kab pryjści da parazumieńnia.
— Darečy, pra pazicyju. Składvajecca ŭražańnie, što RPC padtrymlivaje pazicyju dziaržavy, a asobnyja śviatary abaviazkova pavinny jaje tranślavać.
— Carkva nie moža być častkaj dziaržavy. Ale na jaje ździajśniajecca niepaźbiežny ŭpłyŭ z boku ŚMI i hramadstva… Adnak naša carkva robić miratvorčyja zajavy. Hety hołas amal nie čuvać, jaho nie chočuć tranślavać ŚMI. U hetym dačynieńni pra carkvu amal što zabylisia. Zaraz tranślujucca tolki vajaŭničyja, rezkija zajavy. Carkva vykonvaje svaju misiju, ale pastaŭlenaja ŭ takija ramki, kali rabić heta ciažka. Najśviaciejšy Patryjarch kazaŭ, što carkva pavinna stajać pa-nad sutyčkaj, jana nie moža być na adnym baku, i jana sapraŭdy tak robić. Ale, viadoma, mnohija śviatary jak hramadzianie svajoj krainy vykazvajucca pryvatnym čynam, i takich vykazvańniaŭ mnostva. Heta narmalnaja źjava.
— Raniej kiraŭnik samaabvieščanaj «Adeskaj narodnaj respubliki» Valeryj Kavuraŭ zajaviŭ, što ŭkrainskija śpiecsłužby sprabavali zatrymać śviataroŭ, jakija padtrymlivali miascovy Antymajdan, — Aleha Maraka i Andreja Novikava, akramia taho, pavodle jahonych dadzienych, byli pramyja pahrozy raspravy nad mitrapalitam Ahafanhiełam…
— Ja viedaju Andreja Novikava i, viadoma ž, liču, što nie pavinna być takoha cisku. Heta sumna, ja dumaju, što heta taksama vynik našaj ŭzajemnaj nianaviści, ad jakoj treba vylečvacca…
— Vy źviazvalisia z Andrejem Novikavym?
— U nas ź im była dyskusija. U nas roznyja pohlady na padziei i źjavy, jakija adbyvajucca, ale ja padtrymlivaju toje, što jamu było pradastaŭleny prytułak ŭ Rasiei, i jon pražyvaje tut. Niezaležna ad pohladaŭ i padychodaŭ my pavinny prajaŭlać miłasernaść i hasić ahmieni ŭzajemnaj napružanaści.
— Ci možna kazać pra toje, što adbudziecca adździaleńnie Ukrainskaj pravasłaŭnaj carkvy ad Maskoŭskaha patryjarchatu?
— Takoje pytańnie moža vyrašacca tolki na ŭsiepravasłaŭnym uzroŭni. Kali heta adbudziecca, to tolki pavodle carkoŭnych kanonaŭ, ale pakul dla hetaha jašče nie naśpieli ŭmovy ŭ naš čas varožaści i ŭzajemnaha napružańnia.
— Adnak nielha skazać, što toje, što adbyvajecca, nie pieraškadžaje ŭzajemadziejańniu pamiž Ukrainskaj pravasłaŭnaj carkvoj i Maskoŭskim patryjarchatam.
— Hetyja palityčnyja padziei sapraŭdy pakłali roŭ pamiž ukraincami i rasiejcami, u tym liku pamiž dźviuma častkami pravasłaŭnaj carkvy — rasiejskaj i ŭkrainskaj. I heta mianie nadzvyčaj turbuje. Hetyja padziei razrazajuć carkvu. My pavinny zrabić usio, kab hetaha nie adbyłosia, heta ŭnutrycarkoŭnyja pytańnie.
— Zaraz, paśla vašaha pieravodu, vy praciahniecie vykazvać svaju pazicyju datyčna nieabchodnaści raźviazańnia supiarečnaściaŭ z Ukrainaj?
