U Rasii mohuć zabaranić prodaž piva ŭ PET-tary
Biełaruskija eksparciory piva ŭ PET-tary mohuć stracić dostup na rynak Rasii. U nižniaj pałacie rasijskaha parłamienta Dziarždumie prajšoŭ pieršaje čytańnie zakonaprajekt ab zabaronie prodažu piva ŭ PET-tary na terytoryi krainy, paviedamiŭ telekanał ANT.
Pad pahrozaj moža apynucca nie tolki piva, ale i alej, soki, małako i inšaja pradukcyja ŭ płastykavaj upakoŭcy. PET-taru abjomam bolš jak 0,5 ł mohuć zabaranić užo z 1 studzienia. «Rasijskija parłamientaryi pierakanany, što PET-tara niebiaśpiečnaja dla zdaroŭja, pivavary ž nazyvajuć zakonaprajekt dyskryminacyjnym. Jon abmiažuje dostup na rasijski rynak upakavanaj u PET pradukcyi ź Biełarusi i Kazachstana», — było skazana ŭ efiry.
Telekanał ahučyŭ mierkavańnie vykanaŭčaha dyrektara Sajuza rasijskich pivavaraŭ Viačasłava Mamantava. «Što datyčycca ŭpłyvu hetaha zakonaprajekta na terytoryju Mytnaj prastory, my ličym, što jon źjaŭlajecca niehatyŭnym z punktu hledžańnia taho, što budzie nie sadziejničać pastaŭkam piva ź inšych terytoryj. U Biełarusi, naprykład, piva ŭ PET-upakoŭcy vyrablajecca kala 80 pracentaŭ, i hety zakonaprajekt paŭpłyvaje na naš tavaraabarot. U techničnym rehłamiencie ab biaśpiecy ŭpakoŭki nie isnuje abmiežavańniaŭ na vykarystańnie PET pa lubych padstavach, tamu tyja abmiežavańni, jakija prymajucca ŭ Rasii, nakiravanyja vyklučna suprać našaj industryi», — ličyć jon.
Bujniejšyja hulcy pivavarnaha rynku Rasii ŭžo źviarnulisia z adkrytym piśmom va ŭrad. Pa ekśpiertnych acenkach, akramia źnižeńnia tavaraabarotu zabarona na vykarystańnie płastykavaj tary spravakuje zakryćcio małych i siarednich pivavarnych zavodaŭ, a taksama skaračeńnie rabočych miescaŭ u halinie jak minimum napałavinu.