Dziesiacihadovaja dziaŭčynka patanuła ŭ Pinsku, ratujučy siabroŭku
Dziesiacihadovaja dziaŭčynka patanuła ŭ Pinsku, ratujučy siabroŭku, paviedamiŭ staršynia Bresckaha abłasnoha savieta tavarystva ratavańnia na vodach Ramuald Sadoŭski.
Trahiedyja adbyłasia 21 lipienia ŭ siaredzinie dnia ŭ adtoku raki Pina. Choć hety vadajom i znachodzicca ŭ miežach horada, dabracca da jaho možna tolki na płaŭsrodkach albo ŭ abjezd, zrabiŭšy koła ŭ 20 km. Akramia taho, vadajom ličycca niebiaśpiečnym z-za vialikaj hłybini. Školnicu razam ź siabroŭkaj pryvioz siudy na łodcy dziadula. Padčas kupańnia adna ź dziaŭčynak stała tanuć. Druhaja kinułasia joj na dapamohu. Siabroŭku jana vyratavała, a sama vybracca z vady nie zdoleła.
Ab zdareńni ŭ padraździaleńnie MNS paviedamiŭ dziadula. Da prybyćcia ratavalnikaŭ jon dastaŭ unučku z vady. Vadałazy pačali akazvać joj pieršuju dapamohu. Padaśpiełaja bryhada miedykaŭ na praciahu 40 chvilin sprabavała viarnuć dzicia da žyćcia, ale, na žal, usie namahańni byli daremnyja: dziaŭčynka zanadta doŭha była pad vadoj.
U hety ž dzień, i taksama pa vinie darosłych, u vobłaści zahinuła jašče adno dzicia. U Małaryckim rajonie na vadajomie kala vioski Mielniki patanuŭ 12-hadovy žychar rajcentra. Kupańnie na vadajomie, dzie chłopčyk adpačyvaŭ z baćkami i bratam, rašeńniem Małaryckaha rajvykankama zabaroniena.
ASVOD jašče raz zaklikaje da maksimalnaj aściarožnaści na vadzie: nie kupacca ŭ nieznajomych i zabaronienych miescach i nie pakidać niepaŭnaletnich biez nahladu darosłych.