— Mnie nie było vyrazna i jasna ahučana, ad jakich svaich zajavaŭ ja mušu admaŭlacca, tamu što zbolšaha ŭsie maje zajavy pakul ciažka asprečyć. Inšaja sprava, niekatoryja ličać, što za hetymi zaklikami da miru chavajecca maja prychavanaja simpatyja da fašystaŭ, banderaŭcaŭ, ale, bačyć Hospad, hetaha niama. Ja paprasiŭ prabačeńnia va ŭsich, u kaho moh.
***
Pasty ijereja Mikałaja Saŭčanki z jahonaj staronki ŭ «Žyvym časopisie»
Pra ŭłasny pieravod
Viarnuŭšysia z Troica— Sierhijevaj pustyni, kudy ja byŭ pryznačany śviaščennačallem na vypraŭleńnie i kudy ja budu jeździć kožnyja vychodnyja, tamu što pa budniach ja pracuju ŭsio žyćcio na śvieckaj pracy, ja vyjaviŭ hrandyjozny vał emacyjnych paviedamleńniaŭ ab maim pieravodzie. Va Ukrainie paviedamleńni pra heta ŭ sacyjalnych sietkach naličvajuć ŭžo tysiačami. Pry hetym z Ukrainy prychodziać sotni listoŭ padziaki, a z Rasiei — bolšaść listoŭ ź vielmi rezkimi słovami, choć jość i słovy padtrymki. Heta jašče raz pakazvaje, jak mocna vajna padzialaje ludziej, pakidajučy ciažkazahojvalnyja rany. Ja b chacieŭ, kab miratvorčyja namahańni duchavienstva nie vyklikali takich dyjamietralna procilehłych mierkavańniaŭ. Što dla hetaha patrebna? Dla hetaha patreba, kab miratvorčaja pazicyja duchavienstva i naahuł Carkvy hučała jasna i vyrazna, čaho pakul jašče niama. Mnie zdajecca, što nieabchodna jasnaje razumieńnie, što miratvorčaść nie źjaŭlajucca palitykaj, a miratvorčyja mierapryjemstvy nie źjaŭlajucca palityčnymi. Prynamsi va ŭsim śviecie i, ŭ tym liku, u inšych Pamiesnych Pravasłaŭnych Cerkvach heta razumiejecca tak. Udzieł duchavienstva ŭ miratvorčych mierapryjemstvach ličycca całkam zvyčajnym, zrazumiełym i zusim nie dziŭnym. Chutčej navat naadvarot: niaŭdzieł duchavienstva ŭ miratvorčych mierapryjemstvach vyklikaje ździŭleńnie. Niaŭžo ŭ Rasiei nie tak? A čamu? Akramia taho, udzieł duchavienstva ŭ miratvorčych mierapryjemstvach u duchoŭnaj vopratcy śviatara, jak mnie zdajecca, nie moža vyklikać narakańniaŭ ŭ kananičnaści hetaha. Rasa i padraśnik źjaŭlajucca mienavita štodzionnym adzieńniem śviatara, pa carkoŭnych praviłach, śviatar u ich abaviazany chadzić zaŭsiody, jak heta my bačym u tradycyjnych pravasłaŭnych narodaŭ, naprykład, u hrekaŭ. U SSSR hetaja tradycyja amal źnikła pad najmacniejšym ciskam bahazmahańnia, ale, naprykład, u Ruskaj Zamiežnaj Carkvie śviataram zaŭsiody rekamiendujecca chadzić u duchoŭnaj vopratcy, akramia śvieckaj pracy, i heta jość nieparušnaja tradycyja. Čamu ž dla ŭdziełu ŭ miratvorčym mierapryjemstvie duchoŭnuju vopratku treba zdymać? Ci jość u hetym niejki asablivy sens? Jevanhielle prasłaŭlaje miratvorčaść, nie abumoŭlivajučy jaho našeńniem abo nienašeńniem rasy pry hetym. Tamu, całkam uśviedamlajučy stałuju dla RPC MP tradycyju naahuł nijak nie ŭdzielničać duchavienstvu ŭ lubych, navat ułasnych, miratvorčych mierapryjemstvach, mnie chaciełasia