U Horłaŭcy Bieźler zahadaŭ prykavać na dachach pałonnych ukraincaŭ, kab byli «žyvym ščytom»
Adzin z kiraŭnikoŭ terarystyčnaha ruchu na Danbasie, rasijanin Ihar Bieźler pa mianušcy «Bies» zahadaŭ prykavać naručnikami zachoplenych vajennapałonnych na dachach budynkaŭ u Horłaŭcy dla abarony ad mahčymych avijaŭdaraŭ z boku ŭkrainskich sił ATA.
Pra heta paviedamlaje sajt Gorlovka.ua sa spasyłkaj na Vasila Budzika, jaki znachodzicca ŭ pałonie ŭžo 44 dni i jakomu dali mahčymaść źviazacca z redakcyjaj vydańnia.
«Na dachach zachoplenych budynkaŭ Horłaŭskaha horupraŭleńnia milicyi i adździeła pa baraćbie z arhanizavanaj złačynnaściu (ABAZ) buduć dziažuryć vajennapałonnyja — jany stanuć «žyvym ščytom» i kontrmieraj ŭ vypadku mahčymych dalejšych avijaŭdaraŭ. Takoje rasparadžeńnie vydaŭ siońnia «kamandujučy Horłaŭskim harnizonam Narodnaha apałčeńnia Danbasa» Ihar Bieźler (Bies)», — skazaŭ Budzik.
Pavodle jaho słoŭ, «žyvym ščytom» stanuć piaciora vajennasłužačych z Kiravahradskaj vobłaści, dvoje sałdat 25-j asobnaj Dnieprapiatroŭskaj pavietrana-desantnaj bryhady i vadziciel, jaki ich pieravoziŭ.
«Ihar Bieźler zajaviŭ, što jon nie maje dačynieńnia da źbitaha pad Łuhanskam samalota Ił-76, i nie razumieje, ź jakoj pryčyny byŭ naniesieny avijaŭdar pa budynku UUS», — pieradaŭ słovy «Biesa» vajennapałonny.
Reč u tym, što ranicaj 14 červienia — kala 4.30 — byŭ ździejśnieny avijaŭdar pa zachoplenamu budynku Horłaŭskaha harupraŭleńnia milicyi, u vyniku čaho ŭźnikła ŭzharańnie na 3 i 4 pavierchach. U adździele achovy zdaroŭja Horłaŭki raspaviali, što ŭ vyniku avijaŭdaru paciarpieła siamiora čałaviek: šaściora zaraz u reanimacyi, adzin zahinuŭ. Pres-słužba Danieckaj abłdziaržadministracyi paviedamlaje ab dvuch zahinuŭšych u vyniku avijaŭdaru.
Nahadajem taksama, što raniej Bieźler raspaŭsiudziŭ videa insceniroŭki rasstrełu dvuch ukrainskich pałonnych aficeraŭ paśla taho, jak sarvalisia płany pa abmienie pałonnych na žančynu-ahienta FSB, jakaja była zatrymanaja SBU i ciapier znachodzicca ŭ Śledčym izalatary SBU ŭ Kijevie.
5 červienia ŭ Internecie źjaviłasia videa, na jakim «Bies» patrabuje ad Alaksandra Turčynava (na toj čas v.a. prezidenta Ukrainy) vyzvalić zatrymanaha ahienta FSB, inakš jon («Bies») kožnuju hadzinu budzie zabivać pałonnych ŭkrainskich vajskoŭcaŭ.
Zaraz, pa słovach Budzika, Kijeŭ prypyniŭ pieramovy nakont hetaha abmienu.