Minabarony pra pierakidvańnie ŭ krainu Tu-160: My nie kamientujem domysły
U Ministerstvie abarony Biełarusi nie stali kamientavać infarmacyju pra pierakidvańnie ŭ Biełaruś rasijskich stratehičnych bambardziroŭščykaŭ Tu-160, jakaja źjaviłasia siońnia ŭ internecie sa spasyłkaj na rasijskija i ŭkrainskija krynicy. Razmova išła pra ich udzieł u vajennym paradzie 3 lipienia, a zatym časovaje raźmiaščeńnie na adnym ź biełaruskich vajennych aeradromaŭ.
«My nie dajom kamientaryjaŭ adnosna domysłaŭ, — zajaviŭ BiełaPAN načalnik pres-słužby Ministerstva abarony Biełarusi pałkoŭnik Siarhiej Kuźmiankoŭ. — Aficyjnaj infarmacyi pa hetym paviedamleńni my nie vałodajem».
U kancy maja «Biełorusskaja vojennaja hazieta» — aficyjny drukavany orhan Minabarony, paviedamlała, jakaja avijacyja budzie brać udzieł u vajennym paradzie 3 lipienia. Siarod pieraličanych typaŭ samalotaŭ Tu-160 nie značylisia. Pavodle infarmacyi «BVH», u niebie nad Minskam hledačy ŭbačać bajavyja viertaloty Mi-8 i Mi-24, źniščalniki MiH-29, šturmaviki Su-25, vajenna-transpartnyja samaloty Ił-76 i An-26, a taksama piłatažnuju hrupu «Biełaja Ruś» na samalotach Ł-39.
Varta taksama zaznačyć, što rasijskija stratehičnyja bambardziroŭščyki nieadnarazova pieralatali na biełaruskija aeradromy i znachodzilisia ŭ pavietranaj prastory krainy padčas roznych vučeńniaŭ.