Polskamu muzyku nie dali biełaruskuju vizu
Lidaru polskaha rehi-kalektyvu Maleo Reggae Rockers Daryjušu Malejonaku admovili ŭ vydačy biełaruskaj vizy. Jon miarkuje, pryčyna ŭ tym, što ŭ studzieni hetaha hoda hrupa vystupała na płoščy Niezaležnaści ŭ Kijevie ŭ padtrymku prychilnikaŭ jeŭraintehracyi Ukrainy, paviedamlaje polski štodziońnik Gazeta Polska Codziennie.
Daryjuš Malejonak płanavaŭ vystupić na fiestyvali chryścijanskaj muzyki ŭ kancy lipienia pad Minskam. «Biełaruskija čynoŭniki, atrymaŭšy śpis artystaŭ, jakija pavinny pryjechać, adrazu zajavili, što my — palityčna anhažavanyja, pakolki vystupali na kancercie na kijeŭskim Majdanie. Arhanizatary fiestyvalu čuli, što z-za hetaha Maleo Reggae Rockers nie atrymajuć viz», — cytuje vydańnie Daryjuša.
Na dumku muzyki, takaja reakcyja biełaruskich čynoŭnikaŭ na vystup hurta ŭ inšaj krainie krasamoŭna pakazvaje situacyju, jakaja skłałasia ŭ postsavieckich krainach. «Kali majo imia značycca ŭ niejkich śpisach biełaruskich čynoŭnikaŭ, značyć, jany nadajuć vialikaje značeńnie majoj muzycy, jany zaniepakojenyja hetym. Heta nahadvaje mnie pra 1980-ja hady, kali muzyka ŭ Polskaj Narodnaj Respublicy była svajho rodu zbrojaj. Siońnia biełaruskija ŭłady bajacca muzyki, bajacca słoŭ. Svabodnaja kultura ŭjaŭlajecca im čymści niebiaśpiečnym», — dadaŭ lidar polskaj hrupy.
Sproba BiełaPAN atrymać kamientar u pasolstvie Biełarusi ŭ Polščy pośpiecham nie ŭviančałasia. U dyppradstaŭnictvie zajavili, što «nie kamientujuć padobnyja pytańni».