b, kab hetaje pytańnie było naležnym čynam asensavanaje. I tym bolš ciažka pabačyć u zakliku da miru z Ukrainaj i ukrainskim narodam parušeńnie śviatarskaj prysiahi. Što da inicyjatyvy majho pieravodu, to ja nie chacieŭ by zvužać pytańnie da proźviščaŭ abo pakazvać palcam na prychadžan abo klir chrama. Nie prychadžanie chrama i klir «zackavali» adnaho mierkavanaha miratvorca ŭ rasie z kryžam i ściažkom brackaj Ukrainy, a nianaviść, hnieŭ i lutaść niekatoraj častki našaha hramadstva. Na chram i na jeparchiju byŭ akazany dosyć mocny cisk z metaj uvohule pazbavić mianie śviatarskaha sanu. Mnie pryjšło šmat listoŭ z praklonami i abiacańniami pazbavić sanu i z hańbaj vyhnać z Carkvy. Było mnostva lutych abvinavačvańniaŭ u banderaŭščynie i fašyźmie. Takoje niezdarovaje mierkavańnie vielmi raspaŭsiudžanaje ciapier. Hety cisk hramadskaj dumki nadzvyčaj upłyvovy. Heta mienavita cisk hramadskaj dumki, to bok mierkavańnie bolšaści hramadstva, a nie inicyjatyva prychodu ci tym bolš duchavienstva chrama. Tamu abaroncy darma šukajuć korań prablemy ŭ chramie. Jon nie tam. Jon u samim hramadstvie. Jon zvonku chrama. Heta pavinna było zdarycca niepaźbiežna, zanadta mocny zarad nianaviści i asudžeńnia da ciapierašniaj Ukrainy. Da baraćby z hetym ducham žorstkaści ja i zaklikaŭ. Mienavita hetym ducham žorstkaści tłumačacca praklony i asudžeńni ŭ adras ściažka brackaj Ukrainy z hierbam rodu Rurykavičaŭ na im (tryzubcam). Hetyja žorstkija kamientary vielmi raspaŭsiudžanyja ciapier. Dyk moža, čas vyhnać hetuju žorstkaść z našych sercaŭ? Ja spadziajusia, što na prychodzie nastupić supakajeńnie, i jašče raz prašu va ŭsich prabačeńnia, kali niejkija maje słovy mahli zdavacca pravakacyjnymi.
Pra sieparatystaŭ
Videazvarot kamandujučaha vojskami DNR śviedčyć ab tym, što ŭ Danieckaj vobłaści miascovaje nasielnictva nie žadaje ŭstupać u atrady dabraachvotnikaŭ i vajavać sa svaimi ŭkrainskimi bratami pa toj bok frontu. Strałkoŭ, budučy ŭsio ž taki čałaviekam niesumnienna ščyrym, adkryta pryznaje, što ŭ jahonyja atrady nie ŭstupiła navat 20 aficeraŭ ź miascovych žycharoŭ. A sami jaho atrady — heta «maleńkaja hrupa dobraachvotnikaŭ z Rasiei i Ukrainy» (pryčym Rasieja staić na pieršym miescy). Z 130 tys. nasielnictva Słavianska i 250 tys. nasielnictva Kramatorska nie znajšłosia achvočych vajavać sa zbrojaj u rukach dasłoŭna «suprać usioj Ukrainskaj armii» (heta značyć, mienavita suprać kadravaj armii, a nie suprać mifičnych pałkoŭ «Pravaha Siektara» ). Hety zvarot hučyć, jak vieličeznaja nadzieja na toje, što vajna nie razharycca. Škada, što ašukanyja prapahandaj ludzi takija, jak Strałkoŭ, mohuć stacca achviarami u hetym samahubnym i zusim nieapraŭdanym mieciažy. Suprać bratoŭ nie vajujuć. I sumleńnie žycharoŭ Danieckaj vobłaści spraviadliva hetamu piarečyć. Voś čamu jany nie iduć pralivać kroŭ. Mir blizka. Niachaj Hospad nablizić hety mir!
