Prajekt «Zialonaja karta» staŭ dastupny dla Homiela
Žychary Homiela zmohuć atrymlivać infarmacyju ab punktach pryjomu druhasnaj syraviny i niepatrebnych rečaŭ u svaim horadzie z dapamohaj prajekta «Zialonaja karta» — greenmap.by Centra ekałahičnych rašeńniaŭ (CER).
Pavodle słoŭ kaardynatara prajekta «Zialonaja karta» Maryi Sumy, žychary Homiela «ŭsio čaściej zadajucca pytańniem, kudy zdać pieraharełuju lampačku z utrymańniem rtuci, hraduśnik abo stary aŭtamabilny akumulatar». «Sabraŭšy, strukturavaŭšy i raźmiaściŭšy źviestki ab miescach zboru adchodaŭ, jaki pierapracoŭvajucca i niebiaśpiečnych, u adnym miescy ŭ internecie, my robim hetuju infarmacyju bolš dastupnaj dla bolš šyrokaha koła hamialčan. Heta vielmi važna, asabliva dla takoha bujnoha horada», — padkreśliła jana.
Ekałahičnaja karta Homiela była stvorana supracoŭnikami CER pry padtrymcy miascovaj Asacyjacyi dziaciej i moładzi. Na kartu naniesieny nie tolki punkty pryjomu niebiaśpiečnych adchodaŭ, ale i miescy zboru dobrych rečaŭ, jakija pieryjadyčna traplajuć na zvałki, — staroj mebli, techniki, adzieńnia, knih, cacak i inšaha.
«Zialonaja karta» — heta hramadski internet-prajekt, jaki ŭjaŭlaje saboj interaktyŭnuju kartu z naniesienymi na joj punktami zboru druhasnych materyjalnych resursaŭ i niepatrebnych rečaŭ. Prajekt zapuščany Centram ekałahičnych rašeńniaŭ u lipieni 2012 hoda ŭ Minsku. Paźniej na kartu byli taksama naniesieny Hrodna, Brest, Mahiloŭ, Połack i Navapołack, Lida, Słonim, Navahrudak, Salihorsk i Baranavičy.