Stali viadomyja padrabiaznaści ŭžyvańnia tryma hamielčukami spajsu, u vyniku čaho adzin ź ich zastaŭsia biez vačej
Novyja padrabiaznaści ŭžyvańnia tryma hamielčukami spajsu, u vyniku čaho adzin ź ich atrymaŭ ciažkija traŭmy i byŭ pakalečany, paviedamiła prahrama «Zona Ch» telekanała «Biełaruś 1» viečaram 22 lipienia.
Pavodle źviestak prahramy, u momant pryjezdu milicyi paciarpieły śmiajaŭsia, śpiavaŭ pieśni i adkazvaŭ na ŭsie pastaŭlenyja pytańni. Heta prytym, što ŭ jaho adsutničali vočnyja jabłyki i byŭ poŭnaściu parezany tvar. Usie troje pryznalisia pravaachoŭnikam, što ŭžyvali spajs.
Jak paviedamiła raniej upraŭleńnie infarmacyi i hramadskich suviaziaŭ MUS, 21 lipienia kala 23 hadzin u milicyju pa śpieclinii 102 pastupiła paviedamleńnie ab parušeńni hramadskaha paradku na vulicy Dakutoviča (pryvatny siektar) u Homieli. Pavodle słoŭ taho, chto zvaniŭ, u dvary susiedniaha doma biehali hołyja mužčyny i šumieli.
Na miesca zdareńnia prybyła śledča-apieratyŭnyja hrupa Čyhunačnaha RAUS i supracoŭniki AMAP. U adnym z pakojaŭ ukazanaha doma jany znajšli chłopca 1991 hoda naradžeńnia. U jaho byli vydaleny abodva voki, značna paškodžany vostrym pradmietam nos, ščaka, vušy. Pobač na łožku znachodzilisia dva pryjacieli paciarpiełaha (1985 i 1993 hadoŭ naradžeńnia). Ich pavodziny byli adnaznačna acenieny jak vielmi nieadekvatnyja.
Paciarpiełamu była vyklikana chutkaja miedycynskaja dapamoha, jakaja dastaviła jaho ŭ najbližejšuju miedustanovu. Jaho pryjacielaŭ advieźli ŭ rajadździeł milicyi dla dalejšaha razboru.
Zhodna z papiaredniaj infarmacyjaj, maładyja ludzi sustrelisia kala 19 hadzin taho ž dnia. Vyrašyŭšy paviesialicca ŭ kvatery adnaho ź ich, jany nabyli kurylnuju sumieś (spajs) i, chutčej za ŭsio, spažyli jaje.
«Biełaruś 1» paviedamlaje, što paciarpieły zaraz znachodzicca ŭ reanimacyi. Jaho žyćciu ništo nie pahražaje, ale zroku małady pazbaviŭsia nazaŭsiody.
Pavodle infarmacyi aficyjnaha pradstaŭnika ŭpraŭleńnia Śledčaha kamiteta pa Homielskaj vobłaści Maryi Kryvanohavaj, dziejańni padazronych kvalifikavanyja pa prykmietach składu złačynstva, praduhledžanaha p. 3, 9 č. 2 art. 147 KK (naŭmysnaje naniasieńnie ciažkich cialesnych paškodžańniaŭ sposabam, jaki nosić charaktar mučeńnia abo katavańnia, hrupaj asob).
Pry ahladzie miesca zdareńnia śledča-apieratyŭnaj hrupaj kanfiskavany frahmienty špaleraŭ z rečyvam buraha koleru, draŭlany zavostrany brusok, raźbity šklany hraduśnik, dva papiarovyja pakiety z rečyvam raślinnaha pachodžańnia.
Rasśledavańnie kryminalnaj spravy pastaŭlena na asabisty kantrol načalnika USK pa Homielskaj vobłaści. Papiaredniaje śledstva daručana hrupie najbolš daśviedčanych śledčych.
Supracoŭniki ŭpraŭleńnia Dziaržaŭnaha kamiteta sudovych ekśpiertyz pa Homielskaj vobłaści pravodziać pryznačanyja padčas śledstva nieabchodnyja ekśpiertnyja daśledavańni, u tym liku sudova-miedycynskija, sudova-bijałahičnuju i chimičnuju ekśpiertyzy.