Psichoz «Maskali na hilacy». 15 internet-zapytaŭ u miesiac ź Lvoŭskaj vobłaści i 30 tys. z Rasiei
«Znak-deviz banderaŭskaha fašyzmu», jaki prasłaviŭsia na ŭsiu Rasieju, tak zvany kryk «maskalaku na hilaku» na spravie akazvajecca zusim nieŭžyvanym u Zachodniaj Ukrainie vyrazam. Statystyka zapytaŭ Jandeks.Dyrekt pakazvaje, što hetaje słovazłučeńnie za sakavik 2014 było nabrana 29,9 tys. razoŭ z Rasiei, ale tolki 15 razoŭ ź Lvoŭskaj vobłaści.
Što heta aznačaje? Tolki toje, što ŭ našym paralizavanym stracham i niepryjaznaściu rozumie my sami siabie viešajem.
Toje ž samaje treba skazać i pra deviz «śmierć voraham». Ź Lvoŭskaj vobłaści za sakavik miesiac u Jandeksie takija zapyty byli nabranyja tolki 30 razoŭ. Pry hetym u nas, u Rasiei, hety vyraz ličycca ledź nie simvałam sučasnaj Ukrainy.
Dyk dzie padstavy dla nianaviści?
Dzie apraŭdańnie stralbie i strachu?
Abrazy rasiejcaŭ va ŭkrainskim internecie niepapularnyja, zychodziačy sa statystyki internet-zapytaŭ
Usiu Rasieju abyšli niekalki videazapisaŭ z ukrainskimi školnikami abo moładździu, što kryčać: «Chto nie skača, toj maskal!» U paryvie lutaści sacyjalnyja sietki ŭ Rasiei pradstaŭlali spravu tak, što ŭsie ŭkraincy nienavidziać rasiejcaŭ, što tak łajecca, skača i hojsaje usia Ukraina. U adkaz paryvy lutaści na ŭsich uzroŭniach rasiejskaha hramadstva nie ścišvajucca dahetul. Stracili zdarovy stan duchu i mnohija chryścijanie. Adzin pravasłaŭny internet-resurs vusnami hałoŭnaha redaktara paśla hetaha zajaviŭ, što ŭkraincy, maŭlaŭ, zaŭsiody nienavidzieli rasiejcaŭ, nienavidziać i ciapier, a tamu braterstva dvuch narodaŭ — heta fikcyja, i my na samaj spravie vorahi. Ci tak heta? Nakolki abrazy ŭ adras rasiejcaŭ papularnyja va ŭkrainskim hramadstvie?
Na chvilinku adciahniemsia ad jevanhielskich cytataŭ pra luboŭ da bližniaha i pra miratvorčaść i pakličam na dapamohu prostuju matematyku. Dakažam ź jaje dapamohaj toje, što nie bačać ačarśćviełyja nianaviściu i pieraduziataściu našyja suajčyńniki. Kali dušy paškodžanyja, źvierniemsia da rozumu. Takim čynam, nakolki ž papularnyja abrazy rasiejcaŭ va ŭkrainskim internecie?
Statystyka internet-zapytaŭ łahičnaha vidu «+chto +nie skača +toj maskal» u sistemie Jandeks.Dyrekt niečakana dla mnohich pakazvaje dziŭnuju reč. Choć dola pošukavaj sistemy Jandeks składaje va Ukrainie kala 43,5 % i sastupaje Huhłu (54,5 %) i choć dola zapytaŭ na ŭkrainskaj movie varjujecca ad 2-3 % u Krymie i Łuhanskaj vobłaści da 32% ŭ Lvoŭskaj, tym nie mienš abraźlivyja zapyty takoha vidu akazvajucca całkam niepapularnymi ŭ Zachodniaj Ukrainie, ale nadzvyčaj papularnymi na ŭschodzie Ukrainy i ŭ Rasiei.
