Biełaruski baksior uźlacieŭ na viaršyniu suśvietnych rejtynhaŭ u 39 hadoŭ!
39-hadovy biełaruski baksior Siarhiej Chamicki uźlacieŭ na viaršyniu suśvietnych rejtynhaŭ i dniami budzie bicca z zornym niamieckim bajcom Robiertam Štyhlicam, dvuchrazovym čempijonam śvietu.
I choć mižnarodnaja spartovaja presa aktyŭna piša pra biełarusa, na Baćkaŭščynie pra jaho amal nie viedajuć. A Siarhiej tym časam uklučyŭsia ŭ baraćbu za pojas čempijona płaniety pa boksie.
Chto ž taki Siarhiej Chamicki? I jakim čynam jamu ŭdałosia raskrycca ŭ takim pavažanym uzroście?
— Ja try hady zajmaŭsia futbołam. Kali mnie było 10, u škołu pryjšli treniery nabirać dziaciej na boks, — uspaminaje dziacinstva Siarhiej Chamicki. — Nie prajšło i miesiaca, jak usie viarnulisia na futboł. Tady baćka mnie i skazaŭ: «Miač haniać ty i ŭ dvary zmožaš, a boksu dzie ty jašče navučyšsia?» Nu i charyzma treniera adyhrała rolu. Pačynaŭ ja ŭ Aleha Jahoraviča Paškieviča, na Aŭtazavodzie, u zale viačerniaj škoły №5. Nastaŭnik byŭ małady, haračy, z nami i dužaŭsia, i ŭ futboł hulaŭ.
Baćka Siarhieja Chamickaha, jaki paraiŭ synu zastavacca v boksie, pryjechaŭ u Minsk z Ukrainy. Vyvučyŭsia na inžyniera ŭ radyjotechničnym instytucie i ažaniŭsia ź biełaruskaj.
Siarhiej daros da čempijona Biełarusi i vystupaŭ u składzie nacyjanalnaj kamandy. Na hetym etapie jaho treniravali viadomyja śpiecyjalisty Valeryj Sobaleŭ i Stanisłaŭ Hłušankoŭ.
Ale miedaloŭ pieršynstva Jeŭropy i śvietu zdabyć nie ŭdałosia, Siarhiej spyniaŭsia za krok ad pjedestału.
— U amatarskim boksie bai karotkija. Ja tolki pačynaŭ raskačvacca, jak užo hučaŭ finalny honh. Tamu vyrašyŭ pierajści ŭ prafiesijny boks (najvialikšym dasiahnieńniem tut ličycca nie załaty alimpijski miedal, a pojas čempijona śvietu). U prafboksie ceniacca akcentavanyja ŭdary, palčatki nie takija miakkija, bolš raŭndaŭ, bai bolš žorstkija. Mianie zaŭvažyła pramoŭtarskaja kampanija z Sankt-Pieciarburhu. Tak ja staŭ čempijonam SND i słavianskich krain, uziaŭ tytuł WBO Asia Pacific. Ale potym taja pramoŭtarskaja kampanija spyniła isnavańnie. Heta było bolš za 10 hadoŭ tamu.
Siarhiej Chamicki praciahvaŭ šukać siabie ŭ sporcie. Kali nie było bajoŭ pa boksie, vystupaŭ pa praviłach kikboksinhu i muaj-taj.
Cikava, što bajec paśpieŭ sustrecca ź Jamchotam — samym papularnym tajskim prafiesijanałam pačatku 2000-ch. A taksama z čempijonam śvietu pa muaj-taj biełarusam Jurasiom Bułatam. Viarnuŭšysia ŭ boks, Chamicki taksama zmahaŭsia z samymi topavymi i zornymi bajcami. Mieŭ jak hučnyja pieramohi, tak i parazy. Ale, jak adznačajuć u baksiorskim śviecie, uzrovień Chamickaha hod ad hoda tolki palapšaŭsia.
— U mianie byli pierapynki, ja nieadnojčy sprabavaŭ skončyć z boksam i zajmacca «surjoznymi spravami». Atrymaŭ vyšejšuju jurydyčnuju adukacyju. Sprabavaŭ znajści sabie zaniatak u hetaj śfiery, ale nie spadabałasia, — pryznajecca bajec. — Padavaŭsia i ŭ mieniedžary. Ale nie skłałasia. Narešcie ja asensavaŭ, što ŭsio majo tut, u boksie. Čamu b heta nie raźvivać, nie palapšać uzrovień? I voś kali ŭ hałavie nastaŭ mir — pryjšoŭ vynik.
Svaim vydatnym šancam Siarhiej Chamicki skarystaŭsia sioleta ŭ krasaviku. Jamu prapanavali dvuboj za tytuł čempijona Jeŭropy WBO z Frenkam Bulijoni.
Naturalna, na terytoryi sapiernika. Miarkujučy pa ŭsim, biełarusa razhladali ŭ jakaści zručnaha apanienta: i dvuboj pryhožy pakaža, i pabić anhlijskaha «praśpiekta» nie zmoža. Adnak Siarhiej uziaŭ inicyjatyvu ŭ svaje ruki i ciažka nakaŭtavaŭ Buhlijoni ŭ šostym raŭndzie.
Dvuboj z zornym Robiertam Štyhlicam adbudziecca ŭ Dasau 26 lipienia. Pieramožca hetaha supraćstajańnia atrymaje mahčymaść pazmahacca za pojas čempijona śvietu siarod prafiesijanałaŭ u supiersiaredniaj vazie (76,2 kh).
Siarhiej Chamicki — heta toj bajec, jaki z hadami pieratvarajecca ŭ jašče bolš niebiaśpiečnuju zbroju. Choć jašče z savieckich časoŭ spartoŭcaŭ u nas śpisvali z rachunkaŭ užo paśla 30.
— Ale raźvivajecca spartyŭnaja miedycyna, źjavilisia novyja mietodyki trenirovak. Navuka taksama paśpiachova pracuje na sport. Prafiesijnyja spartoŭcy zarablajuć hrošy i nie žadajuć sychodzić, stračvać dachod. Tamu ŭ viarchach baksiorskich rejtynhaŭ vy pabačycie bajcoŭ, jakim 35-40 hadoŭ. A ja taksama adčuvaju, što mahu raźvivacca ŭ boksie dalej. Hałoŭnaje, kab nie padviało zdaroŭje.