Paratnikaŭ: Mahčyma, u Łukašenki jość sumnievy nakont rasiejskaha ŭzbrajeńnia
Alaksandar Łukašenka zrabiŭ šerah zajavaŭ na vajskovyja temy, naviedvajučy ŭ Barysavie zavody abaronnaha sektaru. Ci patrebnyja Biełarusi ŭłasnyja zenitna-rakietnyja kompleksy? Što pieraškadžaje pravieści efektyŭnuju reformu biełaruskaha vojska? Na hetyja pytańni adkazvaje kiraŭnik analityčnaha prajektu Belarus Security Blog Andrej Paratnikaŭ.
— Siarod inšaha, Łukašenka daručyŭ stvaryć ajčynny zenitna-rakietny kompleks, jaki pavodle svaich charaktarystyk budzie nia horšy, čym rasiejski «S-300». Jaki sens u hetym? Biełaruś dahetul zakuplała hetyja dy inšyja ZRK u Rasiei. Navošta tady stvarać svoj, kali možna nabyvać rasiejski, da taho ž na ilhotnych umovach?
— Pa-pieršaje, jašče treba razabracca, ci byli tyja ŭmovy ilhotnyja. Pa-druhoje, mabyć, uźnikła patreba ŭ takoj pradukcyi, mahčyma, nia tak lohka stała nabyvać jaje ŭ Rasiei. Albo jość sumnievy, što ŭzbrajeńnie, jakoje pastaŭlajecca z Rasiei, dastatkova dabrajakasnaje, što tam niama nijakich «zakładak», jakija ŭ patrebny momant paprostu adklučać usiu aparaturu, i hetaja zbroja pieratvorycca ŭ nikomu nie patrebnaje žaleźzie.
— Inšyja prykmietnyja słovy Łukašenki — «Nam patrebna mabilnaja armija. My zrabili na heta staŭku. Tamu jaje treba zabiaśpiečyć mabilnymi mašynami z efektyŭnym uzbrajeńniem». Ci aznačaje heta, što Łukašenka zaklikaje pravodzić reformu biełaruskaha vojska chutčej dy radykalniej?
— Mnie zdajecca, što apošnija 20 hadoŭ, pakul Łukašenka pry ŭładzie, hetaja reforma nie spyniałasia. Dakładniej, «reforma» ŭmoŭnaja, bo heta nijakaja nie reforma. Heta było skaračeńnie, ci, jak heta pryniata nazyvać, «aptymizacyja». Tamu Łukašenka pra hetuju «mabilnaść» havoryć hadoŭ 5 apošnich, tut ničoha novaha niama.
— A što pieraškadžaje zabiaśpiečyć hetuju «mabilnaść» — finansavy bok?
— Uvohule, čamu biełaruskaje vojska nie «mabilnaje»? Jany ž nia pieššu tam chodziać. Ale — tak, finansavaje pytańnie vielmi istotnaje, asabliva kali heta tyčycca techničnaha boku. Dziaržava nie vydzialaje na heta patrebnych hrošaj užo bolš za 20 hadoŭ.