Za sakavik miesiac 2014 za ŭsiaho pa Rasiei zapytaŭ łahičnaha vidu «+ chto + nie skača + toj maskal» było 33,5 tys., u toj čas, jak va ŭsioj Ukrainie tolki 1954. Bolš za toje, z hetych mienš čym za dźvie tysiačy zapytaŭ, pieravažnaja bolšaść była vykanana zusim nie ŭ abłaściach Zachodniaj Ukrainy. Tak, vobłaściu z najbolš častym vykanańniem hetaha zapytu va Ukrainie staŭ, jak ni dziŭna dla mnohich, Krym. Tam takich zapytaŭ było vykanana 619, ci amal tracina ad usich ukrainskich. Na druhim miescy Kijeŭskaja vobłaść (355 zapytaŭ). na trecim — Danieckaja (309 zapytaŭ), na čaćviortym Charkaŭskaja (138) i Dnieprapiatroŭskaja (136). Kolki ž było takich zapytaŭ u zachodnich abłaściach Ukrainy? Ź Lvoŭskaj vobłaści takich zapytaŭ za ceły sakavik miesiac było 4 (čatyry ), ź Ciarnopalskaj — nul i ź Ivana-Frankoŭskaj — taksama nul.
Nie mienš cikavaj akazvajecca i statystyka zapytaŭ sa słovam «kacap». Zdavałasia b, kali ŭ najaŭnaści nianaviść da rasiejcaŭ, to takich zapytaŭ musić być mnoha. Abraźlivyja słovy buduć prysutničać u artykułach, natatkach, videazapisach. Ale što ž my bačym na samaj spravie? Za sakavik miesiac 2014 hoda ŭ Rasiei takich zapytaŭ było ažyćcioŭlena 121,8 tys., a va Ukrainie tolki 15 tys. Adnak u vypadku Ukrainy navat hetaja amal dziesiacirazovaja roźnica jašče nie adlustroŭvaje ŭsioj karciny źjavy. Reč ŭ tym, što z 15 tys. zapytaŭ va Ukrainie sa słovam «kacap», na Zachodniuju Ukrainu prychodzicca MIZERNAJA MIENŠAŚĆ. Lidarami pa takich zapytach znoŭ akazvajucca vobłaści Uschodu i Krym, u toj čas jak statystyka takich abraźlivych zapytaŭ pa Zachodniaj Ukrainie vyhladaje nastupnym čynam: ź Lvoŭskaj vobłaści — 286 zapytaŭ, z Rovienskaj — 153, ź Ivana-Frankoŭskaj — 64 i z Ternopalskaj — 56.
Jak možna abahulnić atrymanuju statystyku abraźlivych dla rasiejcaŭ vyrazaŭ va ŭkrainskim i rasiejskim internecie? Tolki tak, što my, rasiejcy, abražajem sami siabie i padazrajem ukraincaŭ u nianaviści. My šukajem prajavy nianaviści, jakija kiravalisia stracham ci hnievam. Šukajem i znachodzim toje, što nam zdajecca. Adnak statystyka i matematyka pakazvajuć zusim advarotnaje. Ukraincy navat u Zachodniaj Ukrainie nie majuć zvyčaju vykarystoŭvać łajanku ŭ dačynieńni da rasiejcaŭ.
Paśla takich matematyčnych dokazaŭ ja spadziajusia, što i jevanhielskija cytaty ab miry i lubovi da bližniaha buduć usprymacca bolš zrazumieła. Tak ci jość choć niejki sens u vajnie, kali z taho boku nie nazirajecca nianaviści? Navošta ŭsie hetyja ŭzbrojenyja zachopy dziaržaŭnych budynkaŭ? Navošta ŭsie hetyja raskoły ŭ krainie? Navošta, kali my sami ŭnušyli sabie nianaviść i vierym u jaje? Ci nie pryśpieŭ čas vyjści z matrycy złości, pomsty i vajny? Ci nie čas prymirycca?
