Piać faktaŭ pra zvolnienaha siońnia ministra finansaŭ Andreja Charkaŭca
Siońnia Alaksandr Łukašenka vyzvaliŭ Andreja Charkaŭca z pasady ministra finansaŭ. Novy kiraŭnik viedamstva pakul nie pryznačany.
Chvaroba
Razmovy pra adstaŭku Charkaŭca aktyŭna cyrkulavali apošnija paru miesiacaŭ. I pryčynaj tut byŭ nie kiepski stan našaj ekanomiki ŭ cełym i finasavaj składnoj u pryvatnaści, a stan zdaroŭja ministra. Apošnija paŭhady Charkaviec nie ŭźnikaŭ u stužkach navin, nie ŭdzielničaŭ jon u kalehii ministerstva. Nie ŭklučyli jaho i ŭ skład Rady biaśpieki, chacia ministr finansaŭ tam zaŭsiody prysutničaŭ. Pavodle niepaćvierdžanaj infarmacyi, Charkaviec ciapier znachodzicca na lačeńni ŭ adnoj z krain Jeŭrasajuza. Admietna, što i papiarednik Charkaŭca Mikałaj Korbut syšoŭ z pasady pa stanie zdaroŭja, jaho raźbiŭ insult.
29 hadoŭ u ministerstvie finansaŭ
Bijahrafija Andreja Charkaŭca nie nadta bahataja na fakty. Naradziŭsia ŭ 1963-m u Minsku. Skončyŭ narhas u 1985-m. Ad hetaha samaha hoda pryniaty na pracu ŭ Ministerstva finansaŭ. Tak niaźmienna i adpracavaŭ da ciapierašniaha momanta. Taksama ŭ 2006-m atrymaŭ dadatkovy dypłom z Akademii kiravańnia pry prezidencie. U toj hod taksama vypuskalisia ministr pa padatkach i zborach Uładzimir Pałujan i były namieśnik kiraŭnika Administracyi prezidenta Valeryj Ivanoŭ.
Źniešni dziarždoŭh pavialičyŭsia ŭ try razy
Najčaściej naviny pra Charkaŭca źjaŭlalisia nastupnyja: «Uvajšoŭ u skład biełaruskaj delehacyi, jakaja nakiravałasia…» A horad možna było padbirać – Maskvu, Łondan, Vašynhton ci Tokia. Kredyty Biełaruś atrymlivała, ale naŭrad ci heta prynosiła absalutna žadanych vynikaŭ. Za čas pracy Charkaŭca na pasadzie ministra finansaŭ źniešni dziaržaŭny doŭh krainy pavialičyŭsia ŭ 3,3 razy. Na pačatak 2009 hoda jon składaŭ 3,7 miljardy dalaraŭ, to na pačatak 2014 – užo 12,4 miljardy dalaraŭ.
Učastak u Viaśnincy
Ministr finansaŭ Charkaviec źbirajecca ci źbiraŭsia pabudavać žyllo ŭ «novych Drazdach» – minskim rajonie Viaśninka. Učastak ziamli kaštuje tam 300-400 tysiač dalaraŭ, ale čynoŭniki atrymali ziamlu ŭ padarunak ad Minharvykankama. Praŭda, majontak Charkaviec pakul nie pabudavaŭ.
Padziaka i niałaska Łukašenki
U minułym hodzie Łukašenka vykazaŭ Charkaŭcu ŭdziačnaść za «pładatvornuju pracu i asabisty ŭkład u praviadzieńni efiektyŭnaj biudžetna-padatkovaj palityki». Cikava, što ŭ toj samy hod u sakaviku Łukašenka pałochaŭ Charkaŭca turmoj. Padčas sustrečy z staršynioj KDK Alaksandram Jakabsonam havorka zajšła ab prablemy «Biełaruśkalija». Jakabson prainfamavaŭ, što dyrektarka «Biełaruskaha narodnaha strachavoha piensijnaha fonda», jakoje atrymlivała vialikija srodki z «Biełaruśkalija» na dobraachvotnaje strachavańnie dadatkovaj piensii, razam z mužam mieli za hod 3 miljardy prybytkaŭ. Łukašenka patrabavaŭ, kab strachavańniem zajmalisia dziaržaŭnyja ŭstanovy. «Try miljardy! Adkul hetyja hrošy?! Jany što, kalijnyja ŭhnajeńni vyrablajuć i pradajuć? Nie. I biezdapamožny Minfin!» — aburaŭsia Łukašenka. «Da kanca sakavika ŭsie pytańni rašyć. Nie vyrašyć, Kiryjenku ŭ kamieru. A naŭzdahon — ministra», — daručyŭ Łukašenka staršyniu KDB. Ale ŭ turmu nichto nie sieŭ.