Syn babrujskaha błohiera pryhavorany da abmiežavańnia voli pa abvinavačańni ŭ hvałcie adnosna milicyjaniera
U sudzie Babrujska i Babrujskaha rajona Alaksiej Žałnoŭ, syn błohiera Aleha Žałnova, pryznany vinavatym u pryčynieńni hvałtu ŭ dačynieńni da supracoŭnika milicyi i pryhavorany da troch hadoŭ abmiežavańnia voli i 50 młn štrafu ŭ jakaści kampiensacyi maralnaha ŭronu.
Kanflikt pamiž błohieram i supracoŭnikami babrujskaj DAI adbyŭsia 4 vieraśnia 2013 hoda kala budynka Dziaržaŭtainśpiekcyi. Žałnoŭ z synam paličyli, što aŭtamabil DAI staić na tratuary, čym parušaje PDR. Pra heta jany zajavili supracoŭnikam milicyi. Adnak tyja śćviardžali, što mašyna znachodzicca nie na tratuary, a na sumiežnaj terytoryi. Padčas kanfliktu Žałnoŭ i jaho syn z prymianieńniem siły byli zatrymanyja.
Potym supracoŭnik DAI Alaksandr Butoŭski abvinavaciŭ Alaksieja Žałnova ŭ naniasieńni ŭdaru pa tvary, z-za čaho toj atrymaŭ strasieńnie mozhu, skazaŭ Aleh Žałnoŭ. Jon taksama adznačaje, što ŭ pakazańniach śviedak na sudzie było šmat niestykovak, a na videa, dzie byŭ vyjaŭleny kanflikt, nie bačna, kab jaho syn udaraŭ kahości.
«Sudździa Julija Bieraziuk u pryhavory ad 18 lipienia ŭkazała, što piarečańni paciarpiełaha ab nieadpaviednaści pakazańniaŭ śviedak videazapisam, daśledavanym u sudzie, heta sposab paźbiehnuć kryminalnaj adkaznaści. Sens taki, što videazapisy — heta łuchta, hałoŭnaje, što śviedki — supracoŭniki DAI — dajuć adnolkavyja pakazańni, chacia ničoha adnolkavaha ŭ ich niama, za vyklučeńniem taho, što jany nibyta bačyli kroŭ na tvary ŭ Butoŭskaha. A na videazapisie bačna, što nijakaj kryvi i paškodžańniaŭ u jaho na tvary niama», — skazaŭ Aleh Žałnoŭ.
Pavodle jaho słoŭ, Alaksiej Žałnoŭ svaju vinu nie pryznaŭ, i ciapier u siamji vyrašajecca pytańnie ab abskardžańni pryhavoru.
Razam z tym Aleh Žałnoŭ upeŭnieny, što sprava jaho syna, jak i sprava pa tym ža artykule «Nasille abo pahroza prymianieńnia nasilla ŭ dačynieńni da supracoŭnika orhanaŭ unutranych spraŭ», raspačataja ŭ dačynieńni da jaho žonki, źjaŭlajecca pieraśledam błohiera za baraćbu z karupcyjaj u orhanach milicyi i prakuratury.
Nahadajem, što Aleh Žałnoŭ na praciahu niekalkich hadoŭ sudzicca ź milicyjaj Babrujska, abvinavačvajučy niekatorych jaje supracoŭnikaŭ u supraćzakonnych dziejańniach i karupcyi. U svaju čarhu tamtejšyja pravaachoŭniki raspačynajuć u dačynieńni da błohiera ŭsio novyja spravy, bolšaj častkaj pa Kodeksie ab administracyjnych pravaparušeńniach.