Pra fienomien strachaŭ, źviazanych z «Pravym siektaram». Statystyka internet-zapytaŭ pa rehijonach i miesiacach
Nianaviść, strach, panika, praha pomsty, hnieŭ. Mienavita takija pačućci ŭ asnoŭnym adčuvajuć žychary Rajeii ŭ adnosinach da «Pravaha siektara». Hetaja arhanizacyja stała najviadomaj i najbolš zhadvanaj ŭ Internecie palityčnaj arhanizacyjaj. U sakaviku słovazłučeńnie «Adzinaja Rasieja» nabirałasia ŭ pošukavikach Jandeksa 140 tys. razoŭ, a «Pravy Siektar» — 660 tys. razoŭ. U čatyry razy bolš. Častata ŭžyvańnia słovazłučeńnia «Pravy Siektar» vyrasła nastolki, što ŭžo stała paraŭnalnaj z užyvańniem słova «Pucin».
U čym ža sprava? Jak atrymałasia, što arhanizacyja, jakaja na Majdanie nie mahła vystavić i sotniu bajevikoŭ, uzbrojenych tolki dručkami, stała vyklikać strach i žach va ŭsich žycharoŭ Rasiei? Bo i ciapier hetaja arhanizacyja naŭrad ci moža naličyć bolš za adnu-dźvie sotni bajcoŭ, u asnoŭnym biez zbroi, jakija znachodziacca da taho ž daloka ŭ tyle. Viadoma ž, asacyjaavanych ź joj ludziej abo demanstrantaŭ bolš, adnak my lohka možam pabačyć, što na demanstracyjach abo šeściach arhanizavany atrad bajevikoŭ naličvaje nie bolš za 50 čałaviek navat u Kijevie. Astatnija ŭdzielniki demanstracyj — zvyčajnyja mirnyja žychary. Jak ža atrymałasia, što takaja niešmatlikaja hrupa zmahła avałodać rozumami ŭsioj Vialikaj Rasiei?
Hetyja zahadki lohka razhadvaje dziakujučy razumieńniu nastupnych cikavych zakanamiernaściaŭ. Pieršaja cikavaja zakanamiernaść bačnaja z dynamiki rostu kolkaści zapytaŭ słovazłučeńnia «Pravy Siektar» u sistemie Jandeks. Značna spraščaje analiz toj fakt, što na rasiejskaj i na ŭkrainskaj movach napisańnie arhanizacyi adroźnivajecca tolki na adnu litaru i tamu ŭ statystycy Jandeks.Dyrekt jany ŭličvajucca sumiesna.
U listapadzie 2013 słovazłučeńnie «Pravy Siektar» było nabrana ŭ pošukavikach Jandeksa ŭsiaho tolki 877 razoŭ. U śniežni 2013 hoda —1956 razoŭ. U studzieni 2014 hoda — 57,3 tys. razoŭ. U lutym 2014 hoda — 308,8 tys. razoŭ. U sakaviku 2014 hoda — 660 tys. razoŭ.
My bačym łavinapadobny rost, jaki tłumačycca šyrokamaštabnaj volnaj abo mižvolnaj rekłamaj rasiejskich ŚMI. Adnak bolš za ŭsio cikavy navat nie stolki vializny rost, kolki hieahrafija hetaha rostu. Sprava ŭ tym, što vialikaj pamyłkaj było b ličyć vieličezny rost zapytaŭ rostam žadańnia žycharoŭ Ukrainy ŭstupać u bajavyja arhanizacyi «Pravaha Siektara». Akurat hetaha i nie nazirajecca. A hieahrafija zapytaŭ dazvalaje adnaznačna vyznačyć pryrodu i matyŭ cikavaści ludziej da «Pravaha Siektara».
Jakaja ž hieahrafija zapytaŭ sa słovazłučeńniem «Pravy Siektar»?
Sprava ŭ tym, što z ahulnaj kolkaści 660 tys. zapytaŭ u miesiac na rehijony Zachodniaj Ukrainy prypadaje MIZERNAJA DOLA.
Tak, naprykład, ź Ivana-Frankoŭskaj vobłaści było tolki 742 zapytaŭ, z usioj Ciarnopalskaj vobłaści — 602. Z Rovienskaj vobłaści — 1244 zapytaŭ. Bolš za ŭsio z Zachodniaj Ukrainy zapytaŭ było ź Lvoŭskaj vobłaści — 2723.
Dla paraŭnańnia z Maskvy było 92,3 tys. zapytaŭ, ź Pieciarburha i Lenvobłaści — 27 tys. Samaje cikavaje, što Lvoŭskaja, Ciarrnopalskaja i Ivana-Frankoŭskaja vobłaści Ukrainy akazalisia SAMYMI APOŠNIMI ABŁAŚCIAMI krainy pa častacie vykarystańnia hetaha słovazłučeńnia ŭ pošukavikach. Bolš za toje, jany akazalisia zzadu navat usich abłaściej Rasiei. Inakš kažučy, tyja samyja vobłaści, jakija musili b dać najbolšuju kolkaść tych, chto spačuvaje hetamu ruchu, na spravie akazvajucca tymi, što najmienš cikaviacca im. Dla prykładu treba zhadać, što ŭ Danieckaj vobłaści zarehistravana 38 tys. zapytaŭ, u Dnieprapiatroŭskaj — 22,7 tys., u Charkaŭskaj — 21,4 tys., u Krymie — 20,3 tys. Takim paradkam, žychary ŭschodnich abłaściej Ukrainy prajaŭlali cikavaść da słovazłučeńnia «Pravy siektar» u internecie ŭ DZIASIATKI RAZOŬ BOLŠ, čym žychary Zachodniaj Ukrainy.
Treciuju važnuju zakanamiernaść vidać z analizu častaty vykarystańnia bolš ŭdakładnienaha zapytu «ŭstupić Pravy Siektar». Choć taki zapyt nie adlustroŭvaje ŭkrainski varyjant frazy, ale ŭsio adno varta pakazać, što takich zapytaŭ za sakavik miesiac było ździejśniena ŭsiaho tolki 1353. Treba razumieć, što daloka nie kožny zapyt padobnaha kštałtu pryvodzić da ŭstupleńnia žychara Ukrainy ŭ niejkuju niešmatlikuju bajavuju hrupu «Pravaha Siektara», jak praviła bolš padobnuju da moładzievaj tusoŭki. Ale samaje cikavaje, što i ŭ hetym słovazłučeńni hałoŭnuju dolu zajmajuć zapyty z uschodu Ukrainy. Tak, naprykład, frazu «ŭstupić Pravy Siektar» nabiraŭ tolki 1 žychar Ciarnopalskaj vobłaści, ale 200 žycharoŭ Dnieprapiatroŭskaj i 176 žycharoŭ Danieckaj vobłaści. Akazvajecca, što zapyty, jakija havorać ab ustupleńni ŭ «Pravy Siektar» nabirali AMAL VYKLUČNA žychary ŭschodnich abłaściej Ukrainy. Tut varta adznačyć, što ŭkrainski ekvivalent frazy «ŭstupić Pravy Siektar» mnoju nie byŭ daśledavany, choć pry hetym treba ŭličvać, što prykładna 30 % čalcoŭ «Pravaha Siektara» na luty 2014 hoda havaryli pa-rasiejsku.
Dadzienaja zakanamiernaść dazvalaje zrabić peŭnyja vysnovy.
1. Cikavaść Zachodniaj Ukrainy da «Pravaha Siektara» vielmi małaja.
2. Cikavaść Uschodniaj Ukrainy i Rasiei da jaho nosić u asnoŭnym matyvy strachaŭ, hnievu i žadańnia daviedacca pra voraha bolej.
3. Pieršaje i druhoje razam dazvalaje zrabić vysnovu, što hetyja strachi mocna pierabolšanyja.
Adnak pry ŭsim pry hetym žyćcio Rasiei, mižnarodnyja padziei, pieramiaščeńni vojskaŭ, vajskovyja vučeńni, usieahulny hnieŭ tłumačacca, jak praviła, mienavita najaŭnaściu «Pravaha Siektara». Pryviedzienaja statystyka pakazvaje sapraŭdnuju vartaść ŭsiaho hetaha hramadskaha i militarysckaha psichozu.