Fransua Ałand aženicca z aktorkaj Žuli Haje ŭ dzień svajho 60-hodździa
Chutka Francyju nakryje chvala ŭračystych mierapryjemstvaŭ. Prezident krainy Fransua Ałand adśviatkuje adnačasova dźvie padziei — svajo 60-hodździe i viasielle. Mahčyma, takim čynam Ałand vyrašyŭ zekanomić, kab nie zaprašać haściej dvojčy.
Jak paviedamlaje Le Parisien, prezident Francyi Fransua Ałand płanuje ažanicca sa svajoj siabroŭkaj — aktorkaj Žuli Haje. Cyrymonija moža adbycca 12 žniŭnia, mienavita ŭ hety dzień Fransua Ałandu spaŭniajecca 60 hadoŭ. Dziesiacidzionny adpačynak u Ałanda pačniecca 5 žniŭnia. Tamu ŭračystaści možna pravieści, nie adciahvajučysia na dziaržaŭnyja spravy.
Paviedamlajecca, što vyrašycca na adkazny krok i parvać z chałaściackim žyćciom Ałanda paprasili siabry Sacyjalistyčnaj partyi Francyi, jakuju toj uznačalvaje, kab stvaryć «bolš stabilny i reśpiektabielny imidž». Na dumku pradstaŭnikoŭ partyi, paśla razryvu Ałanda z hramadzianskaj žonkaj Valery Tryjerviejler jaho asabistaje žyćcio stvaraje ŭražańnie tajamničaj, tamu niehatyŭna adbivajecca na ŭsprymańni vobrazu prezidenta.
Miž tym u chodzie vystupleńnia 14 lipienia, kali Francyja adznačaje Dzień uziaćcia Bastylii, Fransua Ałand nie zachacieŭ kazać pra źmieny ŭ jaho asabistym žyćci. Francuzski lidar skazaŭ žurnalistam: «Kali ŭ mianie źjavicca jakaja-niebudź infarmacyja, kab padzialicca z vami, ja heta abaviazkova zrablu. Ale ŭ mianie takoj nahody pakul niama».
Šlub z Žuli Haje stanie pieršym dla Fransua Ałanda. Jaho adnosiny z Valery Tryjerviejler i z Mary-Siehalen Ruajal (Ruajal naradziła čaćviarych dziaciej Ałandu) nie byli aficyjna zarehistravanyja. Žuli Haje ŭžo była zamužam za arhientynskim režysioram Santjaha Amihareu, u pary jość dvoje dziaciej.
Žuli Haje ŭ svaje 42 hady źjaŭlajecca viadomaj u Francyi aktorkaj i pradziusarkaj. Za svaju karjeru jana źniałasia bolš čym u 30 filmach i sieryjałach. Infarmacyja ab tym, što prezident Francyi sustrakajecca z Žuli Haje, u francuzskich ŚMI źjaviłasia 10 studzienia 2014